سوال

میڈیکل ریپ اور کمپنی  جو عالمی معیار کی ہوں  جنہوں نے خود  ہی ڈاکٹروں کے لیے بونس نکالا  ہوا ہو جو کہ ان کی کمپنی کی پالیسی ہے۔

(1)کیا ان سے ایسی مراعات لینا جائز ہے؟ جبکہ ادویات مریضوں کے فائدہ  اور اچھی کوالٹی  والی ہی لگائی جاتی ہوں؟

(2)اگر ایسی کمپنیاں علمی ورکشاپ  منعقد کرائیں اور پاکستان کے بڑے  شہروں ، ہوٹلوں  میں  تفریح  کی  

سہولت بھی دیں تو کیا فائدہ اٹھا سکتے ہیں؟

(3)اسی طرح اگر ان کی پالیسی اور پیکج میں عمرہ  کا ٹکٹ بھی ہو  تو کیا ان کے ساتھ عمرہ  ادا کرسکتے ہیں؟

اَلجَوَابْ بِاسْمِ مُلْہِمِ الصَّوَابْ

آپ کے سوالات کا ترتیب وار جواب درج ذیل ہے:

        (1)ڈاکٹر کا فارما سیوٹیکل کمپنی سے تحفے تحائف اور دیگر مراعات لے کر ان کی دوائی فروخت کروانا جائز نہیں بلکہ رشوت  اور حرام ہے،کیونکہ یہ بات ڈاکٹر کے فرائض منصبی میں داخل ہے کہ وہ مریض کو علاج کے لیے بہترین دوا تجویز کرے،چونکہ اس طرح مراعات لینے کی صورت میں ڈاکٹر مریضوں کی مصلحت نظر انداز کرکے مراعات دہندہ کمپنیوں کی دوائیاں تجویز کرتے ہیں اس لیے ان مراعات کا لینا دینا حرام ہے۔البتہ اگر درج ذیل شرائط کا خیال رکھا جائے تو   ہلکی پھلکی وہ  مراعات  جو تشہیر کے لیے عام طور پر  مروج ہیں،جیسے پین،کیلنڈر یا ڈائری  وغیرہ۔

        (الف)محض کمیشن  وصول کرنے کی خاطر ڈاکٹر غیر معیاری  و غیر ضروری اور مہنگی ادویات تجویز نہ کرے۔

        (ب)دواساز کمپنیاں کمیشن،تحائف اور مراعات کی ادائیگی کا خرچہ وصول کر نے کے لیے ادویات کے معیار میں کمی نہ کریں۔

        (ث)ڈاکٹر صرف یہی دوا لکھنے کا پابند نہیں ہوگا بلکہ اس کے علم کے مطابق اگر اس سے بہتر دوا موجود ہو تو مریض کے لیے اسے تجویز کرے۔

        (2)میڈیسن کمپنیاں  جو مختلف  ورکشاپس  اور سیمینار  میں بلاتی ہیں تو اس میں ان کا  نئی تحقیق و تجربہ  بھی مقصد ہوتا ہے اور اپنی دواؤں کو بیچنے کا مقصد بھی ہوتا ہے  تو اگر درج بالا شرائط پائیں جائیں  تو  ڈاکٹر حضرات کے لیے  اس طرح کی مراعات  کمپنی کی طرف سےبطور  ہدیہ و تبرع  ،لینا جائز ہے۔

        (3)عمرہ اور اس جیسی دیگر بھاری بھرکم  مراعات کا حکم یہ ہے کہ اگرچہ اس میں درج   بالا شرائط  پائی  جاتی

 جاتی ہوں لیکن چونکہ انسان کی یہ فطرت ہے کہ اس قدر احسان کے بعد وہ نفسیاتی طور پر ایک دباؤ میں آجاتا ہے کہ اسی کمپنی ہی کی دوا لکھنی چاہیے لہٰذا ایسی مراعات کا لینا  درست نہیں۔         

حوالہ جات

قال العلامۃ علاء الدین  رحمہ اللہ:ولا ينبغي للقاضي أن يقبل الهدية ،إلا من ذي رحم محرم منه أو من صديق قديم الصحبة، قد كان بينهما التهادي قبل زمان القضاء، فأما من غير هذين، فلا يقبل الهدية، ويكون ذلك في معنى الرشوة. وأما الدعوة، فإن كان دعوة عامة مثل دعوة العرس والختان، فلا بأس بذلك، فأما الدعوة الخاصة، فإن كانت من ذي الرحم المحرم أو الصديق القديم الذي كان يضيفه قبل القضاء فلا بأس بالإجابة، وفي غيرهما لا ينبغي أن يحضر؛ لأن ذلك يوجب تهمة فيه. (تحفۃ الفقہا:3/374)

قال العلامۃ السرخسی رحمہ اللہ:قوله لا يرتشي المراد الرشوة في الحكم،وهو حرام. قال 

صلى الله عليه وسلم :الراشي والمرتشي في النارولما قيل لابن مسعود رضي الله عنه :الرشوة في الحكم سحت، قال ذلك الكفر، إنما السحت أن ترشو من تحتاج إليه أمام حاجتك.

                                                      (المبسوط للسرخسی:16/67)

                                                                                                                                محمد عثمان یوسف

                                                                                                              دارالافتاءجامعۃ الرشید کراچی

                                                                                                                                           25جمادی الثانیۃ 1441ھ

واللہ سبحانہ وتعالی اعلم