سوال

عرض یہ ہے کہ  ہمارے گاؤں دیہاتوں میں  جب فوتگی ہوجاتی ہے   تو  دعا کے لئے ہمارے لوگ  مسجد وں  میں بیٹھتے  ہیں ، اب لوگ کہتے  ہیں  کہ  مسجد کے اندر بیٹھنے کے لئے کرسیاں لیکر  آئیں گے،چاہے خریدیں  یا کرایہ پر  لیکر آئیں ۔تو  تعزیت  کے موقع پر اسطرح   باقاعدہ  کرسی لگاکر  مسجد میں  بیٹھنے  کا کیا  حکم ہے؟جب  کہ اس موقع پر  گپ شپ بھی ہوتی  اور چائے پانی  بھی  چلتا  رہتا ہے ،اور کھانے  کے موقع پر  کھانے کا بھی انتظام ہوتا  ہے ۔

اَلجَوَابْ بِاسْمِ مُلْہِمِ الصَّوَابْ

مسجد میں  باقاعدہ   طور پر   تعزیت  کے لئے  بیٹھنا     مکروہ  ہے  کیونکہ مسجد نماز  ،دعا،اورذکر وتلاوت وغیرہ  عبادات  کی جگہ  ہے ، پھر  چونکہ آج کے  دور میں لوگوں  میں دینی  رجحان میں کمی  پیدا ہونے کی  وجہ سے مسجد  کے  آداب   کے لحا ظ  میں   بھی   کمی  آچکی ہے ،  تعزیت  کے لئے  مسجد میں بیٹھنے  کی  صورت میں   ،گپ شپ   شور  شرابہ   اورکھانے   پینےکا بازاری  ماحول  سا بن جاتا ہے،ایسے  ماحول  میں مسجد  کے آداب  کا  لحاظ  صحیح  معنی  میں ہو نہیں  پاتا   ، پھر اگر  اس مقصد  کے کرسیاں  بھی لگالی  جائیں   تو  مسجد  کا رہاسہا  ادب  بھی ختم  ہوجائے گا  ،اس  لئے  مسجد میں     کرسی  لگامستقل طور پر تعزیت کے لئے   بیٹھنا  جائز نہیں خصوصا  کھانے  پینے  کے لوازمات  بھی ساتھ  ہوں،لہذا  اس سے  اجتناب  بہت ضروری  ہے،بلکہ تعزیت  کے موقع پر   اس طرح  کا ماحول  گھر میں  بھی   نہ بنایا  جائے ۔ البتہ  اہل  میت میں  سے کوئی  نماز پڑھنے کے لئے  مسجد گیا   اور  وہاں  ایسے لوگ   ملے  جنہوں  نے  پہلے تعزیت نہیں  کی   تھی  توایسے لوگوں  کا   مسجد میں تعزیت کرنا  درست ہے ۔

حوالہ جات

الدر المختار وحاشية ابن عابدين (رد المحتار) (2/ 241)

(قوله: في غير مسجد) أما فيه فيكره كما في البحر عن المجتبى، وجزم به في شرح المنية والفتح، لكن في الظهيرية: لا بأس به لأهل الميت في البيت أو المسجد والناس يأتونهم ويعزونهم. اهـ.

قلت: وما في البحر من «أنه - صلى الله عليه وسلم - جلس لما قتل جعفر وزيد بن حارثة والناس يأتون ويعزونه» اهـ يجاب عنه بأن جلوسه - صلى الله عليه وسلم - لم يكن مقصودا للتعزية. وفي الإمداد: وقال كثير من متأخري أئمتنا يكره الاجتماع عند صاحب البيت ويكره له الجلوس في بيته حتى يأتي إليه من يعزي، بل إذا فرغ ورجع الناس من الدفن فليتفرقوا ويشتغل الناس بأمورهم وصاحب البيت بأمره اهـ.

قلت: وهل تنتفي الكراهة بالجلوس في المسجد وقراءة القرآن حتى إذا فرغوا قام ولي الميت وعزاه الناس كما يفعل في زماننا الظاهر؟ لا لكون الجلوس مقصودا للتعزية لا القراءة ولا سيما إذا كان هذا الاجتماع والجلوس في المقبرة فوق القبور المدثورة، ولا حول ولا قوة إلا بالله

 احسان اللہ شائق عفا اللہ عنہ    

دارالافتاء جامعة الرشید     کراچی

۲۸ جمادی  لثانیہ  ١۴۴۴ھ

واللہ سبحانہ وتعالی اعلم