سوال

عرض یہ ہے کہ ایک   شخص   کا  انتقال  ہوا ،ورثاء میں  ایک  بیوہ  ہے ،ایک  بیٹا  اور ایک بیٹی ، اس کی ملکیت  میں  ایک مکان   اور دکان تھی ،  اس  نے  اپنی زندگی  میں  مکان کی  قیمت لگواکر  بیٹی  ﴿  جوکہ شادی  شدہ ہے ﴾ اس کو حصہ  دیا ،اور بیٹے  کو بھی  حصہ دیا  ، اور دکان کے  بارے میں بیٹے کا دعوی  یہ ہے   کہ  والد مرحوم  نے  مجھ سےکہاتھا  کہ  یہ کاروبار کی  جگہ  ہے ،اس کو نہیں  بیچتے ، یہ تمہاری ہے، لیکن  بیٹے  کے پاس   اس پر کوئی  گواہ موجود نہیں  ہے ، اور کوئی  تحریر  بھی نہیں ،البتہ      اس کی بیوی    اور والدہ گواہ ہیں ،اور  بیٹا والد  کی زندگی  میں  اس دکان میں کام   کرتا رہا ، لیکن  معاملات ،دیکھ بھا  ل حساب وکتاب      آخری  وقت  تک توقیر   احمد مرحوم کے  ہاتھ میں ہی  رہا ،اتنقال  کے بعد بھی  بیٹا  دکانداری  کررہا  ہے ۔

  درج ذیل سولات  کے  جوابات  مطلوب ہیں

1۔ زندگی  میں میراث  تقسیم کرنے  کاکیا   طریقہ ہے؟

2۔مرحوم  نے   دکان  بمعہ سامان   کے بیٹے کو  دیدی   ،اس   دکان میں سے  بیٹی  کو  کچھ نہیں دیا ،توکیا ان کا  یہ فعل درست تھا  ؟

3۔اب  میراث   تقسیم کرتے وقت   زندگی میں   اولاد  کو جو  مال  دیا تھا وہ  بھی ترکے  میں شامل ہوگا یانہیں  ؟

4۔  بیٹے نے   باپ کے  انتقال  کے  بعد  اس دکان کی آمدنی  سے   جو مزید مال  کمایا  ہے ،وہ    مرحوم  کے ترکے  میں شامل ہوگا   یانہیں ؟ 5 ۔  تمام جائداد کی موجودہ   قیمت  کا اعتبار  ہوگا  یا انتقال  سے  پہلے کا ؟

اَلجَوَابْ بِاسْمِ مُلْہِمِ الصَّوَابْ

واضح  ہوکہ میراث  اس مال کو کہاجاتا  ہے جومرتے وقت   انسان کی ملک  میں   موجود ہو تاہے ،لہذا  جب تک  آدمی بقید  حیات  ہے ، اس کے مال  میں  میراث کے احکام  جاری نہیں ہونگے ،یعنی      زندگی میں   مال تقسیم کرکے بیوی  بچوں  کے حوالے کرنا آدمی  کے ذمہ لازم نہیں  ، تاہم اگر کوئی  شخص اپنی   زندگی میں   اپنا مال بیوی  بچوں  میں  تقسیم کرنا  چاہے   تو اس کی   شرعی  حیثیت  ھبہ  ﴿ گفٹ ﴾  کی ہوگی ۔ اس صورت میں اولاد میں برابری کرنا  ﴿یعنی لڑکا ،اور لڑکی  کو  برار مال  دینا ﴾مستحب  ہے، بلا کسی وجہ  ترجیح ﴿ یعنی دینداری ،احتیاج ،خدمت گذاری وغیرہ﴾کے اولاد میں سے کسی کو مال کم دینا اورکسی کو زیادہ دینا مکروہ ہے۔اوراگر کوئی  شخص  اپنی زندگی میں میراث کے  اصول  کے مطابق  مال تقسیم   کرنا چاہے   تواس کی بھی   گنجائش   ہے ۔ اس  کی صورت یہ  ہے  کہ اپنے لئے حسب  ضرورت مال رکھ لینے کے بعد جو مال  بیوی  بچوں میں  تقسیم کرنا چاہیں تو   اس مال کو  اٹھ  حصوں میں تقسیم کرکے   بیوی کو ایک حصہ  دیاجاتاہے ،اس کے  بعدباقی  مال کو  لڑکے  اور لڑکیوں  میں  اس طرح  تقسیم کیاجاتا  ہے کہ لڑکے کو دو حصے  اور لڑکی کو ایک  حصہ  دیاجائے ،ھبہ یا  میراث  ، دونوں  میں سے  جو  صورت بھی اختیار  کی  جائے ،اس کے بعد انتقال  کے  وقت   جومال  ملک میں  موجود  ہوگا   وہ میراث کے اصول پر  ورثاء  میں دوبارہ  تقسیم  ہوگا ۔

