سوال

سالانہ تقریب ختم قرآن کے موقع پر ختم کرنے والے طلبہ و طالبات کے والدین سے وصول کی جانے والی رقم اگر تقریب کے اخراجات سے اضافی بچ جائے تو کیا مدرسے کا مہتمم اس رقم کو ذاتی استعمال یا مدرسے کے اساتذہ کے لئے تفریحی پروگرام یا اساتذہ کے لئے ہدایا خریدنے میں استعمال کرسکتا ہے؟

اَلجَوَابْ بِاسْمِ مُلْہِمِ الصَّوَابْ

واضح رہے کہ اس قسم کی تقاریب مدرسہ کے کام اور معیار کی تشہیر اور ختم کرنے والے طلبہ کی حوصلہ افزائی کے لئے منعقد کی جاتی ہیں،اس لئے طلبہ کے والدین کو اس طرح کی تقاریب کے لئے چندہ دینے پر مجبور نہیں کیا جاسکتا،کیونکہ کسی کا مال اس دلی رضامندی کے بغیر استعمال میں لانا جائز نہیں،البتہ صرف ترغیب دی جاسکتی ہے،پھر جو والدین بخوشی اس مد میں تعاون کرنا چاہیں تو ان سے تعاون لیا جاسکتا ہے۔

پھر جو رقم اضافی بچ جائے اسے کسی اور مصرف میں استعمال نہیں کیا جاسکتا،الا یہ کہ دینے والوں کی طرف سے صراحةً یا دلالةً اس کی اجازت موجود ہو،دلالةً اجازت کا مطلب یہ ہے کہ دینے والا ایسا شخص ہو جس کی طرف سے اجازت کے بارے میں آپ کو یقین یا غالب گمان ہو۔

اس لئے بہتر یہ ہے کہ اس مد میں چندہ جمع کرتے وقت ہی دینے والوں سے اس کی اجازت لے لی جائے،جس کا آسان طریقہ یہ ہے کہ اس طرح کے مواقع پر دی جانے والی رسید پر ایک نوٹ لکھ لیا جائے کہ اضافی بچ جانے والی رقم کو مدرسہ کی انتظامیہ اپنی صوابدید کے مطابق کسی اورمصرف میں استعمال کرنے کی مجاز ہوگی۔

حوالہ جات

"الفتاوى الهندية" (2/ 464):

"ولو أن قوما بنوا مسجدا وفضل من خشبهم شيء، قالوا: يصرف الفاضل في بنائه ولا يصرف إلى الدهن والحصير، هذا إذا سلموه إلى المتولي ليبني به المسجد وإلا يكون الفاضل لهم يصنعون به ما شاءوا، كذا في البحر الرائق ناقلا عن الإسعاف".

"البحر الرائق " (5/ 271):

" ولو أن قوما بنوا مسجدا وفضل من خشبهم شيء قالوا يصرف الفاضل في بنائه ولا يصرف إلى الدهن والحصر هذا إذا سلموه إلى المتولي ليبني به المسجد وإلا يكون الفاضل لهم يصنعون به ما شاءوا".

محمد طارق

دارالافتاءجامعۃالرشید

22/صفر1444ھ

واللہ سبحانہ وتعالی اعلم