سوال

ہمارے  ہاں یہ عرف  بن چکا ہے  کہ اگر والد اور اولاد   اسی طرح  بھائی  وغیرہ   اکٹھی  رہائش رکھتے  ہوں  تو  حاصل شدہ  کمائی  سب کی مشترکہ سمجھی جاتی  ہے ،چاہے  سب  نے کمایا ہو یا بعض  نے  جبکہ  شرعا   کمائی  اور  سرمایہ  کا اعتبار  ہوتا ہے  ؟ ایک  مفتی صاحب کا کہنا ہے کہ   ہمارے  سرحد  ﴿ کے ،پی ،کے﴾میں   خاندانی  شراکت   یہ عرفی  شراکت  ہے ،لہذا بھائیوں کی مشترکہ کمائی   آپس  میں برابر   تقسیم ہوگی  ۔

اَلجَوَابْ بِاسْمِ مُلْہِمِ الصَّوَابْ

مال کے بارے میں  شریعت  کا  اصول  یہ  ہے کہ ہر شخص کی  ملکیت  میں  جو مال  ہوتا  ہے  چاہے  اس کو  وراثت  ،ھبہ وغیرہ  کسی ذریعہ  سے حاصل ہوا  ہو   یا  اس  نے   اپنی  محنت  سے کمایا   ہو تو وہ شخص  اپنے  مال کاخود  مالک  ہے  ،اس میں  کسی اور کا  حصہ  نہیں  ہوتا  ۔ نہ والد  ین  کا نہ  اولاد  کا  نہ بھائی   بہنوں کا ۔

ایک گھر میں مشترکہ کمائی جمع ہونے   کی  مختلف  صورتیں  ہوتی ہیں ،شرعا  ہرصورت کا  حکم الگ  ہوتا  ہے ،عام طور پر پیش آنے  والی  چند  صورتوں  کا حکم   لکھا جارہا  ہے ان کے علاوہ  کوئی  صورت  ہو تواس کا  حکم الگ سے معلوم کیاجاسکتا  ہے ۔

1۔کسی گھر میں  اگر باپ بیٹے  ساتھ رہتے  ہوں  اور  باپ  نے کوئی ذریعہ  معاش  ﴿دکان  ،فیکٹری وغیرہ   ﴾اختیار  کیا  بعد  میں اس میں  اولاد شریک  ہوگئی اس طرح  سب نے  ملکر   مال  کو  بڑھایا  اور  کھانا  پینا  ساتھ ہی رہا   ،ایسی صورت میں  مال  سارا باپ کا شمار ہوتا ہے ۔اگرشادی کے  بعد اولاد  کا کھانا  پینا الگ ہوجائے لیکن   وہ  باپ کے ساتھ  کام  کرتے رہیں  تو  ایسے  میں شرعا  بہتر  یہ ہے کہ مشترکہ مال میں ہرایک کی  حیثیت   متعین  کردی جائے ،لیکن   اگر ایسا نہیں کیا   تواس مال میں سے والد کے  ساتھ کام کرنے والی اولاد  کو اجرت  مثل ملے گی اور  باقی  مال والد  کا شمار ہوگا ۔

2۔ باپ  بیٹے  ساتھ رہتے  ہو ں اور کمائی کا ذریعہ  سب کا  الگ  الگ ہوتوایسی  صورت  کا حکم یہ ہے کہ اولاد  اگر  مال کماکر والد کو  ھبہ کریں   تو   والد   مال کا مالک  ہوجاتا  ہے  ۔باپ کے انتقال کی  صورت میں  میراث  کے طور پر   تقسیم ہوگا بعد  میں کسی کو  الگ سے حصے کا   مطالبہ کرنے  کاحق نہیں ہوتا  ہے۔ اور اگراولاد نے  مال کماکر اپنے   باپ  کو  قرض کہکر دیا   تو  واپس لینے کاحق  ہوگا بشرطیکہ  اس پر گواہ یا تحریر  موجود ہو کہ  بیٹے  نے یہ مال  باپ کو  قرض کے  طورپر  دیا  تھا ۔

3۔  باپ  کا  کوئی  ذریعہ معاش  تھا  ﴿ زرعی زمین ،دکان وغیرہ ﴾ باپ  کے انتقال کے بعد   بچوں  نے میراث  تقسیم نہیں  کیا  مشترکہ  طور پر  اس مال کو بڑھایا   تو  یہ تمام ورثاء کا مشترکہ  مال  شمار  ہوگا  میراث کے اصول کے مطابق   تقسیم ہوگا ۔

یہی حکم  باپ کے شروع  کئے ہوئے  کاروبار  کو  باپ کے انتقال کے بعد  جاری رکھنے کا بھی  ہے ۔

4۔باپ بیٹے  ایک گھر  میں  رہائش پذیر  ہیں  باپ بھی  کماتا رہا  اور بعض بالغ  بیٹے   بھی لیکن   پیسے  باپ  کے حوالے کرتے رہےاور  اس  طرح  مشترکہ  طورپر  کماتے کھاتے رہے مشترکہ رقم سے  باپ  نے کچھ جائدادیں  بھی خریدیں  لیکن  الگ ملکیت  کا  تصور نہیں  تھا  ،اور اس میں  بعض بچے چھوٹے  بھی تھے ۔ایسی صورت میں  بھی  سارا مال  باپ کا  شمار ہوگا ۔

5۔باپ  کا  کوئی  مستقل  ذریعہ معاش  نہیں  تھا  وہ خود بھی کام  کرتا  رہا اوربالغ  بچے بھی الگ کماتے رہے  بچےکچھ پیسے  گھر میں خرچ  کے  دیتے اور  کچھ  پیسوں سے الگ  جائدا  خریدی  تو ایسی صورت میں اولاد کی ذاتی   جائداد  باپ کی میراث میں شامل نہیں ہوگی ۔

حوالہ جات

الدر المختار وحاشية ابن عابدين (رد المحتار) (4/ 325)

وما حصله أحدهما فله وما حصلاه معا فلهما) نصفين إن لم يعلم ما لكل (وما حصله أحدهما بإعانة صاحبه فله ولصاحبه أجر مثله بالغا ما بلغ عند محمد. وعند أبي يوسف لا يجاوز به نصف ثمن ذلك)

مطلب: اجتمعا في دار واحدة واكتسبا ولا يعلم التفاوت فهو بينهما بالسوية [تنبيه] يؤخذ من هذا ما أفتى به في الخيرية في زوج امرأة وابنها اجتمعا في دار واحدة وأخذ كل منهما يكتسب على حدة ويجمعان كسبهما ولا يعلم التفاوت ولا التساوي ولا التمييز.

فأجاب بأنه بينهما سوية، وكذا لو اجتمع إخوة يعملون في تركة أبيهم ونما المال فهو بينهم سوية، ولو اختلفوا في العمل والرأي اهـ وقدمنا أن هذا ليس شركة مفاوضة ما لم يصرحا بلفظها أو بمقتضياتها مع استيفاء شروطها، ثم هذا في غير الابن مع أبيه؛ لما في القنية الأب وابنه يكتسبان في صنعة واحدة ولم يكن لهما شيء فالكسب كله للأب إن كان الابن في عياله لكونه معينا له ألا ترى لو غرس شجرة تكون للأب ثم ذكر خلافا في المرأة مع زوجها إذا اجتمع بعملهما أموال كثيرة، فقيل هي للزوج وتكون المرأة معينة له، إلا إذا كان لها كسب على حدة فهو لها، وقيل بينهما نصفان.

وفي الخانية: زوج بنيه الخمسة في داره وكلهم في عياله واختلفوا في المتاع فهو للأب وللبنين الثياب التي عليهم لا غير، فإن قالوا هم أو امرأته بعد موته: إن هذا استفدناه بعد موته فالقول لهم، وإن أقروا أنه كان يوم موته فهو ميراث من الأب.

احسان اللہ شائق عفا اللہ عنہ    

دارالافتاء جامعة الرشید     کراچی

۸جمادی  الثانیہ  ١۴۴۴ھ

واللہ سبحانہ وتعالی اعلم