سوال

السلام علیکم ورحمۃ اللہ وبرکاتہ

ایک  عورت کا اور اس کے باپ کا کہنا ہے کہ اسے اس کا خاوند مارتا پیٹتا تھا،لڑائی جھگڑے کے دوران کئی دفعہ طلاق بھی دی مگر وہ بعد میں انکار کرجاتا تھا،عورت نے دعویٰ تنسیخ کردیا جوکہ لف ھذا ہے وہ دعویٰ اس کے حق میں ڈگری ہوگیا۔اس نے عدت گزارنے کے بعد کسی اور جگہ نکاح کرلیا، اب برادری کے حالت بہتر ہیں ، بعض معززین کی رائے ہے کہ اب (موجودہ)خاوند  سے طلاق  لے  کر دوبارہ اس (سابقہ) خاوند سے نکاح کردیا جائے تاکہ جو لوگ تنسیخ کو نہیں مانتے وہ بھی مطمئن ہوجائیں ۔

جناب مفتی صاحب ! پوچھنا یہ ہے کہ کیا ایسا شرعاً ضروری ہے  یا نہیں ،دوسرا یہ کہ اگر ایسا  کرنا ضروری ہے  تو اب تک وہ عورت جو دوسرے خاوند  کے پاس رہی ہے اس کی سزا ہوگی یانہیں ؟اور یہ کہ اگر اس کے دوسرے خاوند  سے بچے ہوچکے ہوں  تو بچے کس کے شمار ہوں گے؟ پہلے خاوند کے یا دوسرے خاوند کے ؟ اور اب طلاق لینے کے بعد  دوبارہ عدت گزاری جائے گی (یا بغیر عدت کے نکاح ہوجائے گا)؟اللہ تعالیٰ جناب والا کو جزائے خیر عطا فرمائے رہنمائی فرما کر ہماری پریشانی دور فرمائیں۔

اَلجَوَابْ بِاسْمِ مُلْہِمِ الصَّوَابْ

صورت مسؤولہ میں اگر پہلے شوہر نے واقعتاً لڑائی جھگڑے کے دوران طلاقیں دی تھیں اور عورت نے دوسرے شوہر کے ساتھ نکاح پہلے شوہر کی عدت گزارنے کے بعد کیا تھا، تو ایسی صورت میں اس عورت کا دوسرا نکاح شرعاً درست ہے ، لہٰذا  اب اس دوسرے نکاح کو بلا وجہ ختم کرنا شرعاً ضروری بھی نہیں اور حکمت و مصلحت کا تقاضا بھی یہی معلوم ہوتا ہے کہ اگر خاتون دوسرے شوہر کے پاس خوش وخرم زندگی  گزار رہی ہے تو بلاوجہ اس نکاح کو ختم کرنے کی تدابیر اختیارنہ کی جائیں،اور جب یہ دوسرا نکاح جائز تھا تو میاں بیوی کا آپس میں ساتھ رہنا بھی جائز ہے  اور دوسرے شوہر سے جو اولاد ہوئی ہے وہ دوسرے شوہر ہی کی سمجھی جائے گی۔

حوالہ جات

الدر المختار وحاشية ابن عابدين (رد المحتار) (3/ 244)

ويقع الطلاق من غضب خلافا لابن القيم اهـ وهذا الموافق عندنا لما مر في المدهوش.

الدر المختار وحاشية ابن عابدين (رد المحتار) (3/ 235)

(ويقع طلاق كل زوج بالغ عاقل) ولو تقديرا بدائع.

الدر المختار وحاشية ابن عابدين (رد المحتار) (3/ 241)

(أو مخطئا) بأن أراد التكلم بغير الطلاق فجرى على لسانه الطلاق أو تلفظ به غير عالم بمعناه أو غافلا أو ساهيا .

الدر المختار وحاشية ابن عابدين (رد المحتار) (3/ 220)

ولها التزوج بعد العدة.

البناية شرح الهداية (5/ 246)

ولا يجوز لها التزوج إلا بعد العدة.

الدر المختار وحاشية ابن عابدين (رد المحتار) (3/ 552)

فالولد للفراش.

محمد حمزہ سلیمان

دارالافتا ء،جامعۃالرشید ،کراچی

۰۹/جمادی الثانی۱۴۴۳ھ

واللہ سبحانہ وتعالی اعلم