سوال

کیا فرماتے ہیں علمائے کرام اس مسئلے کے بارے میں کہ چار بھائی اور بہنیں ہیں ۔والد صاحب کا انتقال ہوچکا ہے۔والد صاحب کی زمین بہن بھائیوں میں تقسیم نہیں ہوئی۔بڑے بھائی نے بہنوں سے انگوٹھے کے نشان لگوائے۔انہیں کچھ پتہ نہ تھا کہ یہ کیوں لگوارہے ہیں۔یہ 1980کی بات ہے۔اس کے بعد تین بہنوں اور بڑے بھائی کا انتقال ہوا۔اب ان کی اولاد دوسرے بھائی سے اپنی والدہ کے حصے کا مطالبہ کررہی ہیں ۔کیا شرعا وہ مطالبہ کرسکتی ہیں ؟

اَلجَوَابْ بِاسْمِ مُلْہِمِ الصَّوَابْ

صورت مسئولہ میں وراثت کی تقسیم سے پہلے بہنوں کا اپنا حصہ معاف کرنا شرعا معتبر نہیں ہے، کیونکہ حق وراثت ایک جبری حق ہے ۔جو ساقط کرنے سے ساقط نہیں ہوتا ،اس لیےاب ان کی اولاد (بھانجے) اپنی والدہ کے حصے کا مطالبہ کرسکتی ہیں۔اوربھائی کو چاہیے کہ جائیداد کو شرعی اصولوں کے مطابق تقسیم کرکے ہر ایک وارث کو اپنا حصہ دیدے

حوالہ جات

قال العلامۃ ابن عابدین رحمہ اللہ:وفيها: ولو قال تركت حقي من الميراث أو برئت منها ومن حصتي لا يصح وهو على حقه؛لان الارث جبري لا يصح تركه.

(تكملة حاشية رد المحتار :ج 2 / ص 208)

    قال العلامۃ الحصکفی رحمہ اللہ : والثالث إما اختياري وهو الوصية, أو اضطراري وهو الميراث.   

                                                               (الدر المختار شرح تنوير الأبصار ،ص: 761)

قال العلامۃ الحموی رحمه اللہ فی فصل مایقبل الاسقاط من الحقوق ومالایقبلہ :لو قال الوارث:تركت حقي إلخ. اعلم أن الإعراض عن الملك أو حق الملك ضابطه:  أنه إن كان ملكا لازما لم يبطل بذلك كما لو مات عن ابنين، فقال أحدهما: تركت نصيبي من الميراث لم يبطل ؛لأنه لازم لا يترك بالترك.                                                                                                                                                                                                                                                            

 (غمز عيون البصائر في شرح الأشباه والنظائر :3/ 354)

زین الدین

دارالافتا ء،جامعۃالرشید ،کراچی

۵/ربیع الثانی    ۱۴۴۲ھ

واللہ سبحانہ وتعالی اعلم