78385

وقف کے مسائل

قبرستان کے مسائل

سوال

ہمارے  علاقہ  میں مسجد  کی اشد ضرورت تھی  ، کیونکہ مسلک  اہل حق   کی  کوئی  مسجد قریب میں  نہیں تھی ، توسب نے ملکر   میزنائن  کی فلور میں مسجد تعمیر کروائی ،ا س کی صورت حال کچھ اسطرح ہے کہ  نیچے ماکیٹ ہے ،اس کے  اوپر مسجد ہے ،اور  مسجد کے اوپر فلیٹ بنے ہوئے  ہیں ،جس میں  لوگوں کی  رہائش ہے ،اس مسجد میں  پانچ وقت  کی نماز   باجماعت ہوتی  ہے ،اور جمعہ بھی ادا   کیاجاتا ہے ،باقاعدہ  امام ومؤذن   کی تقرری  بھی ہوئی  ہے ،مسجد  کی باقاعدہ  کمیٹی  بھی  بنی ہوئی ہے ، مسجد  کے اندر منبر   ومحراب   ہر چیز  موجود  ہے ۔ آپ سے چند سوالات کے جوابات مطلوب  ہیں ۔

1۔کیا یہ  شرعی مسجد کے حکم  میں داخل  ہے؟

2۔اس  مسجد میں  تحیة  المسجد  پڑھنے  سے اجر ملےگا  یانہیں ؟

3۔اس  مسجد   میں  اعتکا  ف مسنون کا  کیاحکم  ہے ؟ اعتکاف   صحیح  ہوگا  اجر  ملے  گا  یانہیں ؟

اَلجَوَابْ بِاسْمِ مُلْہِمِ الصَّوَابْ

1۔فقہ  حنفی  کی  ظاہر الروایہ کے مطابق شرعی  مسجد ہونے  کے لئے  ضروری ہے  کہ   وہ  جگہ مسجد کے  لئے  وقف  ہو  ، زمین کے نیچے سےلیکر آسمان  تک ،خالص  اللہ کے لئے  کردی  جائے،اوپر نیچے اس پوری زمین میں  کسی اور  کی  ملکیت باقی  نہ  رہے ،البتہ علامہ  رافعی رحمہ اللہ   نے   اس میں مزید تعمیم    فرمائی کہ   اگر  علو یا سفل مصالح  مسجد  کے لئے وقف    نہیں لیکن مسلمانوں کے عام مصالح  کے لئے  مختص ہیں ،کسی کی ذاتی ملکیت نہیں   تو  بھی یہ مسجد شرعی    ہونے   سے مانع نہیں ۔ 

   امام ابویوسف اور   امام   محمد  رحمہ اللہ   کی رائے  یہ  ہے  کہ جن  مقامات  پر کثیر  المنزلہ    عمارتیں ہیں  جن میں    مسجد کےلئے  مستقل  جگہ  ملنا  مشکل ہوتا ہے ،ان  میں  اگر کوئی  منزل  مسجد کے  لئے وقف   ہو  اوراوپر   اور  نیچےدونوں  مسکن یعنی   رہائشی ہیں،تو  بھی   وقف  شدہ منزل  کے مسجد ہونےسے  مانع نہیں ۔

نیز  ائمہ   ثلاثہ  حضرت   امام  مالک  ،امام  شافعی  اور امام حمد  بن حنبل رحمہم اللہ   کے نزدیک مسجد شرعی  ہونے کے لئے  ضروری نہیں   کہ  اوپر اور نیچے  کی منزلیں مسجد ہوں  یا مصالح  مسجد  میں مشغول ہوں  بلکہ اگر درمیانی  منزل  مسجد  کے لئے  وقف  ہو    اوپر  اور نیچے دونوں منزلیں     یا  ان   میں سے  کوئی ایک   ذاتی  ملکیت میں   مشغول ہے   تو   یہ مسجد شرعی ہونے سے مانع نہیں ۔

