سوال

السلام علیکم مفتی صاحب!ہمارے ہاں اس بات کا اہتمام کیا جاتا ہے کہ جمعہ کی پہلی اذان اردو تقریر کے بعد دی جاتی ہے  اور پھر سنتوں کا وقفہ دیا جاتا ہے اور سنتوں کے بعد دوسری اذان اور خطبہ  کہہ کر نماز ادا کی جاتی ہے۔جبکہ ہمارے علاقے کی دیگر مساجد میں پہلی اذان اردو تقریر سے پہلے دی جاتی ہے اور پھر تقریر اور سنتوں کے طویل وقفے کے بعد دوسری اذان اور خطبہ کہا جاتا ہے ۔جبکہ ہمارے عمل پر بعض احباب کو تشویش ہے ۔ لہٰذا آپ رہنمائی فرمائیں کہ عوام میں پائی جانے والی غفلت اور بے دھیانی کے اس ماحول میں فی زمانہ کون سی صورت حکم الٰہی کے زیادہ قریب ہے؟

اَلجَوَابْ بِاسْمِ مُلْہِمِ الصَّوَابْ

اصل تو یہ ہے کہ زوال کا وقت گزرنے کے بعد پہلی اذان دے دی جائے اور لوگ اپنے سب کام کاج چھوڑ کر جمعہ ہی کی تیاری میں لگ جائیں اور جمعہ کے لیے حاضر ہوجائیں ،اور دوسری اذان سے پہلے سنتیں ادا کر کے اطمینان سے جمعہ کے خطبہ ونماز میں شریک ہوں۔اس لیے کہ جمعہ کی پہلی اذان کے بعد اپنے کاموں کو چھوڑ کر جمعہ کی تیاری میں لگنا ،جمعہ کے لیے چلنا واجب ہے۔اب   جبکہ ہمارے زمانہ میں اکثر لوگوں کو مسائل کا علم نہیں ہے اور اگر جمعہ کی پہلی اذان بہت پہلے دی جائے اور لوگ اپنے کاموں میں لگے رہیں   یا خرید و فروخت میں مصروف رہیں تو یہ حرام ہے۔لہٰذااس حرام سے بچانے کے لیے  بہتر ترتیب یہی ہے کہ اردو تقریر کے بعد اذان اول  دی جائے، البتہ سنتوں کی ادائیگی کے لیے مناسب وقت دیا جائے (کم از کم 10 منٹ) اور پھر دوسری اذان دے کر خطبہ و جمعہ کی نماز ادا کی جائے۔

            البتہ یہ بات بھی ذہن میں رہے کہ یہ کلی قاعدہ نہیں ہے کہ ہر جگہ پر ایک ہی ترتیب لازم کی جائے ، بلکہ اپنی مسجد کے نمازیوں کے اعتبار سے بھی اس ترتیب کو بدلا جاسکتا ہے ۔ مثلا کوئی مسجد کسی سبزی منڈی وغیرہ  میں ہے ،اور وہاں لوگوں کا عام معمول یہ ہے کہ وہ پہلی اذان پر دکانیں بند کرکے،نہا دھوکر مسجد آتے  ہیں تو  ان  کو  زیادہ  وقت

چاہیے ہوگا،لہٰذا وہاں اذان اول کچھ پہلے دینی چاہیے۔ اور اگر کوئی مسجد کسی بڑی فیکٹری وغیرہ کے قریب ہے تو وہاں لوگ گھروں سے ہی نہادھوکر آئے ہوتے ہیں اس لیے وہاں پر بہتر یہ ہے کہ اذان اول جمعہ کی نماز سے 10،15 منٹ پہلے دی جائے اس لیے کہ اگر اذان اول بہت پہلے دے دی اور لوگ جمعہ کی تیاری میں نہ لگے تو گناہ گار ہوں گے۔

حوالہ جات

قال العلامۃ الحصکفی رحمہ اللہ:(ووجب سعي إليها وترك البيع): ولو مع السعي، في المسجد أعظم وزرا (بالأذان الأول) في الأصح، وإن لم يكن في زمن الرسول بل في زمن عثمان رضی اللہ عنہ . وأفاد في البحر صحة إطلاق الحرمة على المكروه تحريما.

                                                                                                                                                                                                                                                                                                 (الدر المختار وحاشية ابن عابدين :2/ 161)

                                                وقال العلامۃ ابن عابدین رحمہ اللہ:       قوله     :      (ووجب سعي) لم يقل افترض  مع  أنه  فرض للاختلاف في وقته هل هو الأذان الأول أو الثاني أو العبرة لدخول الوقت؟ بحر.وحاصله أن السعي نفسه فرض والواجب كونه في وقت الأذان الأول، وبه اندفع ما في النهر من أن الاختلاف في وقته لا يمنع القول بفرضيته كصلاة العصر فرض إجماعا مع الاختلاف في وقتها قوله(: وترك البيع) أراد به كل عمل ينافي السعي وخصه اتباعا للآية نهر . . . قوله:( في الأصح) قال في شرح المنية. واختلفوا في المراد بالأذان الأول. . .  والأصح أنه الأول باعتبار الوقت، وهو الذي يكون على المنارة بعد الزوال. اهـ. (رد المحتار علی الدر المختار:2/ 161)

                                                وقال الامام ابن ھمام رحمہ اللہ: (وإذا أذن المؤذنون الأذان الأول ترك الناس البيع والشراء وتوجهوا إلى الجمعة) لقوله تعالى {فاسعوا إلى ذكرالله وذروا البيع} [الجمعة: 9] .(وإذا صعد الإمام المنبر جلس وأذن المؤذنون بين يدي المنبر) بذلك جرى التوارث ولم يكن على عهد رسول الله صلى الله عليه وسلم ، إلا هذا الأذان، ولهذا قيل: هو المعتبر في وجوب السعي وحرمة البيع، والأصح أن المعتبر هو الأول إذا كان بعد الزوال لحصول الإعلام به، والله أعلم.                                               

                                                                                                                                                                                                                                                                                                                                                (فتح القدير للكمال ابن الهمام :2/ 68)

وقال العلامۃ الشرنبلالی رحمہ اللہ: ويجب السعي للجمعة وترك البيع بالأذان الأول في الأصح

و" (يجب )بمعنى يفترض "ترك البيع" وكذا ترك كل شيء يؤدي إلى الاشتغال عن السعي إليها، أو يخل به، كالبيع ماشيا إليها لإطلاق الأمر "بالأذان الأول" الواقع بعد الزوال "في الأصح".

                                                                                                                                                                                                                                                                                                                                (مراقي الفلاح شرح نور الإيضاح : 197)

 محمد عثمان یوسف

     دارالافتاءجامعۃ الرشید کراچی

9ربیع الاول 1442ھ

واللہ سبحانہ وتعالی اعلم