سوال

مکرمی  جناب مفتی  صا حب  میرا سوال یہ ہے کہ ایک شخص   سرکاری اسکول   میں  ماسٹر ہے ،  وہ خود ڈیوٹی  پر نہیں جاتا ہے اس کی جگہ ایک دوست   ڈیوٹی   ادا کرتا ہے ،  ماسٹر صاحب   آدھی تنخواہ    خود  رکھتا ہے اور   اور آدھی    دوست  کو دیتے ہیں  ،اس   عمل کا   شرعا   کیاحکم  ہے  ،دونوں  کے لئے تنخواہ  حلال ہے یا نہیں  ؟

اَلجَوَابْ بِاسْمِ مُلْہِمِ الصَّوَابْ

واضح رہے کہ  اجرت پر کیاجانے والا کام اگر اس نوعیت کاہو  کہ  کوئی بھی شخص  اس کام کو کرسکتا ہو ، نیز اجرت پر  رکھنے  والے کی   طرف  سے  ممانعت بھی نہ ہو    تو ایسی  صورت  میں  اجیر  کے لئے کسی اور  سے کام کروانا  جائز  ہوتا ہے ،  لیکن اگر  اجرت پر  کیاجانے والا  کا م ایسا  ہو کہ   ہر کوئی اس  کی اہلیت  نہ رکھتا  ہویا اہلیت رکھتاہولیکن  مستاجر کی طرف سے خود کام کرنے اور دوسرے سے کام نہ کرانے کی  شرط ہو  تو اجیر  کے لئے ایسا کام  خود  کرنا  شرعا  ضروری ہوتا  ہے ،اجرت  پر رکھنے  والے  کی صریح  اجازت کے بغیر  اگر  وہ کسی  اور سے اس نوعیت  کاکام کروائے  تو  یہ شرعا  ناجائز  ہے ، ایسی  صورت  میں  وہ اجرت /تنخواہ  کا مستحق نہیں ہوتا۔

اس اصول  کی روشنی  میں    صورت مسئولہ کا حکم  یہ ہے  کہ سرکاری  اسکولوں  میں پڑھانے  کے لئے جن اساتذہ  کا تقرر ہوتا ہے ،ان کے لئے قانونا  خود  ڈیو ٹی  انجام   دینا ضروری  ہوتا ہے ، اور اپنی جگہ  کسی  اور کو  پڑھانے  کے لئے  بھیجنے کی ان کو  قانونا  اجازت نہیں ہوتی   ،اس لئے  سر کاری  اسکولوں  کے  اساتذہ کا اپنی   جگہ  کسی دوسرے  شخص کو  مقرر کرنا  اور  تنخواہ  خود اصول کرنا شرعا ناجائز ہے ، جو تنخواہ  اس طور پر  وصول کی گئی  ہے ، نیز ان سالوں میں  جتنی   تنخواہ  پرا ویڈنٹ   فنڈ میں  شامل ہوئی ہے ، ان سب کو  سرکاری  خزانے میں  جمع کروانا لازم  ہے ۔

دوسرا  بندہ  جس نے  ماسٹر  صاحب   کی  جگہ  دیوٹی  انجام  دی  ہے اس نے  بھی غیر قانونی  کام کیا ہے،  اور گناہ کے کام  میں اسکول  ماسٹر کے ساتھ تعاون کیا  ہے ،لہذا اس پر بھی توبہ استغفار  لازم ہے ،تاہم  تنخواہ  کا حکم یہ ہے کہ   اس  کا چونکہ حکومت سے  کوئی معاہدہ  نہیں  ہوا  اس لئے  حکومت  کے ذمے  کوئی  اجرت لازم  نہیں ہے ، مذکورہ  ماسٹر  صاحب سے اجرت کا  حکم  یہ ہے اگر  دوسرے  شخص کو   معلوم  تھا   کہ یہ سب کچھ  فراڈ ہورہا  ہے  کہ  اس کو قانونی  طور پر اس کام کو انجام  دینے اجازت  نہیں ہے  اس کے  با وجود  وہ کام  کر تا رہا   تب  بھی اجرت کا  حقدار  نہیں ،اگر  اس کو اس فراڈ کا علم نہیں تھا  دھوکے  سے کا م  کرواتا  رہا   تو  ماسٹر کے ذمے اجرت مثل لازم  ہوگا کہ اتنے  دنوں تک کوئی  بندہ  کام  تو  اس  کی عرفا  جو اجرت بنتی  ہے وہ ادا کرے۔

حوالہ جات

{وَتَعَاوَنُوا عَلَى الْبِرِّ وَالتَّقْوَى وَلَا تَعَاوَنُوا عَلَى الْإِثْمِ وَالْعُدْوَانِ وَاتَّقُوا اللَّهَ إِنَّ اللَّهَ شَدِيدُ الْعِقَابِ (2) } [المائدة: 2]

الدر المختار وحاشية ابن عابدين (رد المحتار) (6/ 18)

(وإذا شرط عمله بنفسه) بأن يقول له اعمل بنفسك أو بيدك (لا يستعمل غيره إلا الظئر فلها استعمال غيرها) بشرط وغيره خلاصة (وإن أطلق كان له) أي للأجير أن يستأجر غيره،

 الدر المختار وحاشية ابن عابدين (رد المحتار) (6/ 70)

 وليس للخاص أن يعمل لغيره، ولو عمل نقص من أجرته بقدر ما عمل فتاوى النوازل

قوله ولو عمل نقص من أجرته إلخ) قال في التتارخانية: نجار استؤجر إلى الليل فعمل لآخر دواة بدرهم وهو يعلم فهو آثم، وإن لم يعلم فلا شيء عليه وينقص من أجر النجار بقدر ما عمل في الدواة

الدر المختار وحاشية ابن عابدين (رد المحتار) (4/ 418)

ذكر الخصاف أنه لو أصاب القيم خرس أو عمى أو جنون أو فالج أو نحوه من الآفات، فإن أمكنه الكلام والأمر والنهي والأخذ والإعطاء فله أخذ الأجر، وإلا فلا قال الطرسوسي: ومقتضاه أن المدرس ونحوه إذا أصابه عذر من مرض أو حج بحيث لا يمكنه المباشرة لا يستحق المعلوم لأنه أراد الحكم في المعلوم على نفس المباشرة فإن وجدت استحق المعلوم وإلا فلا وهذا هو الفقه اهـ ملخصا۔

الدر المختار وحاشية ابن عابدين (رد المحتار) (4/ 170)

وفي جامع الفصولين الأصل أن المغرور إنما يرجع على الغار لو حصل الغرور في ضمن المعاوضة أو ضمن الغار صفة السلامة للمغرور فيصار كقول الطحان لرب البر: اجعله في الدلو فجعله فيه، فذهب من النقب إلى الماء، وكان الطحان عالما به يضمن؛ إذ غره في ضمن العقد وهو يقتضي السلامة. اهـ. قلت: لا بد في مسألة التغرير من أن يكون الغار عالما بالخطر كما يدل عليه مسألة الطحان المذكورة، وأن يكون المغرور غير عالم إذ لا شك أن رب البر لو كان عالما بنقب الدلو يكون هو المضيع لماله باختياره، ولفظ المغرور ينبئ عن ذلك لغة لما في القاموس غره غرا وغرورا فهو مغرور وغرير خدعه وأطمعه بالباطل فاغتر هو. اهـ

احسان اللہ شائق عفا اللہ عنہ    

 دارالافتاء جامعة الرشید     کراچی  

١۲ جمادی الاولی ١۴۴۴ھ

واللہ سبحانہ وتعالی اعلم