سوال

 ایک بیوہ عورت نے کسی کے ساتھ انویسٹمنٹ کی نصف نصف پرافٹ پر اور اس بیوہ کا انتقال ہوگیا،پھر یہ پرافٹ اس کی کنواری بیٹی کو ملتا رہا، حال ہی میں اس کا بھی انتقال ہوگیا،اس کا چچا اورپھوپھی بھی موجود ہیں اوربیوہ کے بھائی اور بہن بھی ہیں ۔ میراث کیسے تقسیم ہوگی؟ بینوا توجروا۔

اَلجَوَابْ بِاسْمِ مُلْہِمِ الصَّوَابْ

اول بالترتیب مرحوم بیوہ اور اس کی مرحوم بیٹی  میں سے ہر ایک کے ترکہ سے اس کےکفن ودفن کے اخراجات ادا کئے جائیں گے، بشرطیکہ کسی وارث نے اپنی طرف سے ادا نہ کئے ہوں، اس کے بعد اس کے ذمہ واجب  حقوق اگر ہوں تو ان کو ادا کیا جائے گا،( البتہ حقوق اللہ مثلا نمازوں،روزوں کا فدیہ دینے کی شرط یہ ہے کہ میت نےاپنی زندگی میں ادائیگی کی وصیت کی ہو، ورنہ ادائیگی لازم نہیں،لیکن اگر کوئی وارث اپنی ذاتی ملکیت سے ادا کردے تو یہ بھی جائز ہے)اس کے بعد اگر اس نے کوئی جائز وصیت کی ہو تو ایک تہائی تک اس کو پورا کیا جائے گا۔

 اس سب کچھ کےبعدمرحوم بیوہ کا ترکہ اس کی مرحوم کی بیٹی اور  بہن بھائیوں میں تقسیم ہوگا۔( بیٹی کو کل ترکہ کا نصف(50 فیصد)،جبکہ باقی(50 فیصد) ترکہ بہن میں بھائیوں میں اس طرح تقسیم ہوگا کہ بھائی کو بہن کا دگنا ملے گا)اور بیوہ کی  مرحوم بیٹی کا حصہ مع اس کےدیگرمتروکہ مملوکہ جائیدادبطورترکہ اس کے چچا کوملےگا۔(اورپھوپھی کوکچھ نہیں ملے گا۔)

واضح رہے کہ درج بالا تقسیم سؤال میں مذکور ورثہ کی صورت میں ہے، مزید ورثہ ہونے کی صورت میں مذکور جواب کالعدم شمارہوگا۔

۔۔۔۔۔۔