سوال

میں نے ادھار زمین خرید لی، نقد رقم دو لاکھ اسی ہزار (280,000) روپے دے دیے۔ ماہانہ قسط بیس ہزار (20,000) روپے دے رہا ہوں۔ زمین کی ٹوٹل رقم جو میں نے ادا کرنی ہے وہ چونتیس لاکھ (3,400,000) ہے۔ ہمارے پاس ٹوٹل نقد رقم آٹھ لاکھ (800,000) روپے ہے۔ کیا ان حالات میں ہم پر زکوٰۃ ہے یا نہیں؟

اَلجَوَابْ بِاسْمِ مُلْہِمِ الصَّوَابْ

[سائل کے زبانی بیان کے مطابق مذکورہ آٹھ لاکھ روپے تجارتی مقصد کے لیے الگ سے رکھے گئے ہیں، گھر کے خرچے اپنی تنخواہ سے پورے کیے جاتے ہیں۔ اور خریدا گیا پلاٹ بھی تجارتی مقصد کے لیے ہے۔]

مذکورہ صورت میں قمری تاریخ کے جس دن زکوٰۃ ادا کرنے کا وقت آئے، اس دن مارکیٹ سے  اسی خریدے گئے پلاٹ کی موجودہ قیمتِ فروخت معلوم کی جائے، پھر جتنی قسطیں ابھی تک باقی ہیں ان کو اس پلاٹ کی موجودہ کل قیمت سے منہا کیا جائے، اس کے بعد جتنی رقم بنتی ہے اور قسطوں کی ادائیگی کے لیے جو رقم گھر میں رکھی ہوئی ہے یا اس کے علاوہ جو سونا، چاندی یا نقدی ہو، ان سب کو جمع کر کے ڈھائی فیصد (2.5%) کے حساب سے زکوٰۃ ادا کی جائے۔

لہذا یہ بات اچھی طرح ذہن نشین کر لینی چاہیے کہ مذکورہ آٹھ لاکھ روپیہ پر زکوٰۃ ہے۔ جو دن زکوٰۃ کی ادائیگی کے لیے مقرر ہو، اس دن (قسطوں کی ادائیگی کی غرض سے رکھی ہوئی) اس رقم سے جتنی رقم باقی ہو، اس میں سے زکوٰۃ ادا کی جائے گی۔

حوالہ جات

المحيط البرهاني في الفقه النعماني (2/ 245)

الزكاة واجبة في عروض التجارة بظاهر قوله تعالى: {خذ من أمولهم صدقة تطهرهم وتزكيهم بها وصل عليهم إن صلوتك سكن لهم والله سميع عليم} (التوبة: 103) واسم المال يتناول عروض التجارة...الخ

درر الحكام شرح غرر الأحكام (1/ 181)

والإشارة بهنا في كلام الجوهرة إلى باب زكاة السائمة؛ لأن اعتبار القيمة في السائمة يوم الأداء بالاتفاق والخلاف في زكاة المال فتعتبر القيمة وقت الأداء في زكاة المال على قولهما وهو الأظهر.

ناصر خان مندوخیل

دارالافتاء جامعۃالرشید کراچی

26/06/1442 ھ

واللہ سبحانہ وتعالی اعلم