سوال

محمد  اسامہ نے اپنے دوست  امان اللہ  سے کہا   اگر فلاں کام  کیا   تو  آپ جس مومن  کی بیٹی  سے  نکاح  کروگے  اس کو طلاق ہوگی ،جواب میں امان اللہ  نے   صرف کہا کہ ٹھیک  ہے ،اس کے الفاظ کو نہیں  دہرایا ، اور بعد میں امان  اللہ نے وہ کام  کرلیا  ، تو  اس کام کی وجہ سے  امان  اللہ کی بیوی کو طلاق   ہوگئی  یانہیں  ؟

اَلجَوَابْ بِاسْمِ مُلْہِمِ الصَّوَابْ

مسئولہ  صورت  میں جب  دوست  نے کہا  کہ   اگر  تم فلاں کام  کروگے  تو تم جس  مومن  کی  بیٹی سے نکاح  کروگے  اس کو   طلاق ہوگی ، اس پر  امان  اللہ  نے  کہا  ٹھیک  ہے   تو   یہ طلاق معلق  کی شرط ہوگئی  ، کیونکہ  ٹھیک   ہے    کے  لفظ  میں    شرط کا     پورا جملہ  محذوف   ہے ،لہذا  اس شرط کے بعد اگر امان اللہ  نے  وہ کام  کرلیا  جس پر طلاق   کو   معلق کیا    تھا،   تو   شرط  پا  ئی   گئی    اس کی  وجہ  سے  نکاح کے بعد   امان اللہ   کی بیوی  پر ایک  طلاق  بائن  واقع ہوجائے  گی ،البتہ   ایسی  صورت  میں  اس عورت  کے ساتھ  اسی مجلس میں   یا بعد  میں  دوبارہ نکاح   ہوسکے گا ،اوردوبارہ  نکاح کی  صورت میں   مذکور ہ شرط کی وجہ  سے  مزید کوئی  طلاق  واقع  نہیں ہوگی ۔ اس کے بعد  امان  اللہ کے  پاس صرف  دو طلاقوں  کا  اختیار باقی  رہے  گا  اگر کسی وقت   مزید دو طلاقیں  دےگا    تو  بیوی   حرام  ہوجائے گی ۔

حوالہ جات

الدر المختار وحاشية ابن عابدين (رد المحتار) (3/ 346)

ولو قال: كل امرأة أتزوجها فهي طالق فتزوج امرأة وفسخ اليمين ثم تزوج امرأة أخرى لا يحتاج إلى الفسخ في كل امرأة؛

الفتاوى الهندية (8/ 138)

ولو قالت أنا طالق فقال نعم طلقت ولو قاله في جواب طلقني لا تطلق وإن نوى قيل لرجل ألست طلقت امرأتك فقال بلى تطلق كأنه قال طلقت لأنه جواب الاستفهام بالإثبات ولو قال نعم لا تطلق لأنه جواب الاستفهام بالنفي كأنه قال ما طلقت كذا في الخلاصة

الفتاوى الهندية (8/ 140)

رجل قال لغيره أطلقت امرأتك فقال نعم بالهجاء أو قال بلى بالهجاء ولم يتكلم به يقع الطلاق كذا في فتاوى قاضي خان          

                                                                                                                     احسان اللہ شائق عفا اللہ عنہ    

                                                                                                                 دارالافتاء جامعة الرشید    کراچی

                                                                                                         ۳  صفر  المظفر   ١۴۴۵ھ        

واللہ سبحانہ وتعالی اعلم