سوال

کیا فرماتے ہیں  علماء کرام  اس مسئلے کے بارے میں  کہ  کسی  بزرگ  ولی سے استخارہ  کروانے کا  کیاحکم ہے ؟کسی   اور   سے  استخارہ کروانا  بدعت  تو نہیں ؟ شریعت کی روشنی  میں  جواب عنایت فرمائیں۔

اَلجَوَابْ بِاسْمِ مُلْہِمِ الصَّوَابْ

جب کسی  امر مباح کے کرنے نہ کرنے کے  متعلق  دل میں   تردد  پیدا ہو تو  دورکعت نفل  نماز پڑھ کر  حدیث میں وارد شدہ  استخارہ کی دعا پڑھی جائے یہی اس کا مسنون  طریقہ ہے۔ اس کے بعد  دل جس کام کی طرف  مائل ہو  اس پر  عمل کیاجائے ، اس میں ان شااللہ  تعالی  خیر ہوگی ،اس کے لئے  خواب نظر  آنا ضروری  نہیں ۔نیزاستخارہ کے علاوہ  خاندان کے بزرگ  افراد اور مخلص دوستوں سے مشورہ بھی کرلیاجائے  تو زیادہ مناسب ہے۔

جہاں تک کسی اور سے استخارہ  کروانے کا مسئلہ ہے  تو سمجھ لیں کہ استخارہ میں  اصل تو  یہی  ہے کہ آدمی  اپنا استخارہ  خود  کرے کسی  اورسے  نہ کروائے،ہاں  اگر کسی  کو  اپنے  استخارہ پر  اعتماد  نہ  ہو اس لئے کسی  اللہ  والے سے  استخارہ  کروانا  چاہتا ہے   ،یا  یہ خیال کرتا ہے کہ جیسے  بزرگوں کے  مشورے میں  خیر ہے تو ان کے استخارے میں  بھی خیر ہوگی ، اس خیال سےکسی  اللہ والے سے استخارہ  کروالے تو شرعا اس کی  بھی گنجائش ہے ۔لیکن  یاد رہے کہ آج کے  دور  میں  بعض  لوگوں نے اس کو   ایک مستقل دھندا بنالیا  ہے کہ  لوگوں کو  استخارہ  نکال کے دینے  پر پیسے  وصول کرتے ہیں ،اس میں زیادہ تر ٹھگ لوگ ہوتے ہیں ، جن پربھروسہ بھی نہیں ہوتا کہ   وہ استخارہ  کرتے بھی ہیں یا نہیں ،اس لئے ایسے  پیشہ  ور لوگوں کے پاس جانے سے اجتناب  کرنا لازم ہے ۔

حوالہ جات

مشكاة المصابيح للتبريزي (1/ 295)

عن جابر بن عبد الله قال : كان رسول الله صلى الله عليه و سلم يعلمنا الاستخارة في الأمور كما يعلمنا السورة من القرآن يقول : " إذا هم أحدكم بالأمر فليركع ركعتين من غير الفريضة ثم ليقل : اللهم إني أستخيرك بعلمك وأستقدرك بقدرتك وأسألك من فضلك العظيم فإنك تقدر ولا أقدر وتعلم ولا أعلم وأنت علام الغيوب اللهم إن كنت تعلم أن هذا الأمر خير لي في ديني ومعاشي وعاقبة أمري - أوقال في عاجل أمري وآجله - فاقدره لي ويسره لي ثم بارك لي فيه وإن كنت تعلم أن هذا الأمر شر لي في ديني ومعاشي وعاقبة أمري - أو قال في عاجل أمري وآجله - فاصرفه عني واصرفني عنه واقدر لي الخير حيث كان ثم أرضني به " . قال : " ويسمي حاجته " . رواه البخاري

احسان اللہ شائق عفا اللہ عنہ    

 دارالافتاء جامعة الرشید  کراچی

۲۹ صفر ١۴۴۳ھ

واللہ سبحانہ وتعالی اعلم