سوال

میرے پاس مدرسہ کے پانی کی مد میں بیس ہزار روپے جمع ہو چکے ہیں۔ کچھ عرصہ پہلے میں نے اپنے ذاتی پیسوں  سے ایک واٹر ڈسپینسر(Dispenser) خرید کر مدرسے میں رکھ دیا تھا ،جو بچوں کے روز مرہ استعمال میں ہے۔ میں نے یہ نیت کی تھی کہ یہ وقتی طور پر رکھ رہا ہوں ،بعد میں  جب ضرورت ہوگی تو واپس لے لوں گا ۔اب میں چاہتا ہوں کہ وہ ڈسپینسر  (Dispenser) کی قیمت (جو میں نے خود دی تھی) ان  جمع شدہ پیسوں سے لے لوں۔ کیا ایسا کرنا شرعاً جائز ہوگا؟

تنقیح:مدرسہ وقف شدہ نہیں ہے، سائل کے بڑے بھائی کی ملک ہے۔سائل کے ذمے اہتمام و انصرام ہے اور اس کے عوض ماہانہ تنخواہ لیتے ہیں۔ مدرسے کے ساتھ ایک اسکول بھی  ہے جس کی فیس کے ذریعے مدرسے کے عملے کو تنخواہیں دی جاتی ہیں۔ سائل(مہتمم) بھی اپنی تنخواہ اسی فی (Fee)سے  حاصل کرتے ہیں۔

اَلجَوَابْ بِاسْمِ مُلْہِمِ الصَّوَابْ

بطور تمہید یہ واضح رہے کہ عام حالات میں  شریعت مطہرہ نے ایک ہی شخص کو خرید و فرخت کے معاملات میں   بیک وقت خریدار اور فروخت کنندہ کا کردار ادا کرنے   کی اجازت نہیں دی۔مذکورہ صورت  میں بھی سائل  اپنی ملک میں موجود ڈسپینسر(Dispenser) فروخت کرنا چاہتا ہے،اور اس کے  عوض   پانی کیلئے جمع  شدہ رقم(جس کی ادائیگی کیلئے  وہ پیسے دینے والے معاونین کی جانب سے وکیل ہے )  سے ادا کرنا چاہتا ہے،لہٰذا مذکورہ ممانعت کی وجہ سے یوں معاملہ کرنا درست نہ ہوگا۔

اس کی ایک جائز صورت یہ ہو سکتی ہے کہ  چونکہ  مدرسہ بھائی کی ملک ہے،لہٰذا یہ جمع شدہ رقم  آپ بھائی کی تحویل میں دے دیں ، اور ان سے یہ کہیں کہ وہ آپ سے ڈسپینسر(Dispenser) خرید لیں  ۔یہ واضح رہے کہ   اس کی قیمت موجودہ بازاری قیمت سے زائد نہ لگائی جائے۔

بدائع الصنائع في ترتيب الشرائع (2/ 232):

وأما البيع فالواحد فيه إذا كان وليا يقوم بطرفي العقد، كالأب يشتري مال الصغير لنفسه، أو يبيع مال نفسه من الصغير، أو يبيع مال ابنه الصغير من ابنه الصغير، أو يشتري، إلا أنه إذا كان وكيلا لا يقوم بهما؛ لأن حقوق العقد مقتصرة على العاقد، فلا يصير كلام العاقد كلام الشخصين؛ ولأن حقوق البيع إذا كانت مقتصرة على العاقد وللبيع أحكام متضادة من التسليم والقبض والمطالبة، فلو تولى ‌طرفي ‌العقد لصار الشخص الواحد مطالبا ومطلوبا ومسلما ومتسلما وهذا ممتنع - والله عز وجل أعلم.

فتح القدير للكمال بن الهمام - ط الحلبي (6/ 251):

واعلم أن كون الواحد لا يتولى ‌طرفي ‌العقد في البيع مخصوص منه الأب يشتري مال ابنه لنفسه أو يبيع ماله منه، والوصي عند أبي حنيفة إذا اشترى لليتيم من نفسه أو لنفسه منه بشرطه المعروف في باب الوصية.