سوال

کیا فرماتے ہیں مفتیان عظام  اس مسئلے کے بارے میں کہ ایک شخص اپنی     بیٹی کا نکاح  آئندہ ہفتے میں کرنا چاہتا    ہے،اب سوال یہ ہے کہ اس کے لیے  مہر کی صحیح مقدار شرعی کیا ہے؟    بيّنوا توجروا

اَلجَوَابْ بِاسْمِ مُلْہِمِ الصَّوَابْ

مہر  کی کم از  کم مقدار  دس درہم ہےجو کہ تقریباً  ساڑھے تین تولہ چاندی یا اس کی قیمت کے برابر ہے،جبکہ زیادہ سے زیادہ مقدار کی کوئی حد مقرر نہیں کی گئی لیکن فخر وغیرہ کے طور پر بہت زیادہ مہر مقرر کرنا جو کہ شوہر کی وسعت سے باہر ہویا  دینا   مقصود ہی نہ  ہو  بلکہ محض نمائش کے لیےہو،درست نہیں۔حدیث شریف میں اس کی ممانعت آئی ہے۔

               حضرت فاطمہ رضی اللہ عنہا اور آپ  صلی اللہ علیہ و سلم کی دیگر صاحبزادیوں کا مہر پانچ سو درہم مقرر ہوا  تھا اس کو مہر فاطمی کہا جاتا ہے۔گنجائش ہو تواس کی اتباع میں  مہر فاطمی  مقرر کرنا بہتر ہے ۔اگر اس کی  گنجائش نہ ہو تو لڑکے کی استطاعت اور لڑکی کے اکرام کو ملحوظ رکھتے ہوئے کوئی بھی مناسب مقدار طے کی جا سکتی ہے۔یاد رہے کہ بہت زیادہ مہر مقرر کرنا اور دینے کا ارادہ  نہ رکھنا  جیسے کہ آج کل رواج ہے،سخت گناہ  ہے۔

حوالہ جات

قال عمر بن الخطاب رضي الله تعالى عنه:"ألا لاتغالوا صدقة النساء.....ما علمت رسول الله صلى الله عليه وسلم نكح شيئا من نسائه،ولاأنكح شيئا من بناته على أكثر من ثنتي عشرة أُوقيةً".هذا حديث حسن صحيح.(جامع الترمذي،باب ما جاء في مهور النساء:1/211، مكتبةسعيد)

وعن أبي سلمة رضي الله  تعالى عنه قال:سألت عائشة:كم كان صداق النبي صلى الله عليه و سلم؟ قالت:كان صداقه لأزواجه  ثنتي عشرة أوقية ، ونَشًّا،قالت:أتدري مالنّشُّ؟  قلت:لا!  قالت: نصف أوقية  فتلك  خمس مائة   درهم.(صحيح مسلم،رقم الحديث:1426)

                          وعن جابر رضي الله تعالى عنه قال:سمعت رسول الله صلى الله عليه و سلم قال:"ولا مهر أقلّ من عشرة".(إعلاء السنن،بابٌ:لا مهر أقل من عشرة:11/81،إدارة القرآن كراتشي)

قال الإمام الحصكفي :أقلّه عشرة دراهم. ‏( الدرّالمختار‏:4 ‏/230،دارالكتب العلميّة بيروت)‏

وأقلّ المهر عشرة دراهم،ولو سمّى أقلّ من عشرة فلها العشرة عندنا. ‏(الهداية‏‏:‏2/37،مكتبة البشرى)‏

وقال ابن نجيم:(وأقلّه عشرة دراهم)أي أقلّ المهر؛شرعاً    للحديث:"لامهر أقلّ من عشرة دراهم" ..... ولأنّه حقّ الشرع وجوباً؛إظهاراً   لشرف المحلّ،فيُقدّربما له خطرٌ،وهوالعشرة؛استدلالاًبنصابالسرقة.

        (البحر   الرائق‏‏:‏2/249،مكتبة رشيدية)‏

ولی الرحمٰن     

دارالافتاء جامعۃ الرشیدکراچی                                                                                                     

16/ربیع الاول1442ھ

واللہ سبحانہ وتعالی اعلم