سوال

ایک شادی شدہ شخص نے کسی سے پشتو میں کہا " کہ تالا میں خپلہ خور درکڑہ نو پہ ما دی خزه طلاقہ ی"، جس کا مطلب یہ ہے کہ اگر میں نے آپ کو اپنی بہن کا رشتہ دیا تو میری بیوی مجھ پر طلاق ہو۔ اب اگر اس لڑکی کا نکاح  اس کا باپ اس شخص سے کرائے اور وہ بھائی کنارہ کشی اختیار کرے تو کیا اس کی بیوی پر طلاق واقع ہوگی یا نہیں؟

اَلجَوَابْ بِاسْمِ مُلْہِمِ الصَّوَابْ

واضح رہے کہ طلاق جائز کاموں میں سب سے ناپسندیدہ کام ہے؛ بات بات پر بیوی کو فوری یا مشروط طلاق دینا انتہائی غلط طرزِ عمل ہے، جس سے بچنا لازم ہے۔  

اس تمہید کے بعد آپ کے سوال کا جواب یہ ہے کہ اگر مذکورہ شخص اپنی بہن کے اس رشتے میں ایسا کوئی کردار ادا نہ کرے جو اس رشتے پر اس کی رضامندی پر دلالت کرتا ہو، بلکہ والد خود اپنی بیٹی کا رشتہ کرائے تو اس کی بیوی پر طلاق واقع نہیں ہوگی۔

الدر المختار (3/ 341):

باب التعليق  ( هو ) لغة من علقه تعليقا، قاموس، جعله معلقا، واصطلاحا ( ربط حصول مضمون جملة بحصول مضمون جملة أخرى ) ويسمى يمينا مجازا.

الفتاوى الهندية (1/ 420):

وإذا أضافه إلى الشرط وقع عقيب الشرط اتفاقا، مثل أن يقول: لامرأته إن دخلت الدار فأنت طالق.