سوال

میں نے کچھ عرصہ پہلے نذر مانی تھی کہ اگر میرے بیٹے کو فلاں ملازمت مل گئی تو میں ایک بکری صدقہ کروں  گا اور اس مقصد کے لیے میں نے ایک بکری بھی خرید لی تھی۔اس کے بعد میرے بیٹے کوالحمدللہ وہ ملازمت مل گئی ،لیکن اس دوران اس بکری نے ایک بچہ جن دیا۔ اب سوال یہ ہے کہ کیا میرے اوپر اس نذر کو پورا کرنا لازم ہے ؟اورنذر ماننے کے بعد پیدا ہونے والےبکری کے بچے کا کیا حکم ہے،کیا اس کو صدقہ کرنا بھی لازم ہے  ؟

اَلجَوَابْ بِاسْمِ مُلْہِمِ الصَّوَابْ

صورتِ مسئولہ میں جس کام کی آپ نے نذر مانی تھی جب وہ کام ہو گیا توشرعاً آپ پر نذر کو پورا کرنا یعنی ایک درمیانے درجے کی بکری صدقہ کرنا لازم  ہو گیا ہےاور  چونکہ آپ نے مطلق ایک بکری صدقہ کرنے کی نذر مانی تھی اورکوئی خاص بکری متعین نہیں  کی تھی ،اس لیے آپ نذر پوری کرنے کے لیے کوئی بھی درمیانے درجے کی بکری صدقہ کر سکتے ہیں ۔اور اگر خریدی گئی بکری ہی صدقہ کرنا چاہیں  تو صرف وہ بکری صدقہ کرنے سے نذر پوری ہو جائے گی، اس کا بچہ صدقہ کرنا لازم نہیں ہے۔

حوالہ جات

قال العلامۃ الحصکفی رحمہ اللہ: ومن ‌نذر ‌نذرا ‌مطلقا أو معلقا بشرط وكان من جنسه واجب....ووجد الشرط المعلق به،لزم الناذر؛لحديث" من نذر وسمى فعليه الوفاء بما سمى".

قال العلامۃ ابن عابدین رحمہ اللہ:قوله:( لزم الناذر) أي لزمه الوفاء به ،والمراد أنه يلزمه الوفاء بأصل القربة التي التزمها لا بكل وصف التزمه ؛لأنه لو عين درهما أو فقيرا أو مكانا للتصدق أو للصلاة فالتعيين ليس بلازم.(الدرالمختار معردالمحتار:3/735)

    قال العلامۃ ابن نجیم رحمہ اللہ: وصرح في النهاية بأن النذر لا يصح ‌إلا ‌بشروط ‌ثلاثة في الأصل ‌إلا إذا قام الدليل على خلافه ،إحداها أن يكون الواجب من جنسه شرعا، والثاني أن يكون مقصودا لا وسيلة، والثالث أن لا يكون واجبا عليه في الحال أو في ثاني الحال. (البحر الرائق شرح كنز الدقائق:2/514)

قال العلامۃ الحصکفی رحمہ اللہ: ولو قال: للہ علي أن أذبح جزورا وأتصدق بلحمه، ‌فذبح ‌مكانه ‌سبع شياه ،جاز.(الدر المختار:3/742)

محمد عمر بن محمدالیاس

دارالافتاء جامعۃالرشید،کراچی

6شعبان،1444ھ

واللہ سبحانہ وتعالی اعلم