سوال

ادویات اور علاج کے ذریعہ بانجھ عورت کو اگر دودھ اُتر آئےتو وہ عورت مدت رضاعت میں کسی بچی کو دودھ پلانے سے اس بچی کی رضاعی ماں بن سکتی ہے یا نہیں اور اسی بانجھ عورت کا شوہر مذکورہ بچی کا رضاعی باپ یا کم از کم محرم بن سکتا ہے یا نہیں؟ اورکیا  بلوغت کے بعد بچی کو عورت کے شوہر  سے  پردہ کرنا لازم ہوگا؟

اَلجَوَابْ بِاسْمِ مُلْہِمِ الصَّوَابْ

 بچہ یابچی کاکسی عورت اور اس کے خاوند  دونوں سے حرمت رضاعت  کے ثبوت کے لئے ضروری ہے کہ عورت نے مدت رضاعت میں  جو دودھ پلایا ہو وہ خاوند کی وجہ سے اترا ہو۔ اس کے علاوہ کسی بھی وجہ سے دودھ اترنے پر عورت سے  تو حرمت رضاعت ثابت ہو جائے گی ،لیکن عورت کے خاوند سے حرمت رضاعت ثابت نہ ہو گی ۔

صورت مسؤولہ میں چونکہ   عورت کا دودھ دوا کی وجہ سے اترا ہے ،لہذا بچی کی عورت سے  تو  حرمت رضاعت ثابت ہو جائے گی اور وہ بچی کی رضاعی ماں بن جائے گی ،البتہ مرد سےحرمت رضاعت ثابت نہ ہو گی  اور بلوغت کے بعد بچی کا عورت کے خاوند سے  پردہ کرنا لازم ہوگا ۔

حاشية ابن عابدين = رد المحتار ط الحلبي» (3/ 221): رضاعت

لو تزوج امرأة ولم تلد منه قط ونزل لها لبن وأرضعت ولدا لا يكون الزوج أبا للولد لأن نسبته إليه بسبب الولادة منه، وإذا انتفت انتفت النسبة فكان كلبن البكر۔

الاختيار لتعليل المختار»(3/ 118):

ولو ولدت من رجل، وأرضعت، ثم يبس اللبن، ثم در، فأرضعت به صبيا يجوز لذلك الصبي أن يتزوج بنت الزوج من غيرها. وكذا لو لم تلد منه قط، فنزل لها لبن۔