کیافرماتے ہیں علماء کرام اس مسئلہ کے بارے میں کہ
ایک مسجد میں مؤذن صاحب اہتمام سے پانچوں وقت کی اذان دیتا ہےمگرفجر کی اذان دینے کے بعداطمینان سے اپنے کمرے میں جاکرروزانہ سوجایاکرتاہے ،نہ فجر کے لیے اقامت کہتاہے اورنہ فجرکی نماز جماعت کے ساتھ پڑھتاہے، اس بارے میں انتظامیہ والوں نے کافی سمجھایا بھی لیکن وہ مؤذن صاحب اپنی اس حرکت سے باز نہیں آتا، اب ایسی صورت میں قرآن وحدیث کی رو سے اس کا کیاحکم ہوگا ؟
اَلجَوَابْ بِاسْمِ مُلْہِمِ الصَّوَابْ
مؤذنِ مذکورسے متعلق اگر استفتاء میں لکھی گئی بات صحیح ہو تو ایسے مؤذن کو چند دن کے لیے تبلیغ میں بھیجاجائے اوراس کو باعمل علماء کرام کے بیانات سننے اوران کی صحبت میں رہنےکا پابند بنایاجائےان شاء اللہ ٹھیک ہوجائے گا،نیز اس کو نما ز میں سستی کرنے والے کے متعلق درج ذیل شرعی فتوی بھی دکھایاجائے اوراس سے نماز کی اہمیت سے سے متعلق دیگرکتابیں بھی پڑھوائی جائے ۔
تمام علماء کا اس بات پر اتفاق ہے کہ فرض نماز جان بوجھ کر چھوڑنا بہت بڑا گناہ ہے۔ شریعت اسلامیہ میں زنا کرنے، چوری کرنے اور شراب پینے سے بھی بڑا گناہ نماز کا ترک کرنا ہے۔ ذیل میں نماز نہ پڑھنے والوں کے بارے میں علماء کی مختلف آراء تحریر کی جاتی ہیں،جس سے اس جرم کی شدت کا اندازہ ہوتاہے :
حضرت امام احمد ابن حنبل ؒ فرماتے ہیں کہ ایسا شخص کافر ہے اور ملتِ اسلامیہ سے نکل جاتا ہے۔ اسکی سزا یہ ہے کہ اگر
توبہ کرکے نماز کی پابندی نہ کرے تو اسکو قتل کردیا جائے۔
حضرت امام مالکؒ اور حضرت امام شافعی ؒ کہتے ہیں کہ نمازوں کو چھوڑنے والا کافر تو نہیں، البتہ اسکو قتل کیا جائیگا۔
حضرت امام ابوحنیفہ ؒ فرماتے ہیں کہ اسکو قتل نہیں کیا جائیگا، البتہ حاکم وقت اسکو جیل میں ڈال دے گا۔ اور وہ جیل ہی
میں رہے گا یہاں تک کہ توبہ کرکے نماز شروع کردے یا پھر وہیں مرجائے۔
نماز کو ترک کرنے یا اس میں سستی کرنے پر قرآن کریم اور احادیث نبویہ میں سخت وعیدیں وارد ہوئی ہیں جن میں سے بعض کا تذکرہ یہاں کیا جارہا ہے:
آیاتِ قرآنیہ:
پھر ان کے بعد ایسے ناخلف پیدا ہوئے کہ انھوں نے نماز ضائع کردی اور نفسانی خواہشوں کے پیچھے پڑگئے، وہ غی میں ڈالے جائیں گے۔ (سورہ مریم آیت ۵۹)۔
تمہیں دوزخ میں کس چیز نے ڈالا۔ وہ جواب دیں گے کہ ہم نمازی نہ تھے، نہ مسکینوں کو کھانا کھلاتے تھے ۔ (سورۂ المدثر ۴۲ ۴۴)
اہل جنت، جنت کے بالاخانوں میں بیٹھے جہنمیوں سے سوال کریں گے کہ کس وجہ سے تمہیں جہنم میں ڈالا گیا؟ تو وہ جواب دیں گے کہ ہم دنیا میں نہ نماز پڑھتے تھے اور نہ ہی مسکینوں کو کھانا کھلاتے تھے۔۔۔۔ غور فرمائیں کہ جہنمی لوگوں نے جہنم میں ڈالے جانے کی سب سے پہلی وجہ نماز نہ پڑھنا بتلایا کیونکہ نماز ایمان کے بعد اسلام کا اہم اور بنیادی رکن ہے جوہر مسلمان کے ذمہ ہے۔
