سوال

میری  بہن  اوربہنوئی  کئی سال  پہلے  اپنی بیٹی کے ساتھ کینیڈا  میں  رہائش پذیر   تھے ،بہن کی   بیٹی چھوٹی تھی ، اس کو   حکومت  کینیڈا  کی طرف سے  وظیفہ  ملتا تھا ،یہ   وظیفہ ماں  کے اکاؤنٹ   میں جمع ہوجایا کرتا تھا ،ماںباپ   دونوں  اس  پیسے کو بچی کی  امانت سمجھ کر   جمع کرتے رہے ،اس کو   خرچ نہیں کیا  ۔یہ سلسلہ  تین چار سال تک چلتا   رہا ،جب کا ی رقم کافی جمع ہوگئی  تو انہوں  نے پاکستان کےایک  بینک  میں قومی بچت اکاؤنٹ میں   جمع کروا دیا ،اب وہ رقم بمع منافع   کافی بڑھ  گئی ہے ، اور   بچی بھی سولہ سال کی عمر میں  ہے ،  مندرجہ ذیل سوالات   کے جوابات مطلوب ہیں ۔

1۔ کیا  اس رقم  پر زکوة واجب ہوگی؟ کیونکہ   سنا  ہے کہ نابالغ کے مال  پر زکوة  واجب نہیں ہوتی  ہے۔

2۔  زکوة اصل  رقم پر ہوگی   یا بینک  کے  منافع  پر  بھی ؟

3۔اگر زکوة   واجب ہو  تو   بچی کی   عمر کے لحاظ سے ہوگی  یا  نصاب  پر؟

اَلجَوَابْ بِاسْمِ مُلْہِمِ الصَّوَابْ

پہلے  چند باتیں   بطور تمہید  کے  سمجھ  لی جائیں 1۔  اگر  نا بالغ  کی  ملک میں بقدر نصاب  یا اس  سے زیا دہ  مال ہو تو   بالغ ہونے تک  اس پر زکوة  فرض  نہیں  ہوتی ہے 2۔ اگر بچہ بالغ  ہوجائے ﴿یعنی بارہ  سال عمر  ہوجانے بعد  اس کوا حتلام  ہوجائے ،یاقمری  لحاظ  سے پندرہ  سال کا ہوجائے ﴾  تو اس  وقت اس کی ملک  ملکیت  میں موجود قابل زکوة   اموال  پر زکوة لازم ہوجاتی ہے ،اور بلوغت کے دن کے بعدایک سال ﴿یعنی  قمری سال﴾ گزرنے کے بعد زکوة کی ادائیگی  لازم ہوجاتی ہے ، 3۔مروجہ بینکوں  میں قومی بچت اسکیم   کے نام   سے جو اکاؤنٹ کھولا جاتا   ہے  ،یہ سودی  اسکیم ہے  ،اس   اسکیم  میں  سرمایہ  جمع  کروانے  سے نفع     کےنام   پرملنے  والی اضافی  رقم  سود ہوتی ہے،لہذا   اس میں  رقم جمع کروانا  جائز نہیں ،اوراگر  کسی  نے لاعلمی  میں  اس اسکیم کے  تحت  رقم   جمع  کروائی    تو  اس  سے  منافع کے نام  پر ملنے والی  رقم  کا استعمال جائز نہیں ، بلکہ  امنافع کی  پوری رقم کو   ثواب  کی نیت  کے بغیر  صدقہ کردینا لازم   ہے ۔

1،2۔اس  تمہید   کے بعد  آپ کے سوال   کا  جواب  یہ  ہے کہ  بچی  کےبالغ  ہونے تک اس  پر  زکوة  فرض  نہیں   ہوئی ،اور بالغ ہونے کے بعد   اصل رقم  جو اس کو   بطور وظیفہ جو  حکومت   کینیڈا   کی طرف سے     ملی ہے، اگر وہ نصاب  کے بقدر ہے   تو  اس پر زکوة  فرض  ہے ،   بینک کی   طرف   سے جو سود ملا  ہے  اس  مقدار پر زکوة  فرض نہیں ،بلکہ سود کی  پوری رقم کو   بینک سے  وصول  کرکے صدقہ  کرنا لازم  ہے  ۔آیندہ  کے لئے موجودہ   سودی  اکا ؤنٹ  کو   بند کرنا  ضروری ہے ۔

3۔بالغ  ہونے  کی   قمری  تاریخ  کو   محفوظ  کرلیاجائے ،اس  تاریخ سے  ایک سال مکمل ہونے  کے  بعد   اپنی   ملک میں  موجود  سونا   ،چاندی  اورتجارت   کی نیت سے   خریدا   ہو  امال  ،اگر کچھ  ملک  میں    موجود   ہے ،سب کی  مجموعی  قیمت  لگاکر  اس میں      نقدی  کو    جمع  کیاجائے   ،پھر  مجموعی  رقم کی ڈھائی  فیصد   زکوة ادا  کی جائے ،اس کے بعد  ہرسال  کی تکمیل پر   اس کی ملکیت میں موجود اموال کا ڈھائی فیصد  کے حساب سے  زکوة کی ادائیگی  کی جائے گی ۔

حوالہ جات

البحر الرائق شرح كنز الدقائق ومنحة الخالق وتكملة الطوري (2/ 221)

قوله ولذا قالوا: لو أن سلطانا غصب مالا وخلطه إلخ) أي خلطه بماله أما إذا لم يكن له مال وغصب أموال الناس وخلطها ببعضها فلا زكاة عليه لما في القنية لو كان الخبيث نصابا لا يلزمه الزكاة؛ لأن الكل واجب التصدق عليه فلا يفيد إيجاب التصدق ببعضه، ومثله في البزازية قال في الشرنبلالية وبه صرح في شرح المنظومة ويجب عليه تفريغ ذمته برده إلى أربابه إن علموا وإلا إلى الفقراء

      الدر المختار وحاشية ابن عابدين (رد المحتار) (4/ 283)

(عليه ديون ومظالم جهل أربابها وأيس) من عليه ذلك (من معرفتهم فعليه التصدق بقدرها من ماله وإن استغرقت جميع ماله) هذا مذهب أصحابنا لا تعلم بينهم خلافا كمن في يده عروض لا يعلم مستحقيها اعتبارا للديون بالأعيان    

احسان اللہ شائق عفا اللہ عنہ    

       دارالافتاء جامعة الرشید     کراچی

۲۰ ربیع  الثانی ١۴۴۴ھ

واللہ سبحانہ وتعالی اعلم