سوال

ایک شخص اپنی بیوی کو اس کی والدہ کے گھر چھوڑ کر گیا اور اس کے بعد بیوی کے بھائی کو فون کیا،فون ان دونوں کے درمیان درج ذیل مکالمہ ہوا۔

شوہر: اب میرا آپ کی بہن کے ساتھ نباہ نہیں ہوسکتا،اس لئے میں نے اسے اس کے والدین کے گھر چھوڑ دیا ہے۔

بھائی: اگر آپ کو اس سے کوئی شکایت ہے تو بڑے ذمہ دار بیٹھ کر بات چیت کریں گے اور مسئلہ حل کریں گے۔

شوہر: نہیں،اب ہمارا ساتھ رہنا ممکن نہیں۔

بھائی: کیا مطلب ہے آپ کا؟ کیا آپ یہ رشتہ ختم کرنا چاہتے ہیں؟

شوہر: جی باقاعدہ میں نے ایک عالم دین سے مشورہ کیا ہے اور میں یہ رشتہ ختم کرنا چاہتا ہوں،کیونکہ ہمارا نباہ اور ساتھ رہنا ممکن نہیں ہے۔

محترم مفتیان کرام! شوہر نے اس مکالمے میں جو الفاظ بولے ہیں،شریعت کی رو سے اس کا کیا حکم ہے؟

اَلجَوَابْ بِاسْمِ مُلْہِمِ الصَّوَابْ

مذکورہ مکالمے میں ایسا کوئی جملہ نہیں ہے جو فی الحال طلاق کے انشاء پر دلالت کرے،بلکہ شوہر نے اس رشتے کو ختم کرنے کے ارادے کا اظہار کیا ہے،اس لئے میاں بیوی کا رشتہ بدستور قائم ہے۔

حوالہ جات

۔۔۔۔۔۔

محمد طارق

دارالافتاءجامعۃالرشید

04/جمادی الاولی1444ھ

واللہ سبحانہ وتعالی اعلم