    لہذا  صورت مسئولہ میں مرحوم  کی طرف سے  اولاد میں  سے   جس  کو  جو مال دیا  گیا  اگر   ھبہ ﴿گفٹ﴾ کرکے باقاعدہ   مالک  بناکر  تصرف  کی اجازت   دیدی تھی   تو    اس مال  میں ھبہ مکمل  ہوا ، اور موہوب لہ  مال کامالک  بن گیا ، اس  مال میں میراث  جاری نہیں  ہوگی ، اور دکان  کاحکم  یہ ہے کہ  اگر  دکان  بیٹے  کو   ھبہ  کرکے  باقاعدہ    مالکانہ    حقوق کے ساتھ  تصرف میں  دیدیا تھا،اور  اس پر  کوئی  شرعی گواہ  اور تحریر  موجود  ہے تب تو   اس میں میراث جاری نہیں ہوگی ، وہ اکیلا  بیٹے کی  ہوگی ۔اور  اگر باقاعدہ   مالکانہ   حقوق  کے ساتھ مالک بنانے  پرکوئی تحریری   ثبوت  اور گواہ موجود نہیں  ہے ،تو ایسی صورت میں   دکان  کو دیگر ترکے میں   شامل  کرکے  تمام ورثا ء   میں تقسیم کیاجائے  گا ،

ترکے کی تقسیم کا طریقہ یہ ہے  کہ مرحوم نے  بوقت انتقال منقولہ غیرمنقولہ  جائیداد  ، سونے چاندی ،نقدی  اور چھوٹا  بڑا  جوبھی  سامان اپنی ملک میں چھوڑا  ہے ، سب  مرحوم کا  ترکہ  ہے  اس  میں  سے اولا کفن دفن  کا  متوسط خرچہ  نکالا جائے ، اس کے بعد مرحوم کے ذمہ کسی  کاقرض  ہو  وہ ادا کیاجائے ، اس کے بعد  مرحوم  نے کسی کےلئے  کوئی  جائز  وصیت کی  ہو تو  تہائی  مال کی حد تک   اس کو نافذ  کیاجائے اس کے بعد   مال کو  مساوی  آٹھ حصوں  میں  تقسیم کرکے   ایک حصہ  بیوہ کو  دیاجائے, بقایا مال  کومساوی تیں حصوں میں تقسیم کرکے   لڑکے کو دو حصے  اور لڑکی  کوایک حصہ دیا جائے ۔

حوالہ جات

رد المحتار (24/ 9)

﴿و ) شرائط صحتها ( في الموهوب أن يكون مقبوضا غير مشاع مميزا غير مشغول ) كما سيتضح . الی ۰قولہ

( وتتم ) الهبة ( بالقبض ) الكامل ( ولو الموهوب شاغلا لملك الواهب لا مشغولا به )

 قال الامام  عبد  الرشید  البخاری  رحمہ اللہ  وفی  الفتاوی  رجل  لہ  ابن وبنت ،اراد  ان یھب  لھما   شيئا فالافضل  ان یجعل  للذکر  مثل  حظا الانثیین  عند محمد  رحمہ اللہ  تعالی ، وعند ابی یوسف   رحمہ اللہ   بینھما  سواء  وھو  المختار  لورود  الاثار ،ولو وھب  جمیع  مالہ لابنہ  جاز  فی  القضا ء وھو اثم  ثم نص محمد   رحمہ اللہ  تعالی ھکذا  فی  العیون  ، ولواعطی بعض ولدہ  شئیا دون  البعض لزیادة  رشدہ  لا باس بہ وان کانا سواء لاینبغی ان یفضل ﴿ خلاصة  الفتاوی ص/400﴾                

احسان اللہ شائق عفا اللہ عنہ    

 دارالافتاء جامعة الرشید     کراچی

۲ربیع  الثانی  ١۴۴۵ھ

واللہ سبحانہ وتعالی اعلم