سوال

والد ایک بیٹے کو گھر تعمیر کرنے کیلئے زمین میں سے کچھ حصہ دینے کی پیشکش کرتا ہے، بیٹا والد کی زندگی میں اس پیشکش سے فائدہ نہیں اٹھاتا، بلکہ اس کو ٹھکراتا ہے، طویل عرصہ گزرنے کے باوجود اسی حصہ زمین پر کسی قسم کا تصرف نہیں کرتا، نہ قبضہ لیتا ہے اور نہ ہی کسی قسم کی حد بندی کرتا ہے، کیا یہ جگہ والد صاحب کی وفات کے بعد ترکہ میں شمار ہو گی یا اسی بیٹے کی ملکیت تصور ہو گی ؟

اَلجَوَابْ بِاسْمِ مُلْہِمِ الصَّوَابْ

صورتِ مسئولہ میں والد صاحب کے زمین دینے پر اگر مذکورہ بیٹے نے اس زمین کو ٹھکرا دیا تھا، یعنی لینے سے انکار کر دیا تھا تو اس زمین کا ہبہ درست نہیں ہوا، کیونکہ ہبہ کا معاملہ رد (چیزکو لینےسے انکار کرنا)کرنے سے رد ہو جاتا ہے، نیز سوال میں ذکر کی گئی تفصیل کے مطابق اس نے ہبہ کی گئی زمین کا قبضہ بھی نہیں لیا تھا، جبکہ ہبہ کا معاملہ بغیر قبضہ کے مکمل نہیں ہوتا، اس لیے یہ زمین والدصاحب کی زندگی میں بدستور ان کی ملکیت میں رہی اور اب ان کی وفات کے بعد ان کا ترکہ شمار ہو گی اور ان کے ورثاء میں شرعی حصوں کے مطابق تقسیم ہو گی۔

الفتاوى الهندية (4/ 384) دار الفكر،بيروت:

ولو رد الوارث الهبة ترتد بالرد خلافا لمحمد - رحمه الله تعالى -، ولو وهب لبعض الورثة فالهبة لكلهم، ولو أبرأ الوارث صح أيضا، كذا في الوجيز للكردري.

الاختيار لتعليل المختار (4/ 36) دار الكتب العلمية – بيروت:

 (وسقط عنه مال الكتابة) لحصول المقصود بدونه وهو العتق، وكذلك لو أبرأه عن البدل أو وهبه منه فإنه يعتق قبل أو لم يقبل لأنه أتى بمعنى العتق وهو إبراؤه من البدل وإسقاطه عنه، إلا أنه إذا قال لا أقبل عتق وبقي البدل دينا عليه لأن هبة الدين ترتد بالرد، والعتق لا.