سوال

طلاق نامے میں مجھ پر الزام لگایا گیا ہے کہ میں نے خلع کا مطالبہ کیا تھا جو کہ سراسر خلافِ واقع اور بلا ثبوت ہے،میں نے ایسا کوئی مطالبہ قطعاً نہیں کیا تھا،کیا اب حق مہر میرا حق بنتا ہے اور میں اس کا مطالبہ کرسکتی ہوں اور کیا اس پر میرا مہر دینا لازم ہے؟

تنقیح: واضح رہے کہ رخصتی ہوچکی تھی،یہ معاملات اس کے بعد پیش آئے ہیں۔

اَلجَوَابْ بِاسْمِ مُلْہِمِ الصَّوَابْ

محض شوہر کی جانب سے یکطرفہ الزام کی وجہ سے آپ پر خلع ثابت نہیں ہوسکتا،جب تک شوہر اپنے اس دعوی کو شرعی شہادت(دو نیک و صالح مردوں یا انہیں صفات کی حامل دو عورتوں اور ایک مرد کی گواہی) سے ثابت نہ کردے،اگر وہ اپنے اس دعوی کو شرعی شہادت سے ثابت کردے کہ آپ نے مہر کے عوض اس سے خلع لیا تھا تو پھر اس کے ذمے مہر دینا لازم نہیں ہوگا،جبکہ اس کے پاس شرعی شہادت نہ ہونے کی صورت میں آپ کو حلفیہ بیان دینا پڑے گا کہ آپ نے اس سے مہر کے عوض خلع نہیں لیا،آپ کی جانب سے قسم اٹھانے کے بعد اس کے ذمے مہر کی ادائیگی لازم ہوگی۔

"الفتاوى الهندية" (4/ 3):

"(وأما حكمها) فاستحقاق الجواب على الخصم بنعم أو لا فإن أقر ثبت المدعى به وإن أنكر يقول القاضي للمدعي: ألك بينة فإن قال: لا، يقول لك يمينه ولو سكت المدعى عليه ولم يجبه بلا أو نعم فالقاضي يجعله منكرا حتى لو أقام المدعي البينة تسمع كذا في محيط السرخسي".