سوال

دادا کے انتقال کے بعد میراث کی تقسیم میں کئی سال  تاخیر ہوئی، اس دوران مرحوم کے ایک بیٹے کا  انتقال ہو گیا۔ اب بعض ورثہ کا کہنا ہے کہ اس مرحوم بیٹے کی اولاد کو دادا کی میراث میں حصہ نہیں ملے گا۔ براہ کرم اس معاملہ میں شرعی رہنمائی فرمائیں۔

اَلجَوَابْ بِاسْمِ مُلْہِمِ الصَّوَابْ

والد  کی وفات کے ساتھ ہی اس کی اولاد اپنے اپنے شرعی حق کے بقدر مرحوم کے ترکہ کی حق دار ہوجاتی ہے، پس تقسیمِ ترکہ سے پہلے اگر کسی وارث کا انتقال ہوجائے تو اس کا حصہ اس کے ورثاء کو منتقل ہوجاتا ہے، لہذا صورتِ مسئولہ میں جس وارث کا تقسیم سے پہلے انتقال ہوگیا ہے اس کے ورثاء اپنے دادا کی میراث میں سے اپنے مرحوم والد کے حصے کے حقدار ہوں گے۔

واضح رہےکہ  اگر دادا کی زندگی میں ہی ان کی اولاد میں سے کسی کا انتقال ہوجائے، اور دادا کا بعد میں انتقال ہوا ہو تو اس صورت میں دادا کی حقیقی اولاد میں بیٹے کے ہوتے ہوئے پوتے پوتیوں کے لیے شرعی حصہ مقرر نہیں ہے۔

قال العلامۃ الحصکفي رحمہ اللہ:‌‌فصل في المناسخة (مات بعض الورثة قبل القسمة للتركة صححت المسألة الأولى) وأعطيت سهام كل وارث (ثم الثانية)الخ.

وقا ل ابن عابدین رحمہ اللہ :هي مفاعلة من النسخ بمعنى النقل والتحويل والمراد بها هنا أن ينتقل نصيب بعض الورثة بموته قبل القسمة إلى من يرث منه. (الدرمع الرد:(801/6