سوال

السلام علیکم ورحمۃ اللہ وبرکاتہ !

            بعد از سلام عرض یہ  ہیکہ  دو بندوں  نے   آپس  کی مفاہمت سے باڑے کا کاروبار شروع کیا  جس کا خرچہ 42,20000/=( 42 لاکھ ،20 ہزار)  روپے  آیا ۔  جس  کے مطا بق  ہر شریک   پر/= 2110000 (21 لاکھ ،10  ہزار)  روپے آئے ۔  ایک فریق  نے صرف/=  1800000 (18 لاکھ)  رو پے دیئے  اور  بقیہ/= 310000 روپے (تین  لاکھ ، 10 ہزار) اس  کے ذمے  باقی  تھے۔ پھر ایک  مہینے بعد  وہ انکاری ہوگیا  کہ  میں نفع ونقصان میں شریک  نہیں ہوں۔ اب وہ بندہ اپنا ٹوٹل  رقم واپس لینا چاہتا ہے  اور دوسرے  فریق  کے پاس نقد رقم  بھی نہیں ہے ۔  اب  پوچھنا یہ ہے کہ  رقم  نہ ہونے  کی صورت  میں  مال بیچنا پڑے گا  اور مال  بیچنے  کے بعد  جو نقصان  ہوگا  وہ  ایک پر ہوگا یا دونوں پر؟ حالانکہ   ابھی  تک  کاروبار نے  کوئی  نفع بھی  نہیں کمایا۔

ازراہ کرم شریعت کی روشنی  میں  ہمارے   مابین مسئلے کو  حل فرمائیں!

اَلجَوَابْ بِاسْمِ مُلْہِمِ الصَّوَابْ

باڑے  کا کاروبار شروع  کرنے کے بعد  اگر  کوئی  ایک شریک  شراکت داری  کا معاملہ  ختم کرنا چاہے  تو شرعا   وہ دوسرے  فریق  کی رضامندی  کے بغیر  یہ  معاملہ  ختم کرسکتا ہے ۔ شراکت داری  کے ختم  ہونے  کے نتیجے  میں  دوسرے فریق  پر لازم  ہے  کہ وہ فورا    مشترکہ اشیاء کی  تقسیم کو  یقینی  بنائے۔  بغیر  کسی شرعی  عذر  کے  مزید  تاخیر سے کام نہ لے ۔  اشیاء  کی  تقسیم کی صورت  یہ ہوگی کہ شراکت  داری  قائم کرتے وقت  جانبین  سے   سرمایہ اکھٹا  کرکے  باڑے  کیلئے جو سازوسامان  خریدا گیا تھا ۔ اگر وہ سامان  بعینہ  اسی  طرح موجود  ہے  تو   ان  کو  باہمی رضامندی سے   ہر شریک  کے سرمائے  کے تناسب   سے  بعینہ  تقسیم کیا  جائے     یا پورے    سامان  کو   بیچا  جائے  اور  قیمت  شرکاء کے درمیان  تقسیم کی جائے۔  سامان  کے علاوہ  اگر  کوئی رقم  کیش  کی صورت  میں  موجود ہو  تو  اس  رقم کو  بعینہ   تقسیم کیا  جائے۔  بالفرض  اگر   تقسیم کے بعد کاروبار  کسی  قسم  کے نقصان  سے دوچار ہوجاتا  ہے  اور  کوئی  نفع  سامنے  نہیں آتا  تو   دونوں شریک اپنے سرمائے کے تناسب سے  اس نقصان کے ذمہ دار ہوں گے ۔  کاروبار  میں شراکت داری  کے بعد  کوئی ایک فریق  یہ  کہہ  کر اپنی  ذمہ داری سے دستبردار  نہیں ہوسکتا  کہ  میں نفع ونقصان  میں شریک نہیں ہوں  بلکہ جتنا عرصہ اس کا پیسہ   کاروبار  میں لگارہا  اور اس دوران  جو بھی نقصان ہوا  وہ اسے بہر صورت  برداشت کرے گا۔

             واضح  رہے  اگر  کوئی ایک شریک   اپنی رضامندی سے  کاروبار  ختم کرکے  اپنے  حصے  کا مطالبہ کررہاہے تو دوسرے شریک  پر  لازم  ہے  کہ  وہ  اپنے شریک  کا حصہ اس کے  حوالے  کرے ۔ اگر  کاروبار  میں نقد رقم موجود  نہیں ہے  تو   باڑے  میں موجود سامان  کو بیچا جائے  اور  کیش رقم  اس کے حوالے کی جائے۔

حوالہ جات

بدائع الصنائع في ترتيب الشرائع (6/ 62)

 والوضيعة على قدر المالين متساويا ومتفاضلا؛ لأن الوضيعة اسم لجزء هالك من المال فيتقدر بقدر المال.

درر الحكام في شرح مجلة الأحكام (3/ 370)

المادة (1353) - (تنفسخ الشركة بفسخ أحد الشريكين، ولكن يشترط أن يعلم الآخر بفسخه، ولا تنفسخ الشركة ما لم يعلم الآخر بفسخ الشريك)

تنفسخ الشركة بفسخ أحد الشريكين أو بإنكاره الشركة أو بقول أحدهما للآخر لا أعمل معك فإنه بمنزلة فاسختك وتنفسخ ولو كان مال الشركة موجودا في حالة العروض.

أما الحكم في المضاربة فهو غير ذلك انظر المادة (الـ 1424) وانفساخ الشركة بإنكار أحد الشريكين لها مبني على المادة (الـ 901) ، ولذلك فالشريك المنكر يضمن حصة شريكه الآخر (البحر والطحطاوي) .ويتفرع عن انفساخ الشركة بقول أحد الشريكين للآخر " لا أعمل معك " هذه المسألة وهي:

إذا قال أحد الشريكين للآخر بعد عقد الشركة وبعد شراء أمتعة للشركة: لا أعمل معك ثم غاب فباع الشريك الحاضر الأمتعة المذكورة فيكون الربح الحاصل للشريك البائع ويجب عليه ضمان بدل تلك الأمتعة للغائب لأن قوله لا أعمل معك هو فسخ للشركة وأحد الشريكين مالك لحق فسخ الشركة حتى لو كان مال الشركة عروضا بخلاف المضاربة وهو المختار (البحر ورد المحتار) .

    محمدنصیر

      دارالافتا ءجامعۃالرشید کراچی

       07/جمادی الثانیہ/1444ھ              

واللہ سبحانہ وتعالی اعلم