سوال

کیافرماتے  ہیں علماء کرام  اس مسئلہ کے بارے میں   کہ   منظور   علی  ایک کمپنی    میں  ملازم تھا      2008 میں   اس کی   کمپنی    نے   پلاٹ کی ایک اسکیم اپنے ملازمین کے لے لاینچ  کی تھی ، اس کی فوری ادائیگی   جزوی طورپر   ایک  لاکھ بتیس ہزار   جمع کروانے کے لئے کمپنی نےکہا ،  لیکن    منظور علی کے پاس   رقم کاانتظام  نہ ہونے کی وجہ سے  اپنے قریبی رشتے دار محمد اکرم  سے تعاون کرنے کو  کہا ،اور پلاٹ کی پوری  رقم  محمد  اکرم سے  لیکر  جمع کروادی ،اور  نومینشن میں    محمد اکرم  کا اندراج کروا کر مکمل کاغذات  کی اصل فائل محمد  اکرم کے حوالے کردی  تاکہ  الائٹمنٹ  کا وقت آ ئے گا   توالائٹی  محمد  اکرم   کو کروادونگا کیونکہ   آنے والے وقت میں   بقایا جات   کی ادائیگی  بھی منظور  علی نے محمد  اکرم کے ذمے کردیا تھا ،اب 16سال کے بعد   کمپنی  نے بقایاجات کے لئے  آگاہی شروع کردی ۔واضح   ہوکہ   منظور علی کی وفات   2013  میں  ہوچکی  ہے ،اور محمد اکرم کی وفات  2020  ءکو ہوئی ہے ،اب دونوں مرحومین کے ورثاء  اس پلاٹ کے  دعوے دار   بن رہے ہیں ،منظور  علی کے ورثاء   شراکت داری   کا کہہ  رہے ہیں  لیکن  محمد   اکرم کے ورثاء   اس پر راضی نہیں ،ان کا کہنا   یہ ہے کہ     منظور   علی 2008 میں  ہی   محمد اکرم کے حق میں دست بردار ہوچکے تھے ، اس مسئلہ کو شریعت کے مطابق   حل کریں تاکہ فریقین   گنا ہگار   نہ ہوں  کسی فریق کی حق تلفی نہ  ہو۔

اَلجَوَابْ بِاسْمِ مُلْہِمِ الصَّوَابْ

سوال  کی تحریر  کے  مطابق پلاٹ  کی خریداری  کا حق    کمپنی نے منظور علی  کو دیا تھا  ،لیکن منظور علی  کے پاس  رقم  کاا نتظام   نہ   ہونے  کی  وجہ سے   اس نےمحمد اکرم سے  رقم لیکر کمپنی  میں جمع کروایا ، اور  نومینشن    میں  نام بھی   محمد  اکرم  کا  اندراج  کروایا  اور2008 ءمیں اپنا حق  محمد  اکرم کو دیدیا  تھا ، چنانچہ پلاٹ  کے حصول  کے لئے   ادا  شدہ   قسط  کی پوری  رقم  محمد اکرم   نے  ادا کی  اس کے  علاوہ الائٹی  میں  بھی نام محمد  اکرم  کا    لکھوایا  گیا   اور    پلاٹ کے مکمل کاغذات  بھی محمد اکرم کے حوالے  کئے  گئے تھے،اگر  سوال میں لکھی  ہوئی تمام  باتیں  درست  ہیں اور کمپنی  کے قوانین   کے  تحت  اس بات کی اجازت بھی ہو کہ  کوئی ملازم   اپنا حق   بالعوض یا بلا عوض کسی اور  کو منتقل   کرسکتا  ہے ،تو  ایسی  صورت میں  مذکورہ    پلاٹ محمد اکرم  کاہے، لہذا پلاٹ کے بقاجات  کی  ادائیگی   محمد اکرم  کے ورثاء  کے ذمے لازم ہے ،اور  اس پلاٹ کو  محمد اکرم کے   ترکے  میں  شامل کرکے انہیں کے  ورثاء میں   تقسیم کیاجائے گا  ۔

منظور علی کے  ورثا  ء کی طرف   سے اس پلاٹ  میں شرکت  کا دعوی  کرنا بھی   جائز  نہیں کیونکہ  سوال    کے مطابق    منظور علی   نے اس پلاٹ   کی خریداری   میں    اپنی  کوئی  رقم شامل  نہیں کی تھی ، البتہ   کمپنی  کی طرف سے  خریداری  کا  اس کو حق  حاصل  تھا ،  جو اس نے   محمد  اکرم  کی طرف   منتقل کر دیا  تھا،اوراس   حق  کی  منتقلی  کے حوالے سے   آپس میں  کوئی  معاہدہ  بھی     نہیں   ہوا   تھا   جس کی وجہ سے فریق ثانی   پر کوئی عوض  لازم   ہو  لہذا  یہ  منظور علی  کی   طرف سے  تبرع شمار ہوگا ، اس لئے منظور    علی کے   ورثا   ء   اس  پلاٹ  میں    شراکت  دار  نہیں  ہونگے ۔ ہاں اگر محمد   اکرم  کے ورثا  ء  کو  چاہئے  کہ منظور علی  کے ورثاء کو تبرعا    کچھ   دیدیں   یہ ان کی  طرف سے احسان ہوگا ۔

حوالہ جات

الدر المختار وحاشية ابن عابدين (رد المحتار) (4/ 520)

 وحاصله: أن ثبوت حق الشفعة للشفيع، وحق القسم للزوجة وكذا حق الخيار في النكاح للمخيرة إنما هو لدفع الضرر عن الشفيع والمرأة، وما ثبت لذلك لا يصح الصلح عنه؛ لأن صاحب الحق لما رضي علم أنه لا يتضرر بذلك فلا يستحق شيئا أما حق الموصى له بالخدمة، فليس كذلك بل ثبت له على وجه البر والصلة فيكون ثابتا له أصالة فيصح الصلح عنه إذا نزل عنه لغيره، ومثله ما مر عن الأشباه من حق القصاص والنكاح والرق وحيث صح الاعتياض عنه؛ لأنه ثابت لصاحبه أصالة لا على وجه رفع الضرر عن صاحبه ولا يخفى أن صاحب الوظيفة ثبت له الحق فيه بتقرير القاضي على وجه الأصالة لا على وجه رفع الضرر، فإلحاقها بحق الموصى له بالخدمة، وحق القصاص وما بعده أولى من إلحاقها بحق الشفعة والقسم،   

احسان اللہ شائق عفا اللہ عنہ    

دارالافتاء جامعة الرشید کراچی  

۲۴ شوال  ١۴۴۴ھ  

واللہ سبحانہ وتعالی اعلم