سوال

 کیا فرماتے ہیں مفتیانِ کرام اس مسئلے کے بارے میں کہ میری شادی کو تقریباً گیارہ سال ہو چکے تھے، اور میرے بچے نہیں تھے۔ میری اہلیہ نے چھوٹی سی گھریلو لڑائی کی وجہ سے گھر سے باہر جا کر دکان سے گندم کی گولیاں خرید لی اور جان بوجھ کر یا نہ چاہتے ہوئے گندم کی گولیاں کھا لی، جس سے ان کی موت واقع ہو گئی۔ ان کی موت کے بعد ان سے باقی رہنے والی چیزوں کا شرعی کیا حکم ہے؟

اَلجَوَابْ بِاسْمِ مُلْہِمِ الصَّوَابْ

بیٹی کی خودکشی پر میکے والوں کے تحفظات ہوسکتے ہیں ، انہیں اعتماد میں لینا چاہیے تاکہ صدمے کی کیفیت میں بھی شریعت کے تقاضوں پر چلنے کی توفیق  نصیب  ہو۔بہتر ہے کہ کسی خاندانی بزرگ یا علاقائی علماء کے سامنے حالات رکھ کر رہنمائی لی جائے۔آپ کے بیان کردہ حالات کو درست مانا جائےتو درج ذیل شرعی حکم پر عمل ہونا چاہیے۔

بیوی کی وفات  کے وقت جو کچھ بھی ان  کی ملکیت میں تھا، وہ سب ترکہ میں داخل ہے، اور اسے  شرعی حصص کے مطابق ورثہ میں تقسیم کرنا ضروری ہے۔ مرحومہ کی اولاد نہ ہونے کی صورت میں شوہر کو کل ترکہ کا آدھا ملے گا۔

البحر الرائق شرح كنز الدقائق ومنحة الخالق وتكملة الطوري ط: دار الكتاب الإسلامي (8/ 557):

(يبدأ من تركة الميت بتجهيزه) المراد من التركة ما تركه الميت خاليا عن تعلق حق الغير بعينه...فيجب أن يعلم أن التركة تتعلق بها حقوق أربعة جهاز الميت ودفنه والدين والوصية والميراث، فيبدأ بجهازه وكفنه وما يحتاج في دفنه بالمعروف... ثم الدين...  ثم تنفذ وصاياه من ثلث ما يبقى بعد الكفن والدين إلا أن يجيز الورثة أكثر من الثلث، ويقسم الباقي بين الورثة على سهام الميراث.

رد المحتار ط : الحلبي (6/ 770):

"(والربع للزوج) ...(مع أحدهما) أي الولد أو ولد الابن (والنصف له عند عدمهما) فللزوج حالتان النصف والربع."