سوال

1۔ہماری   والدہ کا  انتقال ہوچکا  ہے ، ان  کی ملکیتی   اشیاء کی تقسیم کیسے  ہوگی؟ بعض   ورثاء  کا کہنا  ہے  کہ سونے کے بعض زیورات  کے بارے  میں  والدہ  نے کہا تھا   کہ یہ  میری چھوٹی   بیٹی کو   دیدینا   یا  یہ میری   چھوٹی   بیٹی کی   ہیں ، لیکن وہ  چیزیں  آخر تک والدہ کے پاس ہی رہیں،اور چھوٹی   بہن اس قا بل بھی نہیں   کہ ان کے قبضے   میں  دیاجائے کیونکہ  وہ ذہنی طورپر   کمزور ہے ان چیزوں  کو  سنبھالنے  کی صلاحیت  نہیں ،  اب سوال یہ ہے  کہ وہ چیز یں  اس بیٹی کو   دیدی  جائے  یا سب ورثا  میں تقسیم  کریں ؟

2۔کچھ چیزیں  ایسی  ہیں  کہ اولاد   نے ان کو لاکر دیں  اور   مرحومہ    اپنی  زندگی  میں استعمال  کرتی رہیں ۔ اب  یہ چیزیں    جن لوگوں   نے  لاکر  دیں  تھی   انہی کو واپس کی جائیں  یا  میراث میں تقسیم  کریں ؟

3۔ ترکہ  میں  بعض چیزیں  بالکل  بیکار  ہیں  مثلا  کنگی  ،پرانے کپڑے ،تیل کی بوتل ،پرانی چپل   یا اسی طرح کی اور   دوسری چیزیں ۔ان  چیزوں  کا  کیاحکم  ہے؟۔  گھریلو استعمالی اشیا   ءبرتن   ، پلیٹ  وغیرہ   ان کا   کیاحکم ہے ؟

اَلجَوَابْ بِاسْمِ مُلْہِمِ الصَّوَابْ

1۔اولاد  میں  سے کسی کو کوئی   چیز دینا یہ ھبہ   ﴿ گفٹ ﴾ کہلاتا   ہے  اس کے   لئے صرف  کسی کا   نام کرنا  کافی  نہیں ہوتا  بلکہ     باقاعدہ   مالک بناکر   قبضے میں دینا ضروری  ہے، مسئولہ صورت میں  چونکہ  مذکورہ    زیورات   بیٹی  کو مالک   بناکرقبضے  میں  نہیں  دیئے  تھے  اس لئے  ھبہ درست نہیں ہوا  لہذا  وہ  زیورات  مرحومہ  کی ملک میں  ہی  باقی ہیں ،اس لئے  ترکے میں  شامل ہوکر تمام  ورثاء   میں تقسیم  ہونگے ۔بعض ورثا ء کا   یہ  کہنا  کہ  والدہ  اس بیٹی کے لئے  وصیت  کی  ہے  تو یہ بھی درست نہیں  کیونکہ کسی  وارث کے حق  میں وصیت  کرنا جائز   نہیں اس لئے  یہ وصیت  نافذ  نہیں  ہوگی، البتہ وصیت کی صورت میں   اگرماں   کے انتقال   کے بعد بقیہ تمام بالغ    ورثا   اپنی  خوشی  سے ماں  کی وصیت پر  عمل کریں   تو   وصیت  نافذ ہوگی اور زیورات  چھوٹی   بیٹی  کو مل جائیں  گے ۔

2۔جن اولاد   نے ماں  کو  کوئی چیز لاکر دی  اور عاریت  کی  صراحت  نہیں   تو  وہ  چیزیں   والد ہ کی  ملک ہیں  ان میں  وراثت جاری  نہیں  ہوگی ۔

3۔ میت کے ترکہ  میں موجود  نئی پرانی  تمام چیزیں  ورثا ء میں  تقسیم ہونگی  ،کسی چیز  کو بیکار   کہکر  ضائع  نہیں  کیاجائے گا ۔

اس تفصیل کے بعد مسئلہ کاحکم  یہ ہے کہ  مرحومہ  کے انتقال  کے وقت  ان کی  ملک میں  منقولہ غیر  منقولہ جائداد ، سونا  چاندی ،نقدی  اور چھوٹا بڑا  سامان حتی  کہ سوئی  دھاگہ   جو کچھ تھا  سب  مرحوم  کےترکہ میں  شامل ہیں  ،  ان کی  مملوکہ سب چیزوں  کی قیمت  لگا کر اس میں  میں سے کفن دفن کا  خرچہ نکالنے کے بعد اگر  مرحومہ کے ذمہ کسی کا قرض  ہو  تو اس کو ادا  کیاجائے ،اس کے بعداگر کوئی  جائز وصیت کی ہو تہائی مال کی حد تک  وصیت نافذ  کی جائے ۔اس کے  بعد  مال  کو  ورثاء  کے درمیان  شرعی  اصول کے مطابق  تقسیم کیاجائے ۔

حوالہ جات

الدر المختار وحاشية ابن عابدين (رد المحتار) (6/ 655)

(ولا لوارثه وقاتله مباشرة)لا تسبيبا كما مر (إلا بإجازة ورثته) لقوله - عليه الصلاة والسلام - «لا وصية لوارث إلا أن يجيزها الورثة» يعني عند وجود وارث آخر كما يفيده آخر الحديث وسنحققه (وهم كبار) عقلاء فلم تجز إجازة صغير ومجنون وإجازة المريض كابتداء وصية ولو أجاز البعض ورد البعض جاز على المجيز بقدر حصته

  احسان اللہ شائق عفا اللہ عنہ    

دارالافتاء جامعة الرشید     کراچی

۳جمادی الثانی  ١۴۴۴ھ

واللہ سبحانہ وتعالی اعلم