سوال

بجلی اور گیس کا میٹر مسجد کے نام سے ہے، مدرسہ میں جو بجلی اور گیس استعمال کی جاتی ہے، کافی عرصہ سے اس کا بل مسجد کی آمدن سے ہی ادا کیا جاتا ہے، کیونکہ کوئی اور آمدن نہیں، کیا ایسا کرنا درست ہے؟

اَلجَوَابْ بِاسْمِ مُلْہِمِ الصَّوَابْ

اگر مسجد اور مدرسے کا چندہ ایک ساتھ ہوتا ہے تب تو مسجد میں آنے والی بجلی اور گیس کی لائن سے مدرسے میں بھی کنکشن دیا جاسکتا ہے اور استعمال کیا جاسکتا ہے۔ اگر الگ الگ چندہ ہوتا ہے تو مسجد کی چیزوں کو مدرسے میں استعمال کرنا جائز نہیں۔

مذکورہ مدرسہ چونکہ مسجد سے متصل ہے اور مسجد کی ہی زمین پر تعمیر کیا گیا ہے، یہ مدرسہ الگ سے کوئی حیثیت نہیں رکھتا، بلکہ مسجد کی ملکیت ہے، اس لیے مسجد کی بجلی اور گیس مدرسہ میں بھی استعمال کی جا سکتی ہے۔

بہتر یہ ہے کہ آپ نماز جمعہ کے بعد جو چندہ جمع کرتے ہیں، اس میں یہ اعلان بھی کر دیا کریں کہ یہ چندہ اس مسجد اور مدرسہ دونوں کے لیے ہورہا ہے۔

حوالہ جات

الدر المختار وحاشية ابن عابدين (رد المحتار) (4/ 430)

لأن مراعاة شرط الواقف لازم.

ناصر خان مندوخیل

دارالافتاء جامعۃالرشید کراچی

30/06/1442 ھ

واللہ سبحانہ وتعالی اعلم