سوال

گذارش ہے کہ ہم  دس پندرہ  سال سےایک  کرایہ کےمکان میں رہ رہے ہیں ،جس میں کرایہ  کے علاوہ  بجلی کا بل بھی ہمیں   بھرنا پڑتا ہے ، بجلی کےبل میں موٹر  کا بل بھی شامل ہے ، موٹر  کا استعمال چھ  فیملی  کرتی ہے ، اب ہمارا مالک مکان  سے مطالبہ    ہے  کہ موٹر   کے بل کو   چھ فیملیوں  پر تقسیم  کیا جائے  مگر  مالک کہتا   ہے کہ   موٹر  خراب  ہوتا ہے    تو  مالک خود ٹھیک  کرتا ہے اس لئے  موٹر کا بل  اسی  طرح  وصول  ہوگا   جس طرح   پہلے سے  چلا آرہا ہے ۔

اب سوال یہ ہے کہ   مالک  مکان  کا مذکورہ طریقے پر   بل  وصول کرناجائز ہے یانہیں؟

اَلجَوَابْ بِاسْمِ مُلْہِمِ الصَّوَابْ

کرایہ  داری کا معاملہ   صحیح  ہونے  کے  لئے   اجرت  کا متعین   ہونا ضروری  ہے تاکہ   بعد میں آپس   میں جھگڑا   پیدا   نہ ہو       مسئولہ صورت میں    ایک  تو  مکان کا ماہانہ  متعین کرایہ  ہے ،دوسرا موٹر کا   بل تین گھر    ادا کریں   گے   اگر چہ  موٹر کا استعمال  چھ  گھر  والے  کریں گے،چونکہ اس طرح  معا ہدہ  کرنے  کی صورت میں  اس  بات  کا واضح  امکان  موجود ہے  کہ  موٹر کے  زیادہ استعمال کی وجہ سے یہ بل زیادہ   آنے کی صورت میں آپس میں  جھگڑا ہو، نیز جب بل موٹر کے استعمال کا خرچ ہے اور  موٹر کا استعمال چھ گھر کرتے ہیں  تو چھ گھروں  کے موٹر کا خرچ   تین گھروں  کے ذمہ لگانے کی شرط  عقد  اجارہ کے مقتضی کے خلاف   ہے ،اس  لئے کرایہ کے ساتھ مقتضی  عقد کے خلاف اس  طرح  کی  مجہول شرط   لگانا    شرط فاسد  ہے ،  لہذا اس شرط کو ختم کرکے جائز شرائط کے ساتھ نئے سرے سے معاہدہ کرنا  طرفین پر لازم ہے ،جس میں  مالک  مکان  یہ صورت   اختیار کرسکتا   ہے کہ موٹر  کا بل  شامل کرکے  ماہانہ کرایہ میں مناسب اضافہ کرےاور پھر موٹر  کا بل اپنے ذمہ  لے،  یا یہ کہ موٹر  کی مرمت  ومنٹینس اخراجات  سمیتموٹر  کا بل   تقسیم کرکے  سب گھر والوں   سے برابر   وصول  کرنا طئے کرلیں   تاکہ کرایہ داری  کا  معاملہ شرعی  اصول کے مطابق  جائز ہوجائے ۔   

حوالہ جات

الدر المختار وحاشية ابن عابدين (رد المحتار) (6/ 5)

أفاد أن ركنها الإيجاب والقبول.وشرطها كون الأجرة والمنفعة معلومتين؛ لأن جهالتهما تفضي إلى المنازعة.

﴿قوله كون الأجرة والمنفعة معلومتين) أما الأول فكقوله بكذا دراهم أو دنانير وينصرف إلى غالب نقد البلد، فلو الغلبة مختلفة فسدت الإجارة ما لم يبين نقدا منها فلو كانت كيليا أو وزنيا أو عدديا متقاربا فالشرط بيان القدر والصفة وكذا مكان الإيفاء لو له حمل ومؤنة عنده، وإلا فلا يحتاج إليه كبيان الأجل، ولو كانت ثيابا أو عروضا فالشرط بيان الأجل والقدر والصفة لو غير مشار إليها، ولو كانت حيوانا فلا يجوز إلا أن يكون معينا بحر ملخصا.

احسان اللہ شائق عفا اللہ عنہ    

دارالافتاء جامعة الرشید    کراچی

١۲ جمادی الثانیہ  ١۴۴۴ھ

واللہ سبحانہ وتعالی اعلم