ان نمازیوں کے لئے خرابی (اور ویل نامی حہنم کی جگہ)ہے جو نماز سے غافل ہیں۔ (سورۂ الماعون۴ ، ۵) اس سے وہ لوگ مراد ہیں جو نماز یا تو پڑھتے ہی نہیں، یا پہلے پڑھتے رہے ہیں پھر سست ہوگئے یا جب جی چاہتا ہے پڑھ لیتے ہیں یا تاخیر سے پڑھنے کو معمول بنالیتے ہیں یہ سارے مفہوم اس میں آجاتے ہیں‘ اس لئے نماز کی مذکورہ ساری کوتاہیوں سے بچنا چاہئے۔
وہ (منافقین) کاہلی سے ہی نماز کو آتے ہیں اور بُرے دل سے ہی خرچ کرتے ہیں۔ (سورۂ التوبہ ۵۴) معلوم ہوا کہ نماز کو کاہلی یاسستی سے ادا کرنا منافقین کی علامتوں میں سے ایک علامت ہے۔
احادیث شریفہ :
رسول اللہ صلی اللہ علیہ وسلم نے ارشاد فرمایا: ہمارے (اہل ایمان) اور ان کے (اہل کفر) درمیان فرق کرنے والی چیز نماز ہے،لہذا جس نے نماز چھوڑدی اس نے کفر کیا۔ (مسند احمد، ابوداؤد، نسائی، ترمذی، ابن ماجہ(
رسول اللہ صلی اللہ علیہ وسلم نے ارشاد فرمایا: نماز کا چھوڑنا مسلمان کو کفر وشرک تک پہنچانے والا ہے۔ (صحیح مسلم(
رسول اللہ صلی اللہ علیہ وسلم نے ارشاد فرمایا: جان کر نماز نہ چھوڑو، جو جان بوجھ کر نماز چھوڑدے وہ مذہب سے نکل جاتاہے۔ (طبرانی(
رسول اللہ صلی اللہ علیہ وسلم نے ارشاد فرمایا: اسلام میں اس شخص کا کوئی بھی حصہ نہیں جو نماز نہیں پڑھتا ۔ (بزار(
رسول اللہ صلی اللہ علیہ وسلم نے ارشاد فرمایا: جو شخص قرآن پاک یاد کرکے بھلا دیتا ہے اورجو فرض نماز چھوڑ کر سوتا رہتا ہے اس کاسر (قیامت کے دن) پتھر سے کچلا جائیگا۔ (بخاری(
رسول اللہ صلی اللہ علیہ وسلم نے ارشاد فرمایا: میں چاہتا ہوں کہ کسی کو نماز پڑھانے کا حکم دوں، پھر جماعت سے نماز نہ پڑھنے والوں کو ان کے گھروںسمیت جلا ڈالوں۔ (مسلم(
رسول اللہ صلی اللہ علیہ وسلم نے ارشاد فرمایا: جس شخص نے تین جمعہ غفلت کی وجہ سے چھوڑ دئے، اللہ تعالیٰ اس کے دل پر مہر لگا دیتےہیں۔ (نسائی، ترمذی(
رسول اللہ صلی اللہ علیہ وسلم نے ارشاد فرمایا: جو شخص نماز کا اہتمام کرتا ہے تو نماز اس کے لئے قیامت کے دن نور ہوگی، اس (کےپورے ایماندار ہونے) کی دلیل ہوگی اور قیامت کے دن عذاب سے بچنے کا ذریعہ ہوگی۔ اور جو شخص نماز کا اہتمام نہیں کرتااس کے لئے قیامت کے دن نہ نور ہوگا، نہ(اسکے پورے ایماندار ہونے کی) کوئی دلیل ہوگی، نہ عذاب سے بچنے کا کوئیذریعہ ہوگا۔ اور وہ قیامت کے دن فرعون، قارون، ہامان اور ابی بن خلف کے ساتھ ہوگا۔ (صحیح ابن حبان،مسند احمد، طبرانی، بیہقی(