سوال

میرا نام واحد محمود  ہے ،یہ اللہ تعالی کا صفاتی نام ہے ،اللہ تعالی  کے صفاتی نام  کے ساتھ  عبد،  لگانا   چاہئے یانہیں ؟قرآن وحدیث   کی روشنی  میں  باحوالہ  جواب  سے  مطلع فرمائیں

اَلجَوَابْ بِاسْمِ مُلْہِمِ الصَّوَابْ

اسماء حسنی  تین  قسم پر  ہیں

1۔ وہ اسماء  حسنی  جو  اللہ تعالی  کے اسم ذات  ہوں  یا صرف االلہ  تعالی  کی صفات  مخصوصہ  کے معنی میں  ہی  استعمال  ہوتے ہیں ،ان اسماء کا استعمال   غیر اللہ   کے لئے  کسی حال میں  جائز  نہیں جیسے  اللہ  ،الرحمن ،القدوس ۔

2۔ وہ اسماء حسنی   جو قرآن حدیث ، تعامل امت  یاعرف  عام میں  غیر اللہ  کے لئے استعمال   ہوئے ہوں  ، ایسے اسماء  سے غیر اللہ کانام  رکھنا  جائز ہے ، جیسے عزیز  ،کریم   ٕ،علی ، رحیم ،  واسع ،حکیم  وغیرہ  ۔

3۔ وہ اسماء  جواللہ تعالی کی صفات  مخصوصہ  میں سے نہ  ہوں لیکن قرآن وحدیث   تعامل امت  اور عرف  عام  میں  غیراللہ  کے لئے  استعمال  نہ ہوئے ہوں ،ایسے نام  رکھنے سے پرہیز  کرنالازم  ہے ۔

حوالہ جات

الدر المختار وحاشية ابن عابدين (رد المحتار) (6/ 417)

(أحب الأسماء إلى الله تعالى عبد الله وعبد الرحمن) وجاز التسمية بعلي ورشيد من الأسماء المشتركة ويراد في حقنا غير ما يراد في حق الله تعالى لكن التسمية بغير ذلك في زماننا أولى لأن العوام يصغرونها عند النداء كذا في السراجية

الدر المختار وحاشية ابن عابدين (رد المحتار) (6/ 417)

(قوله وجاز التسمية بعلي إلخ) الذي في التتارخانية عن السراجية التسمية باسم يوجد في كتاب الله تعالى كالعلي والكبير والرشيد والبديع جائزة إلخ، ومثله في المنح عنها وظاهره الجواز ولو معرفا بأل.

روح المعاني في تفسير القرآن العظيم والسبع المثاني ، المعروف بتفسير الألوسي (15/ 122)

وتنقسم قسمة أخرى إلى ما لايجوز إطلاقه على غيره سبحانه وتعالى كالله والرحمن وما يجوز كالرحيم والكريم وإلى ما يباح ذكره وحده كأكثرهما وإلى ما لا يباح ذكره كذلك كالمميت والضار فإنه لا يقال : يا مميت يا ضار بل يقال : يا محيي يا مميت ويا نافع يا ضار۔

مذکورہ بالاتفصیل کے  بعد سوال میں  ذکر کردہ  مسئلہ کاجواب  یہ ہے کہ  واحد، اللہ  تعالی  کا صفاتی نا م ہے،  اس  کا استعمال  لفظ اللہ کے ساتھ ملاکر کیاجائے تو  معنی  بنتا  ہے ، کہ اللہ تعالی   یکتا  ہے ، بے  مثل  ہے، اگر واحد  کا  استعمال  لفظ  اللہ کے  بغیر کیاجائے  تو  اس کامعنی  ہے  اکیلا تنہا ،واحد محمود  کا  معنی بنے  گا ،اکیلا قابل تعریف  ۔ خلاصہ  یہ ہے کہ و احد  اللہ تعالی کا صفاتی  نام ہونے کی بناء پر  کسی  بندے  کا نام عبد الواحد  نام  رکھنا  درست  ہے ، اور چونکہ و  احد ایسی صفت خاصہ نہیں ہے  جس کا  استعمال اللہ تعالی کے علاوہ  کسی   دوسرے کے حق  میں جائز نہ ہو ،اس لئے کسی  اور  لفظ  کا  مو صوف  بنا کر  کسی کا نام رکھنا  بھی جائز ہے ،لہذا   واحدمحمود نام  درست  ہے  ،اس کو تبدیل کرنا لازم نہیں  ۔

  احسان اللہ شائق عفا اللہ عنہ    

 دارالافتاء جامعة الرشید     کراچی

۷ ربیع  الثانی ١۴۴۴ھ

واللہ سبحانہ وتعالی اعلم