رسول اللہ صلی اللہ علیہ وسلم پر درود وسلام بھیجنے کے مسائل ) درود سلام کے (
سوال
کیافرماتے ہیں علماء کرام اس مسئلہ بارے میں کہ
میں سوات کے ایک علاقے میں امام ہوں، میں پہلے فرض نمازوں کے بعد مقتدیوں کے ساتھ اجتماعی دعاکرتاتھا لیکن بعد میں چند اکابرِعلماءِ دیوبند کی کتابوں کامطالعہ کرنے کے بعد مجھے معلوم ہوا کہ فرض نمازوں کے بعد التزام کے ساتھ اجتماعی دعاکرنا صحیح نہیں ،لہذا اب میں نے اپنے مقتدیوں سے کہہ دیا ہے کہ آپ اپنی انفرادی دعاکرلیا کریں اورمیرے ساتھ ہاتھ اٹھانے اورنیچے کرنے کولازم نہ سمجھیں کیونکہ ہوسکتاہے کہ میں اپنی کسی مجبوری کی وجہ سے مختصر دعاکروں اورآپ لمبی دعاکرنا چاہتے ہوں یامیں لمبی دعاکروں اورآپ کو اپنی کسی مجبوری کی وجہ سے جاناہو، لہذا آپ اپنی انفرادی دعاکرلیاکریں اورمیں اپنی دعا انفرادی کرلیاکروں گا لمبی یا مختصر، لیکن میرے اس عمل پر علاقے کے چندعلماء اعتراض کررہے ہیں تو آپ میرے اس عمل کے بارےمیں اورعلماء کی مخالفت کے بارےمیں شریعت کی رشنی میں رہنمائی فرمائیں ۔
اَلجَوَابْ بِاسْمِ مُلْہِمِ الصَّوَابْ
فرائض کے بعد دعااوراس کااقرب الی القبول ہونا،اس میں ہاتھ اٹھانااورمقتدیوں کی طرف منہ پھیرنایہ امورالگ الگ ثابت ہیں، لہذاگرمقتدی اورامام الگ الگ دعاکریں اوراس سے صورةًاجتماع کی شکل بن جائے تواس میں کوئی حرج نہیں، اس کوبدعت سمجھناٹھیک نہیں ،جہاں تک حقیقی اجتماع کاتعلق ہے کہ امام اورمقتدی اکھٹے دعاشروع کریں اور اکٹھے ختم کریں، اس کاصحیح احادیث سےکوئی ثبوت نہیں ملتا،لہذااگرکوئی ذہناًاورعقیدةًاس کولازم سمجھتاہویااس پر اس طریقے سے عملی التزام کرتاہو کہ نہ کرنے والے پرطعن اورملامت کرتاہو تو یہ بدعت اورواجب الترک ہےاوراگرکوئی اس کو عقیدة ً بھی لازم نہیں سمجھتااوراس پراس طرح التزامِ عملی بھی نہیں کرتا کہ چھوڑنے والے پرطعن اورملامت کرے تواس میں علماءِ حق کے دوقول ہیں :
١۔بعض یہ کہتے ہیں کہ گوابھی اس کو عقیدة ً بھی لازم نہیں سمجھاجاتاوراس پراس طرح التزام عملی بھی نہیں کیاجاتا کہ چھوڑنے والے پرطعن اورملامت کیاجائےمگردوام کرنے سے آگے جاکراس کے لزوم کاخطرہ موجود ہے لہذاسدّاللذرائع اس کومنع کیاجائے گااوراس میں دیگرخرابیاں بھی ہیں ،یہی حضرت اقدس مفتی رشید احمد صاحب کی رائے ہے ۔
۲۔دوسری رائے یہ ہے کہ چونکہ لوگ اس کولازم نہیں سمجھتے اورعملی التزام نہیں کرتے محض دوام کرتے ہیں، اس لئے فی نفسہ یہ جائزہے، جب تک اس میں خرابیاں پیدانہ ہوں،یہ رائے حضرت مفتی شفیع رحمہ اللہ اوردیگرعلماء کی ہے ۔
دونوں طرف اہل حق علماء ہیں ،پہلی رائے احتیاط پرمبنی ہے ،دوسری رائے میں آسانی اورتخفیف ہے، لہذاتنقید اورشدّت کاراستہ اپنانےسے گریز کیاجائے اورجس کی رائے پر زیادہ اعتمادہواس پرعمل کیاجائے،ہماری رائے یہ ہے کہ چونکہ عموماًلوگ ترک کرنے والوں پر طعن کرتے ہیں، اس لئے اجتماعی شکل ترک کی جائےاورامام اورمقتدی میں سے ہرایک اپنے اپنے طورپردعا کرے اورایک دوسرے کاانتظارنہ کرے ۔