موجودہ  دور میں آبادی  کے اضافے  اور زمین کے مہنگے   ہونے کی وجہ  سے  کثیر  المنزلہ   رہائشی   عمارات    اور  خریداری کے مراکز   کا رجحان  بڑھتا   جارہا ہے ،ان کثیر  المنزلہ  عمارات  میں  عام طور پر   نماز کے  لئے مناسب جگہ مخصوص  تو کی جاتی ہے  لیکن یہ ممکن نہیں ہوتا   کہ کسی  جگہ  کو اس طرح   وقف کرکے مسجد بنادیا جائے کہ اس کےاوپر  اورنیچے  بھی یا  تو مسجد ہو     یا مصالح  مسجد  کے لئے  وقف ہو  یا مسلمانوں کی اجتماعی  ضرورت کے  لئے وقف   ہو ۔ ایسی تنگی   کی   صورت میں     ضرورت   کے  پیش  نظر درج ذیل شرئط  کا  لحاظ کرتے ہوئے  حضرات  صاحبین   سے  منقول   روایات کے مطابق  یہ گنجائش معلوم ہوتی ہے  کہ  اگر   کثیر  المنزلہ   عمارت میں  ایک منزل   یا مخصوص حصہ   مسجد کے لئے وقف کردیاجائے ،اس مسجدکا بالائی  ا و ر نچلا  حصہ  یا ان میں سے کوئی ایک   وقف نہ ہو   تو اسے مسجد شرعی قرار  دیا جاسکتا   ہے ۔ تا ہم اس   کا  خیال رکھنا   ضروری ہے  کہ  مسلم  ممالک  جہاں   مستقل مسا  جد بکثرت   پائی جاتی ہیں ،اور یہ مسلم ممالک    کا شعار   بھی ہیں  ،انہیں  قائم کرنے  اور ان میں   باجماعت نماز کا   اہتمام  کرنے میں کوئی  کوتاہی نہیں  ہونی چاہئے ۔اور   یہ گنجائش بوقت   ضرورت ہی استعمال  کی جائے کہ جہاں  قریب میں    مستقل مسجد موجود    نہ ہو  یا کثیر   المنزلہ   عمارت   سے  اترنے   چڑھنے  میں  دشواری ہو  وہاں  اس طرح  کی   مسجد قائم کرلیجائے ۔

غیرمسلم ممالک  جہاں مستقل مساجد  بہت کم اور کافی فاصلے پر ہوتی ہیں ،وہاں اس گنجائش سے   بسہولت استفادہ   کیاجاسکتا ہے۔

شرائط  یہ  ہیں ؛

1۔ کثیر   المنزلہ    عمارت میں   جوجگہ   مخصوص    کی جارہی  ہے  وہ مسجد کے لئے   وقف کی جائے ۔

2۔ یہ  گنجائش  ایسے مقامات میں   ہوگی  جہاں   اوپراور نیچے کی  منزل کو   وقف کرنے  میں دشواری  ہو  جیسے  کثیر  المنزلہ   عمارت   وغیرہ ۔

3۔  سب  سے پہلے یہ کوشش  کی جائے     کہ  کسی بھی کثیر  المنزلہ    عمارت کے ساتھ ،جیسے پارکنگ بنائی جاتی ہے ،اسی طرح اس کی   سطح   زمین پر   مسجد شرعی بنائی جائے ،اور   قانونی مالک    پر لازم ہوکہ    وہ مسجد بنائے  ،اور متعلقہ محکمے   اس کے بغیر نقشہ منظور نہ کریں ۔

4۔  جو حصہ مسجد کے لئے   وقف کیاجارہا ہے  اس کی مسجدیت  کو قانونی تحفظ دیاجائے ،تاکہ مستقبل میں    کوئی اس جگہ کو   مسجد کے علاوہ    کام اور مقصد میں     استعمال نہ کر سکے ۔

5۔ قانونی کاغذات  میں  اس کی وضاحت  ہونی چاہئے   کہ اس کی خرید وفرخت   ممکن نہیں  ہوگی ،آیندہ اگر پوری   بلڈنگ  بیچی جائے  تو بیع میں   مسجد شامل  نہیں   ہوگی ،اور نہ اس کا   کوئی معاوضہ لیاجائے گا ،بلکہ  وہ حسب سابق   مسجد ہی رہے گی ، مالک یہ صراحت کرکے بلڈنگ بیچے   کہ   مسجد کے  لئے وقف جگہ   بیع میں   شامل نہیں ۔

6۔ اور اگر کبھی   عمارت  منہد م ہوجائے ، تو  جو حق زمین میں   دیگر   فلیٹس   اور دکانوں   کے مالکان   کو ملے گا وہ مسجد کو بھی ملے گا  اور دوبارہ تعمیر کی صورت میں  مسجد کی جگہ حسب سابق   مسجد رہے گی ،یا  اگر حکومت  کسی جائز وجہ سے  عمارت کو منہدم کردے  تو جسطرح دیگر  مالکان  کو   معاوضہ دے گی  اسی طرح اس مسجد کو بھی  معاوضہ ملے گا ۔اور جو معاوضہ ملے گا  اس سے  اگر کہیں  اور مسجد بنائی  جاسکتی ہو تو مسجد بنائی جائے گی ورنہ امام  ابویوسف   رحمہ اللہ   کے قول  ثانی کے  مطابق   کسی قریب ترین   مسجد میں رقم لگائی جائے گی ۔

     لہذا  سوال میں  ذکر کردہ  مسجد  کو  ظاہر   الروایہ   کے مطابق   تو شرعی  مسجد  نہیں  کہاجائے گا ۔ کیونکہ   اس کے اوپر نیچے   رہائشی  مکانات ہیں ،  اس کو   مصلی یاجائے نماز کہاجائے گا  ۔  اورمصلی /جائے نمازکاحکم  یہ  ہے کہ  بوقت ضرورت اس میں نماز جائز ہے ، اور جماعت  کا اجر  ملے گا   لیکن مسجد کا  نہیں  ، اوراس مصلی   کا احترام   بھی مسجد کی  طرح لازم ہے۔

البتہ اگر میزنائن فلور کی   یہ  جگہ  مندرجہ بالا   شرائط  کے  مطابق   مسجد کے لئے   مستقل وقف کردی  جائے   تو صاحبین   اور ائمہ    ثلاثہ    کی رائے   کےمطابق اس جگہ  کو    شرعی  مسجد کے  حکم  میں داخل  کرکے  اس  پر  مسجد  کے  تمام   احکام جاری  کئے جاسکتے  ہیں

لہذ ااہل  محلہ  کو  چاہئے اس  محلہ کے اندر کوئی زمین  حاصل  کرکے  باقاعدہ   شرعی اور قانونی   مسجد بنانے  کی  کو شش کریں  ۔ اگر  اس کی  کوئی صورت نہیں  بن رہی ہو   تو میز  نائن  فلور   کی اسی  منزل  کو   مندرجہ   بالا  شرائط  کے  مطابق وقف  کرکے  شرعی   مسجد   بنالیں ۔ اس  طرح  شرائط   کے ساتھ   با قاعدہ    وقف  ہونے  کے  بعد   اس پر  مسجد  کے  تمام  احکام  جاری    ہونگے ۔  کہ اس میں  پانچوں وقت  کی  نماز باجماعت اداکرنے  اور  جمعہ  پڑھنے  سے دیگر  شرعی    مساجد   کی  طرح  پورا   اجر  بھی  ملے گا ۔ اور اس میں   تحیة  المسجد  پڑھنے  سے تحیة  المسجد کا  اجر  بھی ملے گا ۔ اور اسی  طرح  اس  میں  اعتکاف  مسنون  بھی  جائز  ہوگا۔

اور  جب  تک  شرائط  کے مطابق  وقف  نہ ہو   تو  یہ  مصلی ہی   رہے گا  ،ایسی صورت میں  مصلی کے  مذکورہ بالا  حکم پر عمل  کیاجائے گا۔

حوالہ جات

الدر المختار وحاشية ابن عابدين (رد المحتار) (4/ 355)

(ويزول ملكه عن المسجد والمصلى) بالفعل و (بقوله جعلته مسجدا) عند الثاني (وشرط محمد) والإمام (الصلاة فيه)

 (قوله: والمصلى) شمل مصلى الجنازة ومصلى العيد قال بعضهم: يكون مسجدا حتى إذا مات لا يورث عنه وقال بعضهم: هذا في مصلى الجنازة، أما مصلى العيد لا يكون مسجدا مطلقا، وإنما يعطى له حكم المسجد في صحة الاقتداء بالإمام، وإن كان منفصلا عن الصفوف وفيما سوى ذلك فليس له حكم المسجد، وقال بعضهم: يكون مسجدا حال أداء الصلاة لا غير وهو والجبانة سواء، ويجنب هذا المكان عما يجنب عنه المساجد احتياطا. اهـ.

الهداية في شرح بداية المبتدي (3/ 20)

قال: "ومن جعل مسجدا تحته سرداب أو فوقه بيت وجعل باب المسجد إلى الطريق، وعزله عن ملكه فله أن يبيعه، وإن مات يورث عنه" لأنه لم يخلص لله تعالى لبقاء حق العبد متعلقا به، ولو كان السرداب لمصالح المسجد جاز كما في مسجد بيت المقدس. وروى الحسن عنه أنه قال: إذا جعل السفل مسجدا وعلى ظهره مسكن فهو مسجد؛ لأن المسجد مما يتأبد، وذلك يتحقق في السفل دون العلو. وعن محمد على عكس هذا؛ لأن المسجد معظم، وإذا كان فوقه مسكن أو مستغل يتعذر تعظيمه. وعن أبي يوسف أنه جوز في الوجهين حين قدم بغداد ورأى ضيق المنازل فكأنه اعتبر الضرورة. وعن محمد أنه حين دخل الري أجاز ذلك كله لما قلنا.

قال: "وكذلك إن اتخذ وسط داره مسجدا وأذن للناس بالدخول فيه" يعني له أن يبيعه ويورث عنه؛ لأن المسجد ما لا يكون لأحد فيه حق المنع، وإذا كان ملكه محيطا بجوانبه كان له حق المنع فلم يصر مسجدا، ولأنه أبقى الطريق لنفسه فلم يخلص لله تعالى "وعن محمد أنه لا يباع ولا يورث ولا يوهب" اعتبره مسجدا، وهكذا عن أبي يوسف أنه يصير مسجدا؛ لأنه لما رضي بكونه مسجدا ولا يصير مسجدا إلا بالطريق دخل فيه الطريق وصار مستحقا كما يدخل في الإجارة من غير ذكر.

المبسوط للسرخسي (12/ 94)

ال: (وإن بنى على منزله مسجدا، وسكن أسفله، أو جعله سردابا، ثم مات: فهو ميراث). وكذلك إن جعل أسفله مسجدا، وفوقه مسكنا؛ لأن المسجد ما يحرز أصله عن ملك العباد، وانتفاعهم به على قياس المسجد الحرام، وذلك غير موجود فيما اتخذه - حين استثنى العلو أو السفل لمنفعة نفسه -. وعن محمد قال: إن جعل السفل مسجدا: جاز، وإن جعل العلو مسجدا دون السفل: لا يجوز؛ لأن المسجد ما له قرار، وتأبيد في السفل دون العلو. وعن الحسن بن زياد - رحمه الله - أنه إذا دخل العلو مسجدا، والسفل مستغلا للمسجد فهذا يجوز - استحسانا -. وعن أبي يوسف أن ذلك كله جائز، رجع إليه حين قدم بغداد، ورأى ضيق المنازل بأهلها فجوز أن يجعل العلو مسجدا دون السفل والسفل دون العلو، وهو مستقيم على أصله، وقد بينا أنه يوسع في الوقف فكذلك في المسجد.

الدر المختار وحاشية ابن عابدين (رد المحتار) (4/ 357)

وإذا جعل تحته سردابا لمصالحه) أي المسجد (جاز) كمسجد القدس (ولو جعل لغيرها أو) جعل (فوقه بيتا وجعل باب المسجد إلى طريق وعزله عن ملكه لا) يكون مسجدا(وله بيعه ويورث عنه) خلافا لهما

 (كما لو جعل وسط داره مسجدا وأذن للصلاة فيه) حيث لا يكون مسجدا إلا إذا شرط الطريق زيلعي. .

الدر المختار وحاشية ابن عابدين (رد المحتار) (4/ 357)

قوله: وإذا جعل تحته سردابا) جمعه سراديب، بيت يتخذ تحت الأرض لغرض تبريد الماء وغيره كذا في الفتح وشرط في المصباح أن يكون ضيقا نهر (قوله أو جعل فوقه بيتا إلخ) ظاهره أنه لا فرق بين أن يكون البيت للمسجد أو لا إلا أنه يؤخذ من التعليل أن محل عدم كونه مسجدا فيما إذا لم يكن وقفا على مصالح المسجد وبه صرح في الإسعاف فقال: وإذا كان السرداب أو العلو لمصالح المسجد أو كانا وقفا عليه صار مسجدا. اهـ. شرنبلالية.

قال في البحر: وحاصله أن شرط كونه مسجدا أن يكون سفله وعلوه مسجدا لينقطع حق العبد عنه لقوله تعالى {وأن المساجد لله} [الجن: 18]- بخلاف ما إذا كان السرداب والعلو موقوفا لمصالح المسجد، فهو كسرداب بيت المقدس هذا هو ظاهر الرواية وهناك روايات ضعيفة مذكورة في الهداية. اهـ. .

المحيط البرهاني في الفقه النعماني (6/ 207)

 وعن أبي يوسف أنه أجاز أن يكون الأسفل مسجداً والأعلى ملكاً؛ لأن الأسفل أصل عن محمد أنه حين دخل الري ورأى ضيق الأمكنة جوز ذلك.

احسان اللہ شائق عفا اللہ عنہ    

 دارالافتاء جامعة الرشید     کراچی

۲ جمادی  الاولی  ١۴۴۴ھ

واللہ سبحانہ وتعالی اعلم

مجیب

احسان اللہ شائق

مفتیان

سیّد عابد شاہ صاحب / محمد حسین خلیل خیل صاحب