سوال

جناب  مفتی  صاحب  عرض  یہ ہے  کہ میرا بیٹا  ساڑھے    سولہ سال کا ہے ، اور  بیٹی  ساڑھے  انیس سال کا ، 2نومبر کورات کاکھانا نہیں  کھانا  چاہتے تھے چونکہ  صبح بھی کھانا  نہیں کھایا  تھا ،اس لئے زبردستی کی ، بیٹی  کھانا  ختم کرچکے  تھے،اور بیٹا   غصے میں کھا رہا  تھا  ،لیکن  آخری   لقمہ رہ  گیااس کو کھانے سے  منع کرنے لگا،میں  نے زبر دستی  اس کے منہ میں ڈالا  اس نے غصے میں  اٹھ کر مجھے لات  ماری  جو  میری  ٹانگ  میں لگی ۔میں کھانا سمیٹ کر   کمرے سے باہر آگئی  ،اندر کمرے  میں شور ہونے لگا  ،میرے شوہر نے  بچوں کی پیٹائی  کی اور باہر  آکر  مجھے  بھی مارا اور بیٹےکو  مارتے ہوئے کہا کہ آیندہ    اگرماں کو  مارا  ،اور کوئی ایسی حرکت  کی  بہت مارونگا  میرے سامنے   بالکل  نہیں ہونا چاہئے ۔اکیلے  میں تیری  جو مرضی آئے  کر۔

اگلے  دن 3نومبر کو  سب  معمول  کے مطابق   کام پر  اور بچے کالج  چلے گئے ۔شام  کو آئے  میرے شوہرنے غصے میں فون کرکے  میرے  ماں باپ کو   بلانے کو  کہا  ،پھر  کچھ دیر کے بعد منع کردیا  ،بچوں سے پوچھا ،کہ  اپنی  ماں کے ساتھ رہنا ہے  یا میرے ساتھ  ؟ یہ سن کربچے رو رہے تھے ،پھر بچوں  کو گواہ بنا  کر میرا   نام لیکر تین بار یہ جملہ کہاکہ ﴿میں تمہیں  طلاق دیتا   ہوں اگر دوبارہ  ایسا ہوا  جیسا  کل ہواتھا  ۔ ﴾  اور  شوہر نے  فون پر بتایا   کہ    اس  پورے  جملے  کو   تین فعہ  دہرایا  ہے ۔

 پھر   4 نومبر  کو  بچہ  کالج سے  واپس آیا   تو  میں نے   پوچھا  کہ رکشہ  میں دوسرا بچہ کون  تھا ،  کیونکہ  میرا بیٹا  اکیلا  آتا جاتا  ہے ،اس سوال  پر بیٹا نارض  ہو گیا  اور   بولنا شروع  کردیا کہ  اس کے  گھر  والوں  نے  بھی یہ رکشہ  لگالیا  ہے،کیا   ہر بات پر بولنا  ضروری ہے؟ میں  نےپھر پوچھا   بابا  ﴿  والد ﴾  کو  معلوم ہے  تو  غصے میں   بولنے  لگا  آپ کو کیا مسئلہ ہے ؟ بڑ بڑ اتا  ہو اباتھ  روم کے  سامنے  چپل  پھنکتا  ہو ا اندر    چلا  گیا  ، میں  باہر آگئی  تا کہ  زیادہ   بدتمیزی نہ ہو ۔شام  کو  بچوں   نے بتا یا   آج ایسا  کچھ  نہیں ہوا   جو   2نومبر  کو ہوا تھا، وہ  غصے کی  کیفیت الگ تھی  آج   غصہ نہیں تھا،  نار  مال  حالت میں  تھے۔

5 نومبر   کو  میرے شوہر نے  گھر سے باہر جاتے ہوئے  بیٹی  کو گواہ  بناکر کہا   کہ میں نے مفتیان کرام سے مسئلہ پوچھا    ہے  دیکھو وہ   کیا کہتے ہیں  ،  تین بار کہا   کہ میں  اپنے  الفاظ اور جملے واپس   لیتا  ہوں ۔اب مفتیان  کرام  جیسے بتائیں  گے  اس پر عمل ہوگا ۔

اب  میرے  شوہر پریشان ہے ، بڑی  غلطی  ہوگئی ہے ،اور  حلفیہ   بیان  دے رہا ہے  کہ ان  کا کوئی ایسا   ارادہ نہیں  کہ موقع  پر کچھ کر گزرے ،لہذا  آپ مفتی صاحبان   سے فتوی  درکار ہے ۔

اَلجَوَابْ بِاسْمِ مُلْہِمِ الصَّوَابْ

واضح  ہو کہ مفتی کو غیب کا علم نہیں  ہوتا ،بلکہ سوال  میں لکھی ہوئی  تحریر کے  مطابق  ہی  جواب  لکھا جاتا ہے،باقی  سوال میں  صحیح  بات لکھنے  کی تمام تر ذمے داری  سائل پر عائد ہوتی ہے ، لہذا اگر کوئی شخص  تین طلاق دینے سے بیوی کے حرام  ہونے کے بعد غلط بیانی کے ذریعہ کسی دارالا فتاء   سےطلاق واقع نہ ہونے کا فتوی حاصل کرے ،اور پھراس طرح  تین طلاق یافتہ عورت کو بیوی بناکر گھر میں بسائے او ر  دونوں میاں  بیوی  کی حیثیت  سے زندگی  گذار ے ،تو  شرعا یہ  حرام کاری  ،زنا کاری،  بدکاری کے  حکم میں داخل  ہے ،لہذا اگر  میاں  بیوی میں  جھگڑے  کے دوران  طلاق کے الفاظ  استعمال ہوئے  ہوں ، تو خوب  دیانتداری  کے ساتھ واقعہ  بیان   کرکے مسئلہ  کا حکم معلوم  کرکے عمل کرنا  چاہئے  ۔

مسئولہ صورت میں سوال  کی تحریر کے مطابق   مذکورہ  خاتون  کو 3نومبر 2022 کو ایک ہی   مجلس  میں  تین  مرتبہ  معلق طلاق  دی گئی ہیں ،کہ اگر  لڑکے نےدوبارہ  ایسی   بد تمیزی کی حرکت  کی  جو  2 نومبر کو کی  تھی تو  طلاق  واقع ہوگی۔  اور شوہر  خوداس بات  کا اقرار  کررہا ہے  کہ  شرط  وجزا ء کے  ساتھ  تین  مرتبہ یہ  جملہ  دہرایا   ہے ،  اگر   حقیقت میں  ایسا ہی ہوا  ہے کہ شوہر  نے  شرط وہ  جزا کے ساتھ   پورے  جملے کو  تین مرتبہ  دہرایا  ہے ،  تو مسئلہ کاحکم  یہ ہے کہ اس  معلق طلاق کے بعد اگر لڑکے کی طرف سے  ماں  پر  ہاٹھ اٹھانے  کا واقعہ   اب تک دوبارہ پیش نہیں آیا تو   طلاق  واقع نہیں ہوئی  ،اور  نکاح برقرار  ہے ،دونوں  کے لئے  ازدوا جی زندگی  بحال  رکھنا  جائز ہے ۔لیکن آیندہ  کسی بھی   وقت اگرلڑکا   ماں  پرہاتھ اٹھانے کی   بدتمیزی کرےگا  توتینوں معلق   طلاقیں  واقع ہوجائیں گی ۔ اس لئے  لڑکے کو  بھی خوب احتیاظ کرنا لازم ہے، تاکہ  ماں باپ  کی زندگی خراب  نہ  ہو ۔ ویسے بھی ایک  بیٹے کے لئے اس سے بڑی بد بختی کیا ہوگی  کہ  وہ  اپنی  ماں پر  ہاتھ  اٹھائے ، لہذا  لرکے کو  چاہئے  کہ جو غلظی ہوگئی  اس پر والدین سے معافی مانگے اور استغفار  بھی کرے ۔

حوالہ جات

الدر المختار وحاشية ابن عابدين (رد المحتار) (3/ 376)

فروع] في أيمان الفتح ما لفظه، وقد عرف في الطلاق أنه لو قال: إن دخلت الدار فأنت طالق، إن دخلت الدار فأنت طالق، إن دخلت الدار فأنت طالق وقع الثلاث، وأقره المصنف ثمة.

 (قوله وقع الثلاث) يعني بدخول واحد كما تدل عليه عبارة ايمان الفتح، حيث قال: ولو قال لامرأته والله لا أقربك ثم قال والله لا أقربك فقربها مرة لزمه كفارتان. اهـ. والظاهر أنه إن نوى التأكيد يدين ح.

قلت: وتصوير المسألة بما إذا ذكر لكل شرط جزاء، فلو اقتصر على جزء واحد. ففي البزازية إن دخلت هذه الدار إن دخلت هذه الدار فعبدي حر وهما واحد فالقياس عدم الحنث حتى تدخل دخلتين فيها، والاستحسان يحنث بدخول واحد ويجعل الباقي تكرارا وإعادة اه

بدائع الصنائع في ترتيب الشرائع (3/ 24)

فأما إذا أخر فقال أنت طالق إن دخلت الدار لا تطلق ما لم تدخل الدار لأنه عقب الإيجاب بما أخرجه عن كونه إيجابا إلى كونه يمينا فلا حاجة في مثل هذا إلى حرف التعليق ولو قال أنت طالق وإن دخلت الدار فهي طالق حين تكلم به لأن هذا يوجب التأكيد على ما بينا يدل عليه قوله - صلى الله عليه وسلم - «من قال لا إله إلا الله دخل الجنة وإن زنا وإن سرق» ولو قال: عنيت به التعليق لا يصدق في القضاء ولا فيما بينه وبين الله تعالى لما ذكرنا أن الواو لا تحتمل التعليق.

احسان اللہ شائق عفا اللہ عنہ    

 دارالافتاء جامعة الرشید     کراچی

١۸ ربیع  الثانی   ١۴۴۴ھ

واللہ سبحانہ وتعالی اعلم