سوال

السلام علیکم سوال: بھنگ اور افیون کی کاشت ہمارے علاقےمیں بہت زور و شور سے جاری ہے۔ کیا بھنگ اور افیون کی کاشت جائز ہے یا نہیں ؟

اَلجَوَابْ بِاسْمِ مُلْہِمِ الصَّوَابْ

افیون اور بھنگ کا چونکہ ادویات و دیگر جائز امورمیں  بھی استعمال ہوتاہے ، لہذا افیون اور بھنگ کی کاشت  یا  کسی ایسے شخص کو فروخت کرنا جس کے بارے میں یہ معلوم نہ ہو کہ وہ اس سے کیا بنائے گا فی نفسہ جائز ہے،البتہ کسی ایسے شخص کو فروخت کرنا جس کے بارے میں بیچنے والے  کومعلوم ہو کہ خریدار افیون یا بھنگ ناجائز مقصدمیں استعمال کرے گا، مکروہ ہے۔

البتہ اگر حکومت وقت کی طرف سے اس کی کاشت اور خرید وفروخت پر پابندی ہوتو پھر اس کی  کاشت اور کاروبار کرنے پر قانون توڑنے کا   گناہ ہوگا۔

قال العلامۃ ابن الھمام رحمہ اللہ :وعدم الوقوع (الطلاق )بالبنج والأفيون لعدم المعصية فإنه يكون للتداوي غالبا فلا يكون زوال العقل بسبب هو معصية حتى لو لم يكن للتداوي بل للهو وإدخال الآفة قصدا ينبغي أن نقول يقع.( فتح القدير:491/3)

قال العلامۃ ابن نجیم رحمہ اللہ :وقد قيد ابن الملك في (شرح المنار) إباحة البنج ‌والأفيون بما إذا كان للتداوي.( النهر الفائق: 319/2)

قال العلامۃ الحصکفی رحمہ اللہ :وصح بيع غير الخمر مما مر، ومفاده صحة بيع الحشيشة ‌والافيون.قلت: وقد سئل ابن نجيم عن بيع الحشيشة هل يجوز؟ فكتب لا يجوز، فيحمل على أن مراده بعدم الجواز عدم الحل.( الدر المختار:ص،677)