سوال

ایک  شخص اپنی گائے  اور  اس کا بچہ  کسی  کے پاس  اس  شرط کے ساتھ   رکھواتا  ہے کہ   وہ   دونوں کی  خدمت کرے گا   اور   بعد  میں  گائے  واپس لے گا بچہ  دونوں میں آدھا  آدھا   تقسیم ہوگا   مزید کوئی   معاوضہ  ادا  نہیں کیاجائے  گا ۔ یہ معاملہ   شرعا جائز ہے یانہیں  ؟ اس کا جائز طریقہ  کیا ہوگا وہ بتادیں ۔

اَلجَوَابْ بِاسْمِ مُلْہِمِ الصَّوَابْ

مذکورہ معاملہ   درست ہونے کے لئے ضروری ہے کہ   اجیر   ﴿ جس کو  گائے دی جائے  ﴾  کی اجرت  اس طورپر متعین  ہو   کہ اس میں کسی قسم کی جہالت  نہ ہو   جبکہ  مذکورہ صورت میں  اجیر   کے لئے  جو اجرت   بچے کا   آدھا   حصہ مقرر   کی جاتی ہے ، وہ غیر متعین   اور غیر یقینی ہے ،اس  لئے یہ معاملہ شرعا ناجائز  ہے ، اس  لئے  مذکورہ طریقہ  پر معاملہ نہیں کرنا چاہئے۔اگر  کسی  نے ایسا  معاملہ کرلیا   تو   اس کا فیصلہ اس طرح ہوگا  کہ  اس  جانور  سے جتنے بھی منافع  حاصل ہوا  ہے وہ مالک کے  ہونگے ۔اور اجیر  نے اس دوران   جو چارہ  کھلایا   ہے اس کی قیمت    اور   جتنے دن  خدمت کی ہے  اس کی اجرت مثل   ﴿وہاں کے  عرف  میں اس کام کی جتنی اجرت مزدور  کی دی جاتی  ہو ﴾مالک پر لازم ہے ،اس دوران  اجیرنے جتنادودھ استعمال کیا ہے  اسی مقدار  دودھ یا  اس کی قیمت دینا لازم ہے۔

البتہ اس  معاملہ   کی جائز صورت یہ ہوسکتی ہے  کہ مالک اجیر  کو  آدھی گائے فروخت یا ھبہ  کردے پھر  فرخت کی صورت میں  مالک  اجیر کوآدھی قیمت معاف  کردے ،اوردونوں  آپس میں اس شرط پر   شرکت کرلیں  کہ آیندہ  اس جانورسے  جو  منافع  حاصل ہونگے   دونوں  آدھے آدھےتقسیم  کرلیں گے ،اور  گائے کے  چارے  پر  آنے  والا خرچہ اجیربلاکسی  شرط  اپنی خوشی سے  اپنے ذمے   لے۔

حوالہ جات

الدر المختار وحاشية ابن عابدين (رد المحتار) (4/ 327)

وعلى هذا إذا دفع البقرة بالعلف ليكون الحادث بينهما نصفين، فما حدث فهو لصاحب البقرة وللآخر مثل علفه وأجر مثله تتارخانية.

الفتاوى الهندية (36/ 120)

دفع بقرة إلى رجل على أن يعلفها وما يكون من اللبن والسمن بينهما أنصافا فالإجارة فاسدة وعلى صاحب البقرة للرجل أجر قيامه وقيمة علفه إن علفها من علف هو ملكه لا ما سرحها في المرعى ويرد كل اللبن إن كان قائما ، وإن أتلف فالمثل إلى صاحبها لأن اللبن مثلي ، وإن اتخذ من اللبن مصلا فهو للمتخذ ويضمن مثل اللبن لانقطاع حق المالك بالصنعة والحيلة في جوازه أن يبيع نصف البقرة منه بثمن ويبرئه عنه ثم يأمر باتخاذ اللبن والمصل فيكون بينهما وكذا لو دفع الدجاج على أن يكون البيض بينهما أو بزر الفيلق على أن يكون الإبريسم بينهما لا يجوز والحادث كله لصاحب الدجاج والبزر .كذا في الوجيز للكردري .

احسان اللہ شائق عفا اللہ عنہ    

دارالافتاء جامعة الرشید     کراچی

١١ جمادی  الثانیہ   ١۴۴۴ھ

واللہ سبحانہ وتعالی اعلم