سوال

کیا فرماتے ہیں علماء کرام مسئلہ مذکورہ کے بارے میں کہ ایک لڑکا اپنے ماموں زاد سے نکاح کرنا چاہتا ہے جب یہ بات ان دونون کے والدین کو پہنچی تو لڑکے کی والدہ نے دعوی کیا کہ میں نے اس لڑکی کو دودھ پلایا ہے جب ان سے گواہوں کے بارے میں پوچھا گیا تو اس نے صرف ایک عورت کا تذکرہ کیا جو فوت ہوچکی ہے ۔زندہ لوگون میں سے کوئی گواہ نہیں  اور یہ بالکل واضح ہے کہ دونوں کے والدین  ایک دوسرے سے ناراض ہیں اور لڑکے کی والدہ نہیں چاہتی کہ وہ اپنی بھتیجی کو بیاہ کر لائے۔ لڑکی کی ماں سے گاؤں کے عالم نے قسم دے کر پوچھا کہ کای آپ کی بیٹی کو اس نے دودھ پلایا ہے یا نہیں؟تو اس(لڑکی کی امی)نے قسم کھا کر کہا کہ وہ عورت(لڑکے کی ماں)جھوٹ بولتی ہے،میری بیٹی کو مدت رضاعت میں کسی نے دودھ نہیں پلایا۔آیا ان دونون کا نکاح جائز ہے یا نہیں ؟

اَلجَوَابْ بِاسْمِ مُلْہِمِ الصَّوَابْ

شرعی نقطہ نظر سے رضاعت کے ثبوت کے لئے دو مردوں یا ایک مرد اور دو عورتوں کی گواہی ضروری ہے، ایک عورت کی گواہی معتبر نہیں،لہذا اگردودھ پلانے والی( لڑکے کی ماں) کے پاس گواہ  موجود نہ ہوں تو ایسی صورت میں قضاءًٍ ان کی بات  کا اعتبار نہیں،اور نکاح جائز ہے،نیزاگر لڑکے اور لڑکی کواس خاتون کی بات درست ہونے کا یقین یا غالب گمان نہیں تو دیانتہً بھی نکاح جائز ہے،البتہ اگر خاتون کے اس دعوی سے جھوٹ کا یقین یا گمان غالب نہ بن رہا ہو،بلکہ شک پیداہوکہ شاید وہ سچ بول رہی ہو، تو  احتیاطاً اس رشتہ سے احتراز بہتر ہے۔

حوالہ جات

وفی خلاصة الفتاوى (2/11):

ولا يجوز شهادة امرأة واحدة على الرضاع أجنبية كانت أو أم أحد الزوجين، فإن وقع فى قلبه صدق المخبر فالأفضل أن يتنزه قبل العقد و بعده يسعها المقام معه حتى يشهد على ذلك رجلان أورجل وامرأتان عدول، ولا يقبل شهادة النساء وحدهن

سید نوید اللہ

دارالافتاء،جامعۃ الرشید

13/صفر1444ھ

واللہ سبحانہ وتعالی اعلم