سوال

اگر مطلقہ عدّت اپنے والد کے گھر پر گزار رہی ہو اور شوہر کے گھر میں عدّت گزارنا ممکن نہ ہو تو کیا عورت اپنے بھائی،والدہ اور سگے ماموں کے ساتھ آکر شوہر کے گھرسےضروری سامان لیکر جاسکتی ہے۔

اَلجَوَابْ بِاسْمِ مُلْہِمِ الصَّوَابْ

واضح رہے کہ عدت ِطلاق میں بیٹھی ہوئی عورت کیلئے عذرِ شرعی (جیسے غیر معمولی بیماری میں چیک اپ کے لئے ڈاکٹر کے پاس جاناہو یا گھر کے منہدم ہونے کا خطرہ ہو وغیرہ)کے بغیرگھر سے نکلنا جائزنہیں ہے،اسی طرح کسبِ معاش کے لئے بھی اجازت نہیں کیونکہ مطلقہ کاخرچہ عدت میں شوہر کے ذمہ لازم ہے۔

لہٰذا صورتِ مسؤلہ میں جب ضروری سامان لینے کے لئے مطلقہ کے گھروالوں(بھائی ،والدہ یا ماموں )میں سے کوئی جاسکتا ہے تو انہیں کو جانا چاہئے،معتدہ کے لئے ایسے میں گھر سے باہر جانا جائز نہیں ہے۔

حوالہ جات

الدر المختار وحاشية ابن عابدين (رد المحتار) (3/ 536)

(وتعتدان) أي معتدة طلاق وموت (في بيت وجبت فيه) ولا يخرجان منه (إلا أن تخرج أو يتهدم المنزل، أو تخاف) انهدامه، أو (تلف مالها، أو لا تجد كراء البيت) ونحو ذلك من الضرورات فتخرج لأقرب موضع إليه۔

الفتاوى الهندية (1/ 557)

 المعتدة عن الطلاق تستحق النفقة والسكنى كان الطلاق رجعيا أو بائنا، أو ثلاثا حاملا كانت المرأة، أو لم تكن كذا في فتاوى قاضي خان۔

محمدمصطفیٰ رضا

دارالافتا ءجامعۃالرشید کراچی

26/رجب/1444ھ

واللہ سبحانہ وتعالی اعلم