سوال

عرض  یہ ہے کہ  ن خ  کی شادی کے موقع پر   4تولہ   سونا مہر مقرر  ہواتھا ، جو انہوں نے ادا  کردیاتھا ، لیکن پہلی مرتبہ گاؤں  میں مکان کی ضرورت  تھی،  تو بیوی   سے   ڈھائی تولہ  سونا   قرض لیکر   مکان پر   خرچ کردیا ،اس کے بعد   کراچی میں مکان  کی ضرورت تھی ،اس کے لئے   بقیہ    ڈیڑھ   تولہ سونا   لیکر     مکان کے بیعانہ  کے  طور پر    دیا ،   لیکن ن خ  کی طرف   سے مکان   کی  پوری  رقم ادا  نہ ہوسکنے کی وجہ سےبیعانہ  ضبط   ہوگیا تھا ۔    اس کے بعد ابھی تک  بیوی  کا قرض  ادا نہ ہوپایا تھا  کہ  شوہر کا انتقال ہوگیا ، اب  گاؤں  میں جرگہ  والوں   نے فیصلہ  کی  دو صورتیں   رکھی ہیں ،1۔   بیوہ ڈیڑھ تولہ سونا لے اور وراثت   میں  سے حصہ  لے ،اور  ڈھائی   تولہ   سونا    وہ معاف کردے ،کیونکہ وہ   تو  ویسے   ہی بیعانہ   ضبط ہوگیا  تھا،   اس  لئے بیوہ اس   کی حقدار نہیں  رہی۔2  دوسری صورت یہ  ہے کہ   بیوہ   کا بیٹا  اور ساس  یعنی ن خ  کی والدہ   قسم کھالے کہ بیوہ  نے مہر وصو ل کرلیا ہے ،  تو   بیوہ  کو مہر سے محروم کردیاجائے گا ،﴿ یاد رہے کہ   ن خ کی بیوہ  نے ن خ   کے انتقال کے بعد   اس کے بھتیجے ’’ س ‘‘ سے   شادی  کی  ہے  جس کی  وجہ سے   ن خ  کی والد  ہ اور اس کا  بیٹا ناراض ہیں  ﴾

  ن خ   کے  بیوہ   کا دعوی  یہ ہے کہ  میں نے   مہر  بطور قرض دیا  تھا اس کےگواہ موجود ہیں ، اور   اس کے بعد    مہرواپس موصول نہیں   ہوا ،باقی میر اکسی سے کوئی لین دین نہیں ہے ،

اب سوال یہ ہے کہ    مذکو رہ صورت   میں   ن خ کی بیوہ   کو    صرف   وراثت   ملے گی   یا   مہر  اور وراثت دونوں   ملیں گی؟                    

اَلجَوَابْ بِاسْمِ مُلْہِمِ الصَّوَابْ

نکاح  میں  جو مہر مقرر  ہوتا ہے  ، وہ   شرعا  بیوی  کا حق ہوتا ہے ، وہی  اس کی مالک  ہوتی  ہے ۔

.  لہذا  صورت  مسئولہ  میں جب  رخصتی  کے بعد    بیوی   کو   مہر  حوالے کردیا گیا   تو بیوی    اس مہر کی مالک ہوگئی ، اس کے بعد   شوہر  نے اپنی ضرورت   کے لئے   یہ  سونا قرض  لیا    تو  شوہر کے ذمے لازم  تھا قرض   واپس کرتا ،لیکن   شوہر اپنی زندگی   میں  واپس نہ   کرسکا   ،  شوہر  کے  انتقال  کے بعد اب ورثاء  کے ذمے لازم ہے کہ ورا ثت  کی تقسیم سے پہلے  ن خ   کی  بیوی   کے  مہر  کا  سونا  جو ن خ  نے بعد  میں قرض    کے طور  پر لیا وہ  ادا کرے  ،اس کے  بعد  بقیہ  میراث  تمام شرعی  ورثا ء  میں  تقسیم  کرے  ،اور میراث   میں   بھی  بیوہ کا  اٹھواں   حصہ  ہوگا ۔

یاد رہے کہ میت   کا واجب الادا  قرض ادا نہ کرنا ،  اسی طرح  بیوہ  یا کسی  وارث کواس کے  حق میراث  سے  کرنا بڑا گناہ  ہے،اس  پر قرآن وحدیث میں  سخت  وعیدیں   آئی ہیں ،   قرض   ادا     نہ کرنا    ،یہ خود  میت کے لئے  بھی  قبر وحشر میں وبال  کا سبب ہے ۔

حوالہ جات

مشكاة المصابيح للتبريزي (2/ 197)                              

وعن أنس قال : قال رسول الله صلى الله عليه و سلم : " من قطع ميراث وارثه قطع الله ميراثه من الجنة يوم القيامة " . رواه ابن ماجه

مشكاة المصابيح للتبريزي (2/ 158)

وعن أبي هريرة قال : قال رسول الله صلى الله عليه و سلم : " نفس المؤمن معلقة بدينه حتى يقضى عنه " . رواه الشافعي وأحمد والترمذي وابن ماجه والدارمي وقال الترمذي : هذا حديث غريب

مشكاة المصابيح للتبريزي (2/ 158)

وعن البراء بن عازب قال : قال رسول الله صلى الله عليه و سلم : " صاحب الدين مأسور بدينه يشكو إلى ربه الوحدة يوم القيامة " . رواه في شرح السنة

احسان اللہ شائق عفا اللہ عنہ    

دارالافتاء جامعة الرشید     کراچی

١۵ صفر   ١۴۴۵ ھ

واللہ سبحانہ وتعالی اعلم