سوال

کیافرماتے ہیں علماء کرام اس مسئلہ کے بارے میں کہ

آج سے کچھ عرصہ قبل ہمارے والد صاحب جن کا نام قاری عبد الرحمن ہے نے اپنا ملکیتی پلاٹ بیچ کر ہم بھائیوں میں رقم تقسیم کردی اوراس میں ہماری والدہ صاحبہ کو حصہ دیا جس مین انہوں نے اپنی ضروریاتِ زندگی پر خرچ کیا اورجب وہ بیمارہوئی تو  میں اپنے پاس لے آیا،اوربیماری میں ان کے علاج پر خرچ ہوتارہا اوراسی اثنامین ان کا انتقال ہوگیا تجہیزوتکفین کے بعد ان کے حصے کی رقم 5لاکھ روپے بچی اورہماری والدہ کے پاس زیورتھاجو ہمارے نانا(والدہ صاحبہ کے والد) نے دیا تھا اس زیورکوہمارے عرف میں کانٹاکہتے ہیں جسے عورتیں کانوں میں پہنتی ہیں ہماری والدہ نے ایک عددکانٹا اپنی زندگی میں وفات سے پانچ،چھ سال پہلے ہمارے ماموں کو دیا تھا، اس وقت ہمارے اس 5لاکھ روپے نقد اورایک عدد کانٹا ہے اوروالدہ صاحبہ کی تجہیز وتکفین پرخرچ کس کا حق ہے اوران اشیاء کی تقسیم کے بارے  میں آگاہ فرمائیں اس وقت والدہ مرحومہ کے ورثہ میں ہمارے والد اورہم چاربھائی ہیں اوربہن ہماری کوئی نہیں ہے ،بھائیوں میں سے تین کی شادیاں ہوچکی ہیں اورایک غیرشادی شدہے، اس تقسیم میں ہماری رہنمائی فرمائیں ۔

اَلجَوَابْ بِاسْمِ مُلْہِمِ الصَّوَابْ

 صورتِ مسئولہ میں آپ کی والدہ مرحومہ کے کفن دفن کے متوسط اخراجات راحج قول کے مطابق آپ کے والد یعنی مرحومہ کے شوہر پر ہونگے، لیکن اگرآپ کے والد یعنی مرحومہ کے شوہر اس کی تجہیز و تکفین کا خرچہ برداشت کرنے کی وسعت نہیں رکھتے  تو پھرمرحومہ کی ترکہ سے تجہیز وتکفین کاخرچہ لیاجائےگا۔

 تجہیزاورتکفین کےبعد ،قرض اوروصیت (اگرکی ہو)کی ادائیگی علی الترتیب مرحومہ کے مال سےہوگی،اوراس کےبعدورثہ میں باقی ترکہ تقسیم ہوگا،جس کی تفصیل یہ ہے کہ اگرمرحومہ کےانتقال کے وقت صرف یہی لوگ ہوں جوسوال میں مذکور ہیں ہوں توکل منقولہ غیرمنقولہ  ترکہ  کو 16برابر حصوں پر تقسیم کرکےان میں سےمرحومہ کے شوہر کو4حصےیعنی %25،اور ہربیٹے کو3حصے یعنی%18.75دیئے جائیں گے۔

تجہیزوتکفین کا خرچہ جیسے کہ اوپر لکھ دیا گیا ہے مرحومہ کے مال سے ہوگا،البتہ اگرکسی نے یہ خرچہ تبرعاً اپنی طرف سے اداکیا ہو تو پھرمرحومہ کے مال وہ منہانہیں ہوگا۔

حوالہ جات

حاشیة الطحطاوی علی مراقی الفلاح: (باب احکام الجنائز، ص: 573)

(وعلی الرجل تجهيز امراته) اي تكفينها ودفنها.... ولو كان الزوج معسرا وهي موسرۃ في الاصح وعليه الفتوى، ومن مات ولا مال له فكفنه على من تلزمہ نفقته من اقاربه.... قوله (ولا مال له) قيد به لانه لو كان له مال فانه يجب فيه ويقدم على الدين.

وفی الشامیة:

"واختلف في الزوج، والفتویٰ علی وجوب کفنہا علیه عند الثاني، وإن ترکت مالاً (الدر المختار) …  أنه یلزمه کفنہا وإن ترکت مالاً وعلیه الفتویٰ".(كتاب الصلاة، باب صلاة الجنازة، 2/ 206، ط: سعيد)

وفی فتاوی ھندیة :

"یجب الکفن علی الزوج وإن ترکت مالاً وعلیه الفتویٰ".(کتاب الصلاۃ،  الباب الحادي والعشرون في الجنائز، 1/ 141، ط: رشيدية)

قال في كنز الدقائق :

"يبدأ من تركة الميّت بتجهيزه ثمّ ديونه ثمّ وصيّته ثمّ تقسم بين ورثته،وهم:ذو فرضٍ أي ذو سهمٍ مقدّرٍ."  (ص:696, المكتبة الشاملة)

قال للہ تعالی:

{يُوصِيكُمُ اللَّهُ فِي أَوْلَادِكُمْ لِلذَّكَرِ مِثْلُ حَظِّ الْأُنْثَيَيْنِ .........وَلَكُمْ نِصْفُ مَا تَرَكَ أَزْوَاجُكُمْ إِنْ لَمْ يَكُنْ لَهُنَّ وَلَدٌ فَإِنْ كَانَ لَهُنَّ وَلَدٌ فَلَكُمُ الرُّبُعُ مِمَّا تَرَكْنَ مِنْ بَعْدِ وَصِيَّةٍ يُوصِينَ بِهَا أَوْ دَيْنٍ...... }             [النساء: 12, 11]

وفی البحر الرائق (8/ 567)

 والعصبة أربعة أصناف: عصبة بنفسه وهو جزء الميت وأصله وجزء أبيه وجزء جده الأقرب.

السراجی فی المیراث(ص:۳۶)

العصبات النسبیۃ ثلاثۃ ۔۔۔۔۔۔فکل ذکر لا تدخل فی نسبتہ الی المیت انثی ، وھم ٲربعۃ : جزء المیت ، واصلہ وجزء ابیہ، اجزء جدہ، الأقرب فالاقرب .

سیدحکیم شاہ عفی عنہ

دارالافتاء جامعۃ الرشید

 1/4/1445ھ

واللہ سبحانہ وتعالی اعلم