سوال

 اگر گھر میں لگے فرش پر ان جانے میں ماسی نجس  پانی سے  پوچا  لگا دے تو کیا  فرش ناپاک ہو جائے گا؟ کیا وہ فرش خشک ہو کر پاک ہو گا یا نہیں؟  کیا پوچا لگانے سے جو خشک نشان فرش  پر بن جاتے ہیں وہ ناپاکی کے نشان شمار ہوں گےیا اس فرش پر نماز ادا ہو جائے گی؟

اَلجَوَابْ بِاسْمِ مُلْہِمِ الصَّوَابْ

   فرش پر نجاست لگ جا نے کی صورت میں اگر اس کےبعد فرش خشک ہوجائے اور اس  نجاست کے رنگ وبو کا اثر بھی ختم ہوجائے تو اس سے  فرش پاک ہو جاتا ہے، لہذا صورت مذکورہ میں اگر کسی نے  ناپاک پانی سے فرش پر پوچا لگایا   ہو اور بعد میں وہ    اس طرح  خشک ہوگیا کہ اس سے نجاست کی بو اور نشانات بھی زائل ہوگئے    تو فرش کو پاک سمجھا جائے گا،اور  اس پر نماز پڑھنا  جائز ہوگا لیکن تیمم پھر بھی  نہیں کرسکتے، باقی اگر فرش خشک ہونے  کے بعداس پر نجاست کے   نشانات موجود ہوں  تو وہ جگہ  ناپاک سمجھی جائےگی،اور   اس   پر  نماز پڑھنا اور وہاں سے تیمم کرنا دونوں جائز نہیں ہوں گے۔

«الموسوعة الفقهية الكويتية» (29/ 106):

ذهب الحنفية عدا زفر إلى أن الأرض إذا أصابها نجس، فجفت بالشمس أو الهواء أو غيرهما وذهب أثره طهرت وجازت الصلاة عليها، لقوله صلى الله عليه وسلم: أيما أرض جفت فقد ذكت.

«بدائع الصنائع في ترتيب الشرائع» (1/ 85):

ولو أصابت النجاسة الأرض فجفت وذهب أثرها تجوز الصلاة عليها عندنا، وعند زفر لا تجوز، وبه أخذ الشافعي، ولو تيمم بهذا التراب لا يجوز في ظاهر الرواية، وقد ذكرنا الفرق فيما تقدم.