سوال

عرض یہ ہے کہ میں نے  اپنی بیوی کو تقریبا   چھ سال قبل پہلی طلاق دی ، پھر دوماہ  کے اندر رجوع کرلیا ، اس کے بعد  تقریبا تین  سال قبل  دوسری  طلاق صریح    الفاظ  میں  دی ،بیوی اس وقت  سے اب تک   چار بچوں  کے ساتھ  اپنے والدین  کے گھر رہ   رہی ہے ۔ ان دونوں  طلا قوں  کے دوران    ایک واقعہ  یہ پیش آیا  کہ میں  نے  بیوی سے  کہا   کہ   اگر میری اجازت کے بغیر   تمہارے  گھر والے  میرے گھر آئے تو تمہیں  دوسری طلاق ہوجائے گی ،اس کے چند دن کے بعد  میں دفتر میں   تھا   بیوی  کا فون آیا کہ    میرے  گھر والے  آرہے ہیں ،  تو  میں  نے آنے  کی اجازت دیدی    ،اس کے بعد جب میں گھر لوٹا    تو بیوی اس  پر بات کررہی  تھی ،میں نے کہاکہ  پریشان  مت ہو   میں   نے  بلا اجازت  آنے سے منع کیا   تھا   اب تو اجازت لیکر آئے   اس سے  کوئی طلاق واقع نہیں ہوئی ۔

دوسری طلاق   کے بعد   میرے سسرال  والوں نے   مجھے اطلاع   دئے   بغیر کورٹ  سے اپنے  طور پر خلع کی ڈگر ی بھی  حاصل کی ہے ۔اب میں  اپنی  بیوی  بچے  واپس لینا چاہتا ہوں ، اس کی  کیا  صورت ہوگی ؟

اَلجَوَابْ بِاسْمِ مُلْہِمِ الصَّوَابْ

  واضح  ہوکہ  مفتی  کو غیب کا  علم نہیں ہوتا   بلکہ  سوال کی تحریر  کے  مطابق  ہی جواب لکھا جاتا   ہے  ، مفتی  کے لکھنے سے   حلال  حرام  نہیں  ہوتا  اور  حرام حلال  نہیں  ہوتا ،اس لئے سوال  کی صحت کی  تما م ترذمے داری سائل پر   عائد ہوتی  ہے ۔

اس وضاحت کے  بعدسوال  میں مذکور  جن  دوطلاقوں کا  سائل کو اقرار  ہے  وہ تو واقع ہوچکی  ہیں ،اور عدت بھی ختم ہوگئی ، اورطلاق  کی عدت  پوری  ہونے کے  ساتھ  دونوں کا نکاح بھی   ختم ہوگیا ۔

ان  دو  کے طلاق  کے علاوہ  تیسری  معلق   طلاق کاحکم یہ ہے کہ   اگر  واقعی   شوہر کی ا جازت  کے ساتھ معلق تھی اور  پھر  بیوی  کے گھروالے  شوہرکی  اجازت  کے بعد ہی  شوہر  کے گھرآئےہیں  ، تو  ایسی  صورت میں  یہ معلق طلاق واقع نہیں ہوئی ،   خاتون  کے گھر والوں نے  جو خلع کی ڈگری  حاصل  کی  ہے اگر عدالت  نے خلع  ہی کی ڈگری دی  ہے،اور  اس میں  شوہرکی رضامندی  شامل نہیں  تھی توخلع  کی اس عدالتی  ڈگری  سے  کوئی نئی  طلاق  واقع  نہیں ہوئی ،﴿ لیکن یاد رہے کہ اگر  شوہر کی تعنت اور نا ن نفقہ نہ دینے اور بچوں کی خبر گیری نہ کرنے  کی بنیاد پر عدالت  میں  درخواست دی گئی  ہے، اورعدالت نے معاملہ کی پوری تحقیق کرکے اور شوہر کو نوٹس بھی جاری کی ہو  اور  شوہر عدالت میں  حاضر نہیں ہوا  اس  پر عدالت نے   خلع کے نام سے  فسخ نکاح کی ڈگری جاری کی  توایسی صورت  میں  اس ڈگرٰ ی  سے خاتون پر  مزید ایک طلاق شمار  ہوگی،اور  عورت تین طلاقوں کے ساتھ اپنے شوہر پر حرام ہوجائےگی﴾، لہذا  مسئولہ صورت میں اگر دوہی طلاق واقع ہوئی  ہوں  توعورت  کو  اختیارحاصل   ہے  کہ سابق  شوہر کے علاوہ  کسی اور   سے  نکاح  کرے، یا  اپنے سابق   شوہر  سے  نئے  مہر کے ساتھ   نکاح کرے۔اگر  تین طلاقیں  واقع ہوئی ہیں  تو حلالہ شرعیہ کے بغیر  پہلے  شوہر سے نکاح نہیں  ہوسکتا ۔

حوالہ جات

الدر المختار وحاشية ابن عابدين (رد المحتار) (3/ 444)

(و) الخلع (هو من الكنايات فيعتبر فيه ما يعتبر فيها) من قرائن الطلاق، لكن لو قضي بكونه فسخا نفذ لأنه مجتهد فيه،

قوله: والخلع من الكنايات) لأنه يحتمل الانخلاع عن اللباس، أو الخيرات، أو عن النكاح عناية، ومثله المبارأة (قوله: فيعتبر فيه ما يعتبر فيها) ويقع به تطليقة بائنة إلا إن نوى ثلاثا فتكون ثلاثا، وإن نوى ثنتين كانت واحدة بائنة كما في الحاكم (قوله: من قرائن الطلاق) كمذاكرة الطلاق وسؤالها له. وفي الدر المنتقى: وتسمية المال وإن لم يكن متقوما من القرائن. اهـ. ط (قوله: لو قضي بكونه فسخا) أي كما هو قول الحنابلة إنه لا يقع به طلاق بل هو فسخ لا ينقص العدد بشرط عدم نية الطلاق بحر.

الدر المختار وحاشية ابن عابدين (رد المحتار) (3/ 465)

 والحاصل أنه لا وجه لإيجاب البدل على الزوج لأن الخلع عقد معاوضة من جهتها فإنها تملك نفسها بما تدفعه له، ولذا كان الطلاق على مال بائنا،

الدر المختار وحاشية ابن عابدين (رد المحتار) (3/ 758)

(لا تخرجي) بغير إذني أو (إلا بإذني) أو بأمري أو بعلمي أو برضاي (شرط) للبر (لكل خروج إذن) إلا لغرق أو حرق أو فرقة ولو نوى الإذن مرة دين وتنحل يمينه بخروجها مرة بلا إذن،

احسان اللہ شائق عفا اللہ عنہ    

       دارالافتاء جامعة الرشید     کراچی

۲رجب  ١۴۴۴ھ

واللہ سبحانہ وتعالی اعلم