سوال

میری ہمشیرہ کی ملکیت میں تقریباً ساڑھے چار تولے سونا،دو چاندی کی انگوٹھیاں  اور  نقدی کی صورت میں کچھ رقم بھی ہے تو کیا  وہ  زکوٰۃ کی مقدار کی بقدر پیسے اپنے شوہر سے لے گی یا اپنے سونا میں سے کچھ بیچ کر زکوٰۃ ادا کرے گی؟

اَلجَوَابْ بِاسْمِ مُلْہِمِ الصَّوَابْ

واضح رہے کہ زکوٰۃ اُسی شخص پر لازم ہوتی ہے جو نصاب کا مالک ہو، اگر بیوی نصاب کی مالک ہے تو اس کی زکوۃ اُسی  پر لازم ہو گی، شوہر پر لازم نہیں ہو گی۔تاہم اگرشوہر ہی بیوی کی طرف سے زکوٰۃ ادا کر  دے تو یہ اس کا حسنِ سلوک اور احسان ہوگا، جس پر اس کو اجر ملے گا۔ لیکن واضح رہے  کہ شوہر کے لئے بیوی کی طرف سے زکوٰۃ کی ادائیگی سے پہلےاس  کے علم میں لانا ضروری ہے،تاکہ بیوی زکوٰۃ کی ادائیگی کی نیت کر لے ،کیونکہ نیت کے بغیر زکوٰۃ ادا نہیں ہوتی یا پہلے سےبیوی اجازت دے دے کہ میری طرف سے زکوٰۃ ادا کردیں تو عین موقع پر بتائے بغیر بھی زکوٰۃ دینے سے ادا ہوجائے گی۔

فتاوی تاتارخانیہ (، ج:2، ص:217، ط:ادارۃ القرآن):

"الزكوة واجبة علي الحر العاقل البالغ المسلم اذا بلغ نصابا ملكا تاما و حال عليه الحول.

فتاوی ہندیہ (ج:1، ص:171، ط:مكتبه رشيديه):

"إذا وكل في أداء الزكاة أجزأته النية عند الدفع إلى الوكيل فإن لم ينو عند التوكيل ونوى عند دفع الوكيل جاز كذا في الجوهرة النيرة وتعتبر نية الموكل في الزكاة دون الوكيل كذا في معراج الدراية فلو دفع الزكاة إلى رجل وأمره أن يدفع إلى الفقراء فدفع، ولم ينو عند الدفع جاز."