سوال

ایک عورت اپنے شوہر کو قریب نہیں آنے دیتی اور وہ کہتی ہے کہ اس کے شوہرنے اسے تین طلاقیں دی ہیں،طلاق ہوئے تقریباً آٹھ یا دس سال گزرگئے،لیکن اس وقت عورت کو دین  کی اتنی سمجھ نہیں تھی،بعد میں جب دین کی سوجھ بوجھ آئی تو عورت نے شوہر سے علیحدگی اختیار کرلی،شوہر اس کی بات ماننے کے لئے قطعاً تیار نہیں ہے،ہاں البتہ شوہر اس بات کا اقرار کرتا ہے کہ میں نے دو طلاقیں دی ہیں۔

بیوی کے پاس کوئی گواہ نہیں ہے،البتہ اسی کی دو لڑکیاں ہیں جو اس بات کی گواہی دیتی ہیں،ایک کہتی ہے کہ میں اس وقت موجود تھی جس وقت ابو نے تین طلاقیں دیں،جبکہ دوسری کہتی ہے کہ ابو نے میرے سامنے اقرار کیا ہے  کہ میں ٕغلطی سے تین طلاقیں دے چکا ہوں اور عورت قسم کھارہی ہے کہ اس کے شوہر نے اسے تین طلاقیں دی ہیں،اب اس تفصیل کی روشنی میں درج ذیل سوالات کے جوابات مطلوب ہیں:

1۔اس صورت میں ازدواجی تعلقات رکھنا کیسا ہے؟

اور عورت کایہ کہنا کہ اس کا شوہر اسےتین طلاقیں دے چکا ہے،اس کا عورت کو کوئی فائدہ ہوگا،یعنی شوہر سے ظاہری علیحدگی وغیرہ۔

اَلجَوَابْ بِاسْمِ مُلْہِمِ الصَّوَابْ

چونکہ طلاق کے معاملے  میں عورت کی خود اپنی حیثیت قاضی جیسی ہے،لہذااگر وہ خود شوہر کےمنہ سے طلاق کے الفاظ سنے یا کوئی قابل اعتماد شخص اسے خبر دے کہ اس کے شوہر نے اسے طلاق دے دی ہے تو اس کے بعد بیوی کے لئے شوہر کے ساتھ رہنے کی گنجائش نہیں ہوتی،اس لئے مذکورہ صورت میں عورت پر اسی وقت سے شوہر سے علیحدگی اختیار کرنا لازم تھا جب اس نے شوہر کی زبان سے طلاق کے الفاظ سنے تھے،تاہم اگر اس وقت دینی شعور نہ ہونے کی وجہ سے غفلت ہوگئی تو اب فوری طور پر شوہر سے علیحدگی لازم ہے اور اب تک میاں بیوی جس سنگین غفلت کے مرتکب ہوئے اس پر سچے دل اور ندامت کے ساتھ کثرت سے توبہ و استغفار لازم ہے۔

حوالہ جات

"رد المحتار "(3/ 251):

"والمرأة كالقاضي إذا سمعته أو أخبرها عدل لا يحل لها تمكينه".

"فتح القدير" (8/ 17):

" وكل ما لا يدينه القاضي إذا سمعته منه المرأة أو شهد به عندها عدل لا يسعها أن تدينه لأنها كالقاضي لا تعرف منه إلا الظاهر".

محمد طارق

دارالافتاءجامعۃالرشید

15/ذی قعدہ 1444ھ

واللہ سبحانہ وتعالی اعلم