سوال

میری شادی سے متعلق ایک سوال ہے۔ مجھے اپنے دفتر میں ایک لڑکی پسند ہے، وہ میری کولیگ (جونیئر) ہے۔ وہ بہت مہذب، خوش اخلاق اور تعلیم یافتہ شخص ہے اور اسلام کی پیروی کرتی ہے، میں نے اسے بتایا کہ میں اسے پسند کرتا ہوں اور اس سے شادی کرنا چاہتا ہوں، اس نے کہا "ٹھیک ہے ہم چیک کر سکتے ہیں کہ ہم مطابقت رکھتے ہیں یا نہیں؟"اس کے بعد ہم نے ایک دوسرے کو جاننے کے لیے کچھ دن باتیں کیں۔ جب میں نے اس کے خاندان کے بارے میں پوچھا تو مجھے لگا کہ وہ ہمارے مقابلے میں سماجی حیثیت میں قدرے کم ہوں گے اور طرز زندگی اور معیارات میں کچھ فرق ہوگا، لیکن میں نے سوچا کہ یہ قابل قبول ہوگا۔ اسے دیکھ کر، میں نے کبھی محسوس نہیں کیا کہ خاندانوں کے درمیان کوئی بڑا فرق ہو گا،کیونکہ اس کی شخصیت (یعنی آداب، بولنے کا انداز، لباس وغیرہ) ٹھیک ہے۔ یہ محسوس کرنے کے بعد کہ ہم مطابقت رکھتے ہیں، ہم نے اپنے والدین کو ایک دوسرے کے بارے میں بتانے کا فیصلہ کیا کیونکہ ہم شروع سے ہی والدین کو شامل کرنا چاہتے تھے۔ حال ہی میں، جب میں اور والدین اس کے خاندان سے ملے، تو ہم نے محسوس کیا کہ خاندانوں کے درمیان کچھ بڑے اختلافات تھے۔ مجھے مالی اختلافات، تعلیمی اختلافات،جس طرح کی جگہ جہاں وہ رہتے ہیں اور جہاں ہم رہتے ہیں اس میں فرق کے بارے میں پہلے سے ہی اندازہ تھا، لیکن اختلافات میری توقع سے زیادہ ہیں۔ سب سے بڑا فرق خاندان کے افراد اورانکی شخصیت میں فرق تھا۔ میرے خاندان کے افراد مہذب، اعلیٰ تعلیم یافتہ، آداب اور محفل میں بات کرنے، لباس پہننے اور برتاؤ کرنے کا طریقہ جانتے تھے، لیکن اس کے خاندان کے افراد کااس قسم کامعیار نہیں تھا،میرا خاندان مشورہ دے رہا ہے کہ مالی اور تعلیمی اختلافات پر سمجھوتہ کیا جا سکتا ہے کیونکہ لڑکی خود اچھی ہے اور اس کے اخلاق میں شائستگی ہے اور اسے ہمارے گھر میں ایڈجسٹ کیا جا سکتا ہے، لیکن شخصیات میں فرق بنیادی تشویش ہے، اس کا خاندان بالکل مختلف ہے اور مستقبل میں جب اس کا خاندان ہماری محفلوں میں آئے گایا جب ہم ان سے ملیں گے تو عجیب حالات ہوں گے،ہم محفلوں میں شرمندہ ہوں گےکہ  کوئی یہ کہے کہ میں نے اس خاندان میں شادی کیوں کی؟ اسی طرح وہ بھی شرمندہ ہوں گے جب وہ ہماری محفلوں میں اجنبیت محسوس کریں گے۔ میں بہت پریشان ہوں کیونکہ لڑکی خود بہت اچھی اور سمجھوتہ کرنے والی ہے اور ہمیشہ عزت دیتی ہے (جو کہ سب سے اہم چیز ہے)۔ لیکن اس کا خاندان معیار اور حیثیت میں پست ہے۔ براہ کرم میری مدد کریں کیونکہ میں اس بارے میں بہت پریشان ہوں۔ شکریہ

اَلجَوَابْ بِاسْمِ مُلْہِمِ الصَّوَابْ

اسلام دین داری کی بنیاد پر رشتہ نکاح  قائم کرنےکی ترغیب دیتا ہے،  اسلامی تعلیمات کے مطابق دنیوی لحاظ سے اپنے سے کم حیثیت والے خاندان کی لڑکی سے نکاح کرنا برا نہیں ، اگر شادی دین داری کے بجائے محض ظاہری حسن یا محبت اور سلیقہ مندی وغیرہ کی بنیاد پر ہو تو ایسی صورت میں ایسے رشتہ پر اصرار شرعی لحاظ سےمناسب نہیں، باقی دین داری کے بعد دنیاوی لحاظ سے کوئی جس قدر بھی کم حیثیت ہو، اس سے رشتہ یا تعلق قائم کرنے یا باقی رکھنے کو برا سمجھنا اسلامی تعلیمات کے منافی ہے، اسلام تقوی اور دینداری کی بنیاد پر عزت دینے اور ترجیح دینےکا قائل ہے، چنانچہ اکثرانبیاء علیھم السلام اور ان کے ماننے والوں کی اکثریت مالی لحاظ سے کم حیثیت لوگوں کے طبقہ پر مشتمل تھی۔

 اس لیے اگر مذکورہ لڑکی اور اس کے خاندان میں دین داری کے لحاظ سے کوئی کمی نہیں ہے تو مالی کمزوری کو عیب سمجھنا غلط ہے، تاہم اگر آپ سمجھتے ہیں کہ آپ کے خاندان والے ناسمجھداری کی وجہ سے اس لڑکی یا اس کے خاندان سے کمتر سلوک کریں گے اور رشتہ برقرار رکھنے میں مشکلات پیش آئیں گی تو اس جگہ شادی کرنا ضروری بھی نہیں۔

حوالہ جات

۔۔۔۔۔۔

نواب الدین

دار الافتاء جامعۃ الرشید کراچی

۱۸ذیقعدہ۱۴۴۴ھ

واللہ سبحانہ وتعالی اعلم