سوال

کیا فرماتے  ہیں علماء  کرام اس مسئلہ  کے بارے میں  کہ  میرا نکاح میرے  والدین  اور میری بیوی  کے والدین  کی  آپس کی رضامندی  سے ہوا  ہے،مگر ابھی   تک  رخصتی نہیں  ہوئی ،رخصتی کے بارے  میں  ،میرا ساس وسسرکے ساتھ  جھگڑا ہوا ، میرے  ساس و سسر کا کہنا  ہے   کہ  رخصتی    میں  ٹائم  لگے  گا   ،کیونکہ بچی ابھی پڑ ھ رہی ہے ،لہذا  رخصتی  ابھی نہیں ہوسکتی ۔آپس  میں بحث  ومباحثہ  جاری تھا  اس  دوران ساس  اور سسر نے کہا  کہ  اگر  رشتہ قائم رکھنا   ہے  تو گھر چلے  جاؤ  اگر  نہیں  رکھنا  ہے تو  سادہ کاغذ پر دستخط کرکے  جاؤ۔میں  نےساس اور  سسر کو  مخاطب کرکے  کہا  کہ  نہ میں  سادہ کا غذ پر دستخط کرتا ہوں  نہ آپ کی بیٹی کو   چھوڑونگا    ،میں  نے  یہ نکاح زندگی بنانے کے لئے کیا  ہے  چھوڑ نے کےلئے نہیں ۔

خلاصہ کلام   یہ  ہے کہ  اس موقع پر  میری اپنی بیوی  کوطلاق  دینے  کی کوئی نیت نہیں  تھی ، اور  طلاق  کا  کوئی لفظ زبان  سے ادا  بھی نہیں  کیا ، طلاق  دیتا  ہوں  وغیرہ ،صرف  ساس  سسرکے سامنے ایک سفید  کاغذ  پر دستخط کیا ہے ،اس  میں کچھ لکھا نہیں  تھا  پھر میں  اٹھ کر چلاگیا۔

اب سوال یہ ہے کہ  صرف سادہ  کاغذ پر دستخط  کرنے سے میری بیوی  پر کوئی طلاق  واقع ہوئی ہے یا نہیں ؟

نوٹ؛کمال  صاحب  یعنی  سسرنے فون پر  بتایا  کہ  سادہ  کاغذ  پر دستخط لینے کا  مقصد  اگر  فرحان  دوبارہ   جلدی  آئے تو  اس کاغذ کے ذریعہ  اس کو دڑایا جائے  ۔

اَلجَوَابْ بِاسْمِ مُلْہِمِ الصَّوَابْ

سوال  میں لکھی ہوئی   تفصیلات  کے مطابق سائل  نے سسرال  والوں  کے  مطالبہ پرطلاق کی نیت کے بغیرسادہ  کاغذ  پر دستخط  کیا ہے ، اگر  یہ بات  درست ہے  توصرف  سادہ کاغذ  پر دستخط کرنے سے کوئی  طلاق  واقع نہیں  ہوئی ۔ البتہ  آیندہ  موہم طلاق  الفاظ کےاستعمال  کرنے سے احتیاط   کرنا چاہئے تاکہ  وقوع طلاق  سے ازدواجی  زندگی خراب نہ ہو۔ 

حوالہ جات

الفتاوى الهندية (8/ 325)

ولو قال لها لا نكاح بيني وبينك أو قال لم يبق بيني وبينك نكاح يقع الطلاق إذا نوى ولو قالت المرأة لزوجها لست لي بزوج فقال الزوج صدقت ونوى به الطلاق يقع في قول أبي حنيفة - رحمه الله تعالى - كذا في فتاوى قاضي خان .

 نوٹ ؛ نکاح  ہوجانےکے   بعد  رخصتی  کروانا   یہ شوہر کا حق  ہے ، اگر وہ  رخصتی کا مطالبہ  کر رہا  ہے تو بلا کسی شرعی عذر   کے  رخصتی میں تاخیر کرنا  درست  نہیں  ،فورا  رخصتی  کردینا  چاہئے تاکہ  کوئی  فتنہ فساد  پیدا  نہ  ہو۔

             احسان اللہ شائق عفا اللہ عنہ    

       دارالافتاء جامعة الرشید     کراچی

١۰ ربیع  الثانی  ١۴۴۴ھ

واللہ سبحانہ وتعالی اعلم