سوال

مال میراث فوراً تقسیم کرنا چاہیے یا اس میں تاخیر کی گنجائش ہے؟اگر فوراً تقسیم نہیں کیا گیا تو  کیا اس کی وجہ سےگناہ ہوگا؟

اَلجَوَابْ بِاسْمِ مُلْہِمِ الصَّوَابْ

میراث کی تقسیم کے حوالے سے بہتر یہ ہے کہ انتقال کے بعد جتنی جلد ہوسکے مرنے والے کا مال اس کے ورثہ میں شرعی حصوں کے مطابق تقسیم کردیا جائے،تاکہ ہر وارث کو اس کا شرعی حق مل جائے اور ایک دوسرے کے حقوق کی پامالی کا اندیشہ نہ رہے،البتہ اگر کسی معقول عذر کی وجہ سےتمام ورثہ باہمی رضامندی سے تقسیم کو مؤخر کرنا چاہتے ہوں تو اس میں بھی کوئی حرج نہیں،بشرطیکہ تمام ورثہ عاقل بالغ ہوں،کیونکہ نابالغ کی اجازت شرعاً معتبر نہیں ہے۔

نیز تقسیم کی تاخیر کی صورت میں مشترکہ جائیداد کے استعمال،کاروبار اور منافع کے حوالے سے باہمی رضامندی سے تمام معاملات طے کرلیے جائیں،تاکہ بعد میں اختلاف اور جھگڑے کی نوبت نہ آئے۔

حوالہ جات

۔۔۔۔۔۔۔۔۔۔۔

محمد طارق

دارالافتاءجامعۃالرشید

02/محرم1443ھ

واللہ سبحانہ وتعالی اعلم