سوال

پھپھو کی وفات سے پہلے ان کے دو بھائی اور ایک غیر شادی شدہ بہن کا انتقال ہو چکا تھا۔ دو بھائیوں کی اولاد میں سے ایک بھائی، جن کے ساتھ وہ (پھپھو) رہتی تھیں، کے دو بیٹے اور دو بیٹیاں (جن میں سے ایک بیٹی غیر شادی شدہ ہے) ہیں۔ دوسرے بھائی کے دو بیٹے اور دو شادی شدہ بیٹیاں ہیں۔ ترکہ میں ایک فلیٹ، الیکٹرانکس کا سامان، گھریلو استعمال کے برتن، کچھ سلے ہوئے اور ان سلے کپڑے وغیرہ شامل ہیں۔

ترکہ میں تقسیم کی شرح کیا ہوگی؟

کیا غیر شادی شدہ بھتیجی  بھی ترکہ کی حقدار ہے؟

تنقیح: سائلہ سے وضاحت طلب کرنے پر معلوم ہوا کہ پھپھو غیر شادی شدہ تھیں۔ ان کے والدین اور بہن بھائی  پہلےوفات پا چکے تھے۔ ان کے انتقال کے وقت ورثاء میں صرف دونوں بھائیوں کی اولاد، یعنی چار بھتیجے اور چار بھتیجیاں موجود تھیں۔

اَلجَوَابْ بِاسْمِ مُلْہِمِ الصَّوَابْ

صورتِ مسئولہ میں مرحومہ نے جو کچھ چھوٹابڑا سازوسامان،رقم اور جائیداد چھوڑی ہے،سب اس کا ترکہ ہے ۔  اس میں سے  پہلے مرحومہ کی تجہیز وتکفین کےمعتدل اخراجات (اگركسی وارث نے یہ  بطورتبرع اپنے ذمے نہ لیے ہوں( نکالےجائیں ،پھر اگر مرحومہ  کے ذمہ کسی کاقرض ہو تووہ  ادا کیا جائے ،پھر اگرمرحومہ نے کسی غیروارث کے لئےکوئی جائز وصیت کی ہو تو ایک تہائی ترکہ کی حد  تک اس کے مطابق عمل کیا جائے،اس کےبعدجوترکہ  بچ جائے اس کومرحومہ کےانتقال کےوقت موجودورثاء   (بھتیجوں  اور بھتیجیوں میں سے صرف بھتیجوں ) میں تقسیم کیا جائے گا۔ بھتیجیاں (چاہے شادی شدہ ہوں یا غیر شادی شدہ)میراث میں حصے دار نہیں ہوں گی۔

تقسیمِ میراث کا طریقہ  یہ ہوگا کہ کل ترکہ کے چار (4) حصے کردیے جائیں گے اور  ہر بھتیجے کو ایک ایک حصہ دیا جائے گا ،یعنی فیصدی اعتبار سے ہر بھتیجا کل ترکہ کے 25% مالیت کا مستحق ہوگا۔

ذیل میں تقسیم میراث کا نقشہ ملاحظہ فرمائیں :

الدر المختار شرح تنوير الأبصار وجامع البحار (ص765):

ان ‌ابن ‌الاخ ‌لا ‌يعصب أخته، كالعم لا يعصب أخته وابن العم لا يعصب أخته وابن المعتق لا يعصب أخته، بل المال للذكر دون الانثى لانها من ذوي الارحام.

قال في الرحبية: وليس ابن الاخ بالمعصب من مثله أو فوقه في النسب .