سوال

میرے داماد نے میری بیٹی سے جھگڑا کیا اور کہا "برقع پہن کے جاؤ، میں تنگ آچکا ہوں، میری طرف سے آزاد ہو"۔  "میری طرف سے آزاد ہو" کی بات اس نے دو مرتبہ کی۔ اس وقت ہم بھی وہاں موجود تھے۔ اس بات کے گواہان تین آدمی ہیں، دو مرد اور ایک خاتون۔

اَلجَوَابْ بِاسْمِ مُلْہِمِ الصَّوَابْ

اگر آپ کے داماد نے واقعۃً آپ کی بیٹی کو جھگڑے میں یہ  الفاظ "برقع پہن کے جاؤ، میں تنگ آچکا ہوں، میری طرف سے آزاد ہو" کہے ہیں تو ان الفاظ سے آپ کی بیٹی پر ایک طلاقِ بائن واقع ہوچکی ہے، اور ان دونوں کا نکاح ختم ہوچکا ہے۔ اب اگر وہ دونوں چاہیں تو نئے مہر کے بدلے گواہوں کے سامنے دوبارہ نکاح کر کے ساتھ رہ سکتے ہیں، البتہ دوبارہ نکاح کے بعد آپ کے داماد کے پاس آئندہ کے لیے صرف دو طلاقوں کا اختیار ہوگا، یعنی اگر وہ مزید دو طلاقیں دے گا تو ان دونوں کے درمیان حرمتِ مغلظہ ثابت ہوجائے گی، جس کے بعد نہ رجوع ممکن ہوگا، نہ دوبارہ نکاح۔   

(باستفادۃٍ من امداد الاحکام:2/444-470)

۔