ایک طالب علم کا تعلق سید خاندان سے ہے اور وہ مدرسہ میں رہتاہے اور مدرسہ کی اشیا مثلا کھانا پینا اور دوسری چیزیں استعمال کرتا ہے ، تو چونکہ مدرسہ میں جورقم آتی ہے وہ عمومازکوة یا صدقات کی مد میں ہوتی ہے ،حالانکہ سیدوں کے لئے زکوة صدقات واجبہ، کھانا جائز نہیں ،براہ کرم اس مسئلہ کی شریعت کی روشنی میں وضا حت کریں ۔
اَلجَوَابْ بِاسْمِ مُلْہِمِ الصَّوَابْ
سید کے لئے زکوة اور صدقات واجبہ کا استعمال جائز نہیں ہے، سید طالب علم کے لئے مدرسہ کی اشیا کے استعمال کا حکم یہ ہے کہ اگر اس مدرسہ میں تملیک زکوة کا صحیح انتطام ہے ﴿یعنی داخلہ فارم میں بالغ طلبہ کی طرف سے مہتمم مدرسہ کے حق میں زکوة وصول کرکے صحیح مصارف میں خرچ کرنے کی توکیل موجود ہے اور طلبہ کوفارم کا وہ شق پڑھواکر فارم پر کروایا جاتا ہو ۔یا یہ کہ مستند مفتیان کرام کی رہنمائی میں تملیک ہوتی ہو﴾ تو اس کے لئے مدرسہ کی اشیا کا استعمال ،اور مدرسہ کے فنڈ سے کھانا پینا جائز ہے ، اگر تملیک کا صحیح انتظام نہ ہو تو سید طالب علم کےلئے مدرسہ کے زکوة فنڈ سے کھانا پینا جائز نہیں
حوالہ جات
رد المحتار (7/ 244)
( و ) لا إلى ( بني هاشم ) إلا من أبطل النص قرابته وهم بنو لهب ، فتحل لمن أسلم منهم كما تحل لبني المطلب .
ثم ظاهر المذهب إطلاق المنع ، وقول العيني والهاشمي : يجوز له دفع زكاته لمثله صوابه لا يجوز نهر ( و ) لا إلى ( مواليهم ) أي عتقائهم فأرقاؤهم أولى لحديث { مولى القوم منهم } وهل كانت تحل لسائر الأنبياء ؟ خلاف واعتمد في النهر حلها لأقربائهم لا لهم ( وجازت التطوعات من الصدقات و ) غلة ( الأوقاف لهم ) أي لبني هاشم ، سواء سماهم الواقف أو لا على ما هو الحق كما حققه في الفتح ، لكن في السراج وغيره إن سماهم جاز ، وإلا لا